മൂവാറ്റുപുഴ: കൈക്കൂലി കേസില് പിടിയിലായ മൂവാറ്റുപുഴ ആര്ഡിഒ വി.ആര്. മോഹനന് പിള്ളയുടെ റിമാന്സുകാലാവധി ഈ മാസം 13 വരെ നീട്ടി. വാഴക്കുളം വേങ്ങ ചുവട്ടില് പാടശേഖരത്തിന്റെ സമീപത്തെ പുരയിടത്തിന്റെ ഇടിഞ്ഞു പോയ സംരക്ഷണഭിത്തി പുനര്നിര്മിക്കുന്നതിന് അനുമതി നല്കാന് നെല്ലാട് വരി പ്ലായില് മാത്യു. വി. ഡാനിയേലില് നിന്ന് അമ്പതിനായിരം രൂപ കൈക്കൂലി വാങ്ങുന്നതിനിടെ കഴിഞ്ഞ തിങ്കളാഴ്ച ഉച്ചക്കാണ് ആര്ഡിഒ ഓഫീസിലെ ചേംബറില് വച്ച് ഇയാളെ വിജിലന്സ് പിടികൂടിയത്.
തുടര്ന്ന് മൂവാറ്റുപുഴ വിജിലന്സ് കോടതി അവധിയായതിനാല് തൃശൂര് വിജിലന്സ് കോടതിയില് ഹാജരാക്കി ഈ മാസം 4 വരെ റിമാന്റ് ചെയ്യുകയായിരുന്നു. എന്നാല് റിമാന്റ് കാലാവധി അവസാനിക്കാന് ഒരു ദിവസം ബാക്കി നില്ക്കെ ഇന്നലെ ജാമ്യം എടുക്കുന്നതിനായി മൂവാറ്റുപുഴ കോടതിയില് ഹാജരാക്കി. റിമാന്റ് കാലാവധി അവസാനിക്കുന്നതിന് മുമ്പ് ഹാജരാക്കിയതില് അതൃപ്തി രേഖപെടുത്തിയ കോടതി മേലില് ഇത്തരം കാര്യങ്ങള് ആവര്ത്തിക്കരുതെന്ന് ഉദ്യോഗസ്ഥരെ താക്കീത് ചെയ്തു.
പ്രതികരിക്കാൻ ഇവിടെ എഴുതുക: