മഥുര: മഥുരയിലെ ജവഹര് ബാഗില് അനധികൃത കൈയേറ്റത്തിന് നേതൃത്വം നല്കിയ ആസാദ് ഭാരത് വൈദിക് വൈചാരിക് ക്രാന്തി സത്യഗ്രഹി എന്ന സംഘടനയുടെ നേതാവ് രാം ബ്രിക്ഷ് യാദവ് അക്രമത്തിനിടെ കൊല്ലപ്പെട്ടുവെന്ന് പോലീസ് വ്യക്തമാക്കി. വ്യാഴാഴ്ച പാര്ക്ക് ഒഴിപ്പിക്കാന് പോലീസ് എത്തിയപ്പോള് ചെറുത്തുനിന്നത് യാദവിന്െറ നേതൃത്വത്തിലാണ്.
60 വയസ്സുകാരനായ യാദവാണ് രണ്ടുവര്ഷം മുമ്പ് ഏതാനും അനുയായികളുമായി ജവഹര് ബാഗിലെ പാര്ക്ക് കൈയേറിയത്. പോലീസിനെ അകറ്റാൻ കൈയേറ്റക്കാര് കുടിലുകള്ക്ക് തീയിട്ടപ്പോഴാണ് രാം ബ്രിക്ഷ് യാദവും സ്ത്രീകളടക്കം അടക്കം 11 പേര് പൊള്ളലേറ്റുമരിച്ചത്. കുടിലുകളിലെ എല്.പി.ജി സിലിണ്ടറുകളടക്കം പൊട്ടിത്തെറിച്ച് തീ ആളിപ്പടര്ന്നാണ് ദുരന്തമുണ്ടായത്.
കഴിഞ്ഞദിവസം മൂന്നു പേര്കൂടി മരിച്ചതോടെ മരണസംഖ്യ 27 ആയി. രാം ബ്രിക്ഷ് യാദവിന്െറ മൃതദേഹം അനുയായികള് തിരിച്ചറിഞ്ഞതായി യുപി ഡിജിപി ജാവേദ് അഹ്മദ് ട്വിറ്ററില് അറിയിച്ചു. മൃതദേഹം തിരിച്ചറിയാന് കുടുംബാംഗങ്ങള്ക്ക് കൈമാറും.
അതിനിടെ, കൊല്ലപ്പെട്ട പൊലീസുകാരുടെ ബന്ധുക്കള്ക്ക് നല്കുമെന്ന് പ്രഖ്യാപിച്ച നഷ്ടപരിഹാരത്തുക 50 ലക്ഷമായി ഉയര്ത്തി. പൊലീസുകാരുടെ കുടുംബത്തിന് പെന്ഷനും കൊല്ലപ്പെട്ടവരുടെ കുടുംബത്തില് ഒരാള്ക്ക് ജോലിയും നല്കുമെന്ന് മുഖ്യമന്ത്രി അഖിലേഷ് യാദവ് പ്രഖ്യാപിച്ചു.
സംഘര്ഷത്തിന് പിന്നാലെ പ്രതിപക്ഷ കക്ഷികളില്നിന്നും രൂക്ഷവിമര്ശം നേരിട്ടതോടെയാണ് അഖിലേഷ് യാദവ് പുതിയ പ്രഖ്യാപനങ്ങള് നടത്തിയത്.
പ്രതികരിക്കാൻ ഇവിടെ എഴുതുക: