ആലപ്പുഴ: വായനാദിന വാരാചരണത്തിന്റെ ഭാഗമായി ജില്ലയില് വിപുലമായ പരിപാടികള് സംഘടിപ്പിക്കും. ജില്ലാതല ഉദ്ഘാടനം അമ്പലപ്പുഴയില് പി.എന്. പണിക്കര് സ്മാരക എല്.പി. സ്കൂളില് ഇന്നു രാവിലെ 10ന് മന്ത്രി ജി. സുധാകരന് ജില്ലാതല വായന വാരാഘോഷ പരിപാടികള് ഉദ്ഘാടനം ചെയ്യും. ഉദ്ഘാടന വേദിയില് നിന്ന് പി.എന്. പണിക്കര് ഫൗണ്ടേഷന്റെ നേതൃത്വത്തിലുള്ള ജന് വിജ്ഞാന് വികാസ് യാത്രയുടെ ജില്ലാതല പര്യടനത്തിന് തുടക്കമാകും. 20ന് സ്കൂള് അസംബ്ലിയില് വായനദിന പ്രതിജ്ഞ എടുക്കുന്നതിനുള്ള നിര്ദ്ദേശം ജില്ലാ കളക്ടര് വിദ്യാഭ്യാസ വകുപ്പിന് നല്കി. വായനവാരാചരണത്തിന്റെ ഭാഗമായി സെമിനാര്, വായനാ അനുഭവം പങ്കുവയ്ക്കല്, കവിയരങ്ങ്, ചിത്രരചന മത്സരം(താലൂക്ക് തലത്തില്), സാംസ്കാരിക നായകന്മാരുമായി സംവാദം, പുസ്തക കോര്ണര്, വിവിധ മത്സരങ്ങള് എന്നിവ സംഘടിപ്പിക്കും.
വായനാദിനവാരാചരണത്തിന്റെ ജില്ലാതല സമാപനം 25ന് ഉഴുവ ഗവ. യുപി സ്കൂളില് നടക്കും. പി.എന്. പണിക്കര് സ്മാരക പുരസ്ക്കാര വിതരണവും വിവിധ മത്സര വിജയികള്ക്കുള്ള സമ്മാന വിതരണവും നടക്കും. ജില്ലാ അക്ഷയ കേന്ദ്രത്തിന്റെ ആഭിമുഖ്യത്തില് ഫേസെഴുത്ത് കവിതാരചനാ മത്സരം സംഘടിപ്പിക്കും.
20 മുതല് 25 വരെ വാരാചരണ കമ്മറ്റിയുടെ സഹകരണത്തോടെ മാരാരിക്കുളം സെന്റ് അഗസ്റ്റിന് ഹൈസ്കൂള്, തുമ്പോളി സെന്റ് തോമസ് സ്കൂള്, അര്ത്തുങ്കല് അരയശ്ശേരി സ്കൂള്, കലവൂര് ലിറ്റില് ഫല്വര് സ്കൂള്, പൊള്ളേത്തൈ സെന്റ് ജോസഫ്സ് സ്കൂള് എന്നിവിടങ്ങളില് ഉപന്യാസ രചന, ക്വിസ് മത്സരം, ചിത്രരചന മത്സരം, പ്രസംഗ മത്സരം, കുഞ്ഞിക്കൈയില് ഒരു പുസ്തകം തുടങ്ങിയ പരിപാടികള് മാരാരിക്കുളം സബര്മതി ചാരിറ്റബിള് സൊസൈറ്റി സംഘടിപ്പിക്കും.
അലപ്പുഴ എസ്ഡി കോളജും എന്എസ്എസ് യൂണിറ്റും ചേര്ന്ന് പി.എന്. പണിക്കരുടെ ജന്മദേശമായ നീലംപേരൂരിലേയ്ക്ക് യാത്ര സംഘടിപ്പിക്കും. കുടുംബശ്രീയുടെ നേതൃത്വത്തില് എല്ലാ സിഡിഎസുകളിലും ബാലസഭകളിലും പുസ്തക വായന സംഘടിപ്പിക്കും. ജില്ലാ സാക്ഷരതാ മിഷന്റെ ആഭിമുഖ്യത്തില് 25 ന് പി.എന്. പണിക്കരുടെ ഗൃഹത്തില് സാഹിത്യസംവാദം സംഘടിപ്പിക്കും. കൂടാതെ മാവേലിക്കര സബ്ജയിലില് 22ന് ജയില് സാക്ഷരതാ പരിപാടി സംഘടിപ്പിക്കും.
പ്രതികരിക്കാൻ ഇവിടെ എഴുതുക: