കോട്ടയം: മരാമത്ത് വകുപ്പിന്റെ അനാസ്ഥ തുടരുന്നു സീബ്രാ ലൈനുകള് ഇല്ലാതെ റോഡുകള്. നഗരത്തിലെ പ്രധാന പാതകളില് സീബ്രാ ലൈനുകള് ഇല്ലാത്തതിനാല് കാല്നട യാത്രക്കാരും വിദ്ധ്യാര്ത്ഥികളും റോഡ് മുറിച്ച് കടക്കാന് ബുദ്ധിമുട്ടുന്നു. സ്കൂള് തുറക്കുന്നതിന് മുന്നേതന്നെ നഗരത്തിലും സമീപ റോഡുകളിലുമായി കൂടുതല് സ്ഥലങ്ങളില് സീബ്രാ ലൈനുകള് വരയ്ക്കണമെന്ന ആവശ്യം ശക്തമായിരുന്നു. എന്നാല് അധികൃതര് ഈ പ്രശ്നത്തിന് വേണ്ടരീതിയില് പരിഹാരം കണ്ടെത്താന് ശ്രമിക്കുന്നില്ലായെന്ന് ജനങ്ങള് പരാതി പറയുന്നത്. മഴക്കാലം കൂടി എത്തിയതോടെ തിരക്കേറിയ റോഡുകളില് നേരത്തേ വരച്ചിരുന്ന സീബ്രാ ലൈനുകള് കാണാനാവാത്ത സ്ഥിതിയാണ്. വിദ്ധ്യര്ത്ഥികളും കാല്നടയാത്രക്കാരും കൂടുതല് സമയമെടുത്താണു തിരക്കേറിയ സമയങ്ങളില് റോഡ് മുറിച്ച്കടക്കുന്നത്. ഗതാഗത നിയന്ത്രണത്തിനായി നിയോഗിച്ചിരിക്കുന്ന പോലീസുകാരാണു നിലവില് ഒട്ടുമിക്ക ജംഗ്ഷനുകളിലും കാല്നട യാത്രികരെ റോഡ് മുറിച്ച്കടക്കാന് സഹായിക്കുന്നത്.
നഗരത്തിലെ പ്രധാന ജംഗ്ഷനുകളായ ഗാന്ധിസ്ക്വയര്, ബേക്കര് ജംങ്ഷന് തുടങ്ങിയ ഇടങ്ങളിലെ സീബ്രാ ലൈനുകളാണു മാഞ്ഞുതുടങ്ങിയത്. എം.സി. റോഡില് ബേക്കര് ജംങ്ഷന് മുതല് കുമാരനല്ലൂര്വരെയെങ്കിലും സീബ്രാ ലൈനുകള് വരയ്ക്കണമെന്നാണു പ്രധാന ആവശ്യം. തിരക്കേറിയ ഈ റോഡില് നിലവില് സീബ്രാലൈനുകളില്ല. റോഡ് നവീകരണം നടക്കുകയാണെങ്കിലും കാല്നട യാത്രികരുടെ സൗകര്യാര്ത്ഥം സീബ്രാ ലൈനുകള് വേണമെന്നാണ് ആവശ്യം ഉയരുന്നത്. സിഎംഎസ് ഹൈസ്കൂളിന് മുന്പിലെ സീബ്രാ ലൈനുകള് മാഞ്ഞുപോയതിനാല് വിദ്യാര്ത്ഥികളും നാട്ടുകാരും ജീവന്പണയം വച്ചാണ് റോഡ് മറികടക്കുന്നത്. അമിതവേഗതയിലൂടെ വാഹനങ്ങള് പോകുന്ന ഈ റോഡിലൂടെ വിദ്യാര്ത്ഥികള് റോഡ് മുറിച്ചു കടക്കുന്നത് നിത്യസംഭവമാണ്. സ്കൂള് സമയം ആരംഭിക്കുമ്പോഴും സ്കൂള് വിടുമ്പോളും വിദ്യാര്ത്ഥികളെ സഹായിക്കുവാന് പോലീസിന്റെ സഹായം ഇവിടെ ഉണ്ടായിരുന്നുവെങ്കിലും ഇപ്പോള് അത് നിര്ത്തിയിരിക്കുകയാണ്. ഇത് പുനരാരംഭിക്കണമെന്നും സീബ്രാലൈന് തെളിച്ച് വരയ്ക്കണമെന്നുമാണ് നാട്ടുകാരും രക്ഷകര്ത്താക്കളും ആവശ്യപ്പെടുന്നത്. ചൂട്ടുവേലി, എസ്.എച്ച്. മൗണ്ട്, കുമാരനല്ലൂര് ഭാഗങ്ങളിലും സീബ്രാ ലൈനുകള് വേണമെന്ന ആവശ്യം ശക്തമായിട്ടുണ്ട്.
ദിവസവും നൂറു കണക്കിന് ആളുകള് എത്തുന്ന നാഗമ്പടം ബസ് കാത്തിരിപ്പിനു മുന്പിലും സീബ്രാ ലൈനുകള് വേണമെന്ന ആവശ്യം ശക്തമാണ്. ട്രെയിനിനും െ്രെപവറ്റ് ബസ് സ്റ്റാന്ഡിലും വന്നിറങ്ങുന്ന യാത്രികര് റോഡ് മുറിച്ച്കടക്കാന് നന്നേ വിഷമിക്കുന്നു. നഗരത്തിലെ റോഡുകളിലെ സീബ്രാലൈനുകള് മാഞ്ഞുപോയതിനാല് മറ്റ് ജില്ലകളില് നിന്നെത്തുന്ന യാത്രികരാണ് റോഡ് മുറിച്ച് കടക്കുന്നതില് ഏറെ ബുദ്ധിമുട്ട് അനുഭവിക്കുന്നതില് ഏറെയും. സീബ്രാ ലൈനുകള് എവിടെയെന്ന് ഇത്തരക്കാര്ക്ക് അറിയില്ലാത്തതിനാല് ഏതു വിധേയേനയും റോഡ് മുറിച്ച്കടക്കാന് ശ്രമിക്കുന്നത് അപകടത്തിനും കാരണമാകുന്നു.
പ്രതികരിക്കാൻ ഇവിടെ എഴുതുക: