മുക്കം: ഹൈക്കോടതി വാഹന പാര്ക്കിംഗ് പാടില്ലെന്ന് നിര്ദ്ദേശിച്ചിടത്ത് നഗരസഭയുടെ വക ടാക്സിസ്റ്റാന്റ്. മുക്കം അങ്ങാടിയില് മെയിന് റോഡില് അഭിലാഷ് ജംഗ്ഷനും പോസ്റ്റ്ഓഫീസ് ജംഗ്ഷനും ഇടയില് കാരശ്ശേരി സൂപ്പര്മാര്ക്കറ്റിനു മുന്നിലാണ് പുതുതായി ഓട്ടോ ഗുഡ്സ് വാഹനങ്ങള്ക്ക് സ്റ്റാന്റ് അനുവദിച്ചത്. മുക്കം നഗരസഭ ഓട്ടോ ഗുഡ്സ്സ്റ്റാന്റ് എന്ന ബോര്ഡ് ചൊവ്വാഴ്ചയാണ് നഗരസഭ അധികൃതര് ഇവിടെ സ്ഥാപിച്ചത്. ഇടതുമുന്നണിയാണ് നഗരസഭയുടെ ഭരണം നടത്തുന്നത്.
കാരശേരി സൂപ്പര്മാര്ക്കറ്റിന്റെ മുന്വശത്ത് 20 അടി വീതിയില് സ്ഥലംവിട്ടു മാത്രമേ പാര്ക്കിംഗ് പാടുള്ളൂ എന്നും ഇക്കാര്യം പോലീസ് ഉറപ്പു വരുത്തണമെന്നും കേരള ഹൈക്കോടതി നിര്ദ്ദേശം നിലവിലുണ്ട്. കോടതി നിര്ദ്ദേശപ്രകാരം പോലീസ് ഈ സ്ഥാപനത്തിന്റെ മുന്നില് 20 അടി വീതിയില് സ്ഥലം അളന്നു മാര്ക്കു ചെയ്തു നല്കുകയും അതിനകത്ത് സ്ഥാപിച്ചിരുന്ന കൊടിയും ബോര്ഡും മറ്റും എടുത്തുമാറ്റുകയും അവിടെ പാര്ക്കിംഗ് അരുതെന്ന് വാഹനജീവനക്കാര്ക്ക് നിര്ദ്ദേശം നല്കുകയും ചെയ്തിരുന്നു. എന്നാല് പോലീസിന്റെയും കോടതിയുടെയും വിലക്ക് ലംഘിച്ചാണ് ഇപ്പോള് അതേ സ്ഥലത്ത് നഗരസഭ സ്റ്റാന്റ് അനുവദിച്ച് ബോര്ഡ് സ്ഥാപിച്ചത്.
പൊതുറോഡിലെ അനധികൃത പാര്ക്കിംഗും കയ്യേറ്റങ്ങളും ഒഴിപ്പിച്ച് ട്രാഫിക് സംവിധാനം പരിഷ്കരിച്ച് കുററമറ്റ നിലയില് നടപ്പാക്കാനുള്ള നടപടി ഒരു ഭാഗത്ത് ആരംഭിച്ചതിനിടെയാണ് മറുഭാഗത്ത് നിയമലംഘനത്തിലൂടെ പ്രധാന റോഡിന്റെ ഒരു ഭാഗം ടാക്സി സ്റ്റാന്റാക്കി മാറ്റിയിരിക്കുന്നത്.
പ്രതികരിക്കാൻ ഇവിടെ എഴുതുക: