കോട്ടയം: നാഗമ്പടം സ്വകാര്യ ബസ്സ്സ്റ്റാന്റിനും റെയില്വേ ലൈനിനും ഇടയിലാണ് ജില്ലാ ഹോമിയോ ആശുപത്രി. കെട്ടിടത്തിന്റെ നാല് ദിക്കുകളിലായുള്ള വ്യത്യസ്ത മാലിന്യങ്ങളില്നിന്ന് ഉയരുന്ന ദുര്ഗ്ഗന്ധം ദുസ്സഹമാണ്. കെട്ടിടത്തിന് മുന്നിലൂടെ കടന്നുപോകുന്ന റയില്വേ ലൈനിന് സമീപത്തെ മലമൂത്ര വിസര്ജ്ജ്യങ്ങളുടെ ഗന്ധം ഒരിടത്ത്. പിന്നിലെ മുറ്റവും പരിസരവും ബസ്സ്സ്റ്റാന്റിലെത്തുന്ന യാത്രക്കാരുടെ ശുചിമുറികളാണ്. പരിസരമാകെ മലമൂത്ര വിസര്ജ്ജ്യങ്ങള് നിറഞ്ഞ് വെള്ളം കെട്ടിനില്ക്കുന്നു. വെള്ളക്കെട്ടില്നിന്നും ഉയരുന്ന ദുര്ഗ്ഗന്ധമാകട്ടെ അസഹനീയവും. വെള്ളവും മലമൂത്ര വിസര്ജ്ജ്യങ്ങളും ഒത്തുചേര്ന്നുള്ള കുഴമ്പ് പരുവത്തിലുള്ള ദ്രാവകത്തില് കൊതുകുകള് മുട്ടയിട്ട് പെരുകി കൊതുകിന്റെ ശല്ല്യവും വളരെ രൂക്ഷം. ഈ ദ്രാവത്തിലേക്ക് വലിച്ചെറിയുന്ന പ്ലാസ്റ്റിക് അടക്കമുള്ള മാലിന്യങ്ങള് വേറെയും. കെട്ടിടത്തിന്റെ ഇടതുവശത്താണ് സമീപ വ്യാപാരികളുടെ ഡംബിംഗ് യാര്ഡ്. ഇവിടെയാണ് ഇവര് മാലിന്യങ്ങള് നിക്ഷേപിക്കുന്നത്. ഈ മാലിന്യം ഇവിടെനിന്നും നീക്കം ചെയ്യുന്നത് വിരളമാണ്. സമീപത്തായി നഗരസഭാ വക ഒരു മാലിന്യ നിര്മ്മാര്ജ്ജന പ്ലാന്റ് ഉണ്ടെങ്കിലും ഇത് പ്രവര്ത്തന രഹിതമാണ്. മാലിന്യ കൂമ്പാരത്തിലെ ഭക്ഷണ പദാര്ത്ഥങ്ങള് അടക്കമുള്ള ജൈവമാലിന്യങ്ങള് അഴുകി ദുര്ഗ്ഗന്ധം പ്രദേശമാകെ വ്യാപിക്കുന്നുണ്ട്. ഈ പ്രദേശത്തെ മലമൂത്ര വിസര്ജ്ജനവും മാലിന്യ നിക്ഷേപവും ഇല്ലാതാക്കാന് അധികൃതരുടെ കനിവുണ്ടാകണം എന്നുമാത്രമാണ് ജനങ്ങള് ആഗ്രഹിക്കുന്നത്.
പ്രതികരിക്കാൻ ഇവിടെ എഴുതുക: