കോട്ടയം: കേന്ദ്ര ഖാദി ഗ്രാമവ്യവസായ കമ്മീഷന് ഖാദി ഗ്രാമവ്യവസായ ബോര്ഡിന്റെയും ചാസിന്റെയും സഹകരണത്തോടെ ആരംഭിച്ച പ്രവാസി ഖാദി ഫെസ്റ്റിന് തുടക്കമായി. നഗരസഭ അദ്ധ്യക്ഷ ഡോ.പി.ആര്.സോന ഉദ്ഘാടനം ചെയ്തു. അതിരൂപതാ പ്രവാസി ക്ഷേമവകുപ്പ് ഡയറക്ടര് ഫാ.സണ്ണി പുത്തന്പുരയ്ക്കല് പ്രവാസികളെ പൊന്നാടയണിയിച്ച് ആദരിച്ചു. ചാസ് ഖാദി ഡയറക്ടര് ഫാ. അനില് കരിപ്പിങ്ങാംപുറത്തിന്റെ അദ്ധ്യക്ഷതയില് കൂടിയ സമ്മേളനത്തില് ജനറല് മാനേജര് ജോണ് സക്കറിയസ്, അസി. മാനേജര് ജോജോ കെസി ഖാദി ഭവന് മാനേജര് ആന്റണി അഡ്മിനിസ്ട്രേറ്റീവ് രാജന് മാത്യു എന്നിവര് പ്രസംഗിച്ചു. ഷാജി പോള് ആദ്യവില്പ്പന ഏറ്റുവാങ്ങി. 5 മുതല് 20ശതമാനം വരെ ഡിസ്കൗണ്ടോടുകൂടി ഖാദി ഗ്രാമ വ്യവസായ ഉല്പ്പന്നങ്ങളുടെ പ്രദര്ശന വിപണന മേളയും ഇതോടൊപ്പം സംഘടിപ്പിച്ചിട്ടുണ്ട്. കേരളത്തിനകത്തും പുറത്തുമുള്ള ആയിരത്തിലധികം ഖാദി ഗ്രാമവ്യവസായ യൂണിറ്റുകളില് നിര്മ്മിക്കുന്ന ഗുണമേന്മയേറിയ ഉല്പ്പന്നങ്ങള് സര്ക്കാര് നിയന്ത്രിത വിലയ്ക്ക് ഈ മേളയില് ലഭിക്കും. ഖാദി സില്ക്ക്- കോട്ടണ് സാരികള്, ഖാദി തുണിത്തരങ്ങള്, കുര്ത്തകള്, ചുരിദാറുകള്, കയറുല്പ്പന്നങ്ങള്, കാര്പ്പറ്റുകള്, പഞ്ഞിമെത്തകള്, ആയുര്വ്വേദ ഉല്പ്പന്നങ്ങള്, കരകൗശല വസ്തുക്കള്, കോലാപ്പുരി ലെതര് ചെരിപ്പുകള്, ബാഗുകള്, തേന്, തേനുല്പ്പന്നങ്ങള്, തടി-സ്റ്റീല്-ചൂരല് ഫര്ണീച്ചറുകള് തുടങ്ങിയ പതിനായിരത്തില്പ്പരം ഗ്രാമവ്യവസായ ഉല്പ്പന്നങ്ങളും മേളയില് ഉള്പ്പെടുത്തിയിട്ടുണ്ട്. മേള 30ന് സമാപിക്കും.
പ്രതികരിക്കാൻ ഇവിടെ എഴുതുക: