വാഷിങ്ടണ്: തന്ത്രപ്രധാന ഇ മെയില് സന്ദേശങ്ങള് അലക്ഷ്യമായി കൈകാര്യം ചെയ്തു എന്ന ആരോപണത്തില് ഹിലരി ക്ലിന്റനെതിരെ കുറ്റം ചുമത്തേണ്ടെന്ന് അമേരിക്കന് രഹസ്യാന്വേഷണ ഏജന്സിയായ എഫ്ബിഐ തീരുമാനിച്ചു. രാജ്യസുരക്ഷയെ ബാധിക്കുന്ന ഇമെയില് വിവരങ്ങള് അലക്ഷ്യമായി കൈകാര്യം ചെയ്തു എന്നായിരുന്നു ഡെമോക്രാറ്റിക് പാര്ട്ടിയുടെ അമേരിക്കന് പ്രസിഡന്റ് സ്ഥാനാര്ത്ഥിയായ മിസിസ് ക്ലിന്റന് എതിരായ ആരോപണം.
2009-2013 കാലയളവില് ഹിലരി ക്ലിന്റന് വിദേശകാര്യ സെക്രട്ടറിയായിരിക്കെ രാജ്യസുരക്ഷ സംബന്ധിച്ച തന്ത്രപ്രധാന വിവരങ്ങള് അലക്ഷ്യമായി കൈകാര്യം ചെയ്തു എന്നായിരുന്നു ആരോപണം. അതീവ രഹസ്യ സ്വഭാവമുള്ള വിവരങ്ങളടങ്ങിയ ഇ മെയിലുകള് മിസിസ് ക്ലിന്റന് സ്വകാര്യ ഇ മെയില് അക്കൗണ്ട് ഉപയോഗിച്ച് കൈകാര്യം ചെയ്തു എന്നതായിരുന്നു ഏറ്റവും പ്രധാനപ്പെട്ട ആരോപണം.
ഡെമോക്രാറ്റിക് പാര്ട്ടിയുടെ അമേരിക്കന് പ്രസിഡന്റ്് സ്ഥാനാര്ത്ഥിത്വം ഉറപ്പിച്ച ഹിലരിക്കെതിരെ ഈ ആരോപണം രാഷ്ട്രീയ എതിരാളികള് ഗൗരവമായി ഉപയോഗിക്കുകയും ചെയ്തിരുന്നു. ഈ സാഹചര്യത്തിലാണ് ഹിലരിക്ക് ആശ്വാസമായി എഫ്ബിഐയുടെ തീരുമാനം വരുന്നത്. ഹിലരിക്കെതിരെ കുറ്റം ചുമത്തേണ്ട സാഹചര്യമില്ലെന്ന് എഫ്ബിഐ ഡയറക്ടര് ജെയിംസ് കോമി പറഞ്ഞു.
അതേസമയം സുപ്രധാന വിവരങ്ങള് കൈകാര്യം ചെയ്യുന്നതില് ഹിലരിക്ക് ജാഗ്രതയില്ലായിരുന്നുവെന്നും അദ്ദേഹം പറഞ്ഞു. എന്നാല് രാജ്യത്തെ നിയമങ്ങള് മിസിസ് ക്ലിന്റന് ലംഘിച്ചതായി കണ്ടെത്തിയില്ല. കഴിഞ്ഞയാഴ്ച എഫ്ബിഐ ആസ്ഥാനത്ത് ഹിലരിയെ എഫ്ബിഐ സംഘം മൂന്നുമണിക്കൂറിലേറെ ചോദ്യം ചെയ്തിരുന്നു. എന്നാല് ഹിലരി സ്വമേധയാ എഫ്ബിഐക്ക് മുമ്പില് ഹാജരായി മൊഴി നല്കുകയായിരുന്നു എന്നാണ് അവരുടെ പ്രചാരണവിഭാഗം വക്താവ് നിക് മെറിലിന്റെ വിശദീകരണം.
പല സെര്വറുകളില് നിന്നും പല ഗാഡ്ഗെറ്റുകളിലൂടെ മാറിമാറി ഹിലരി ഔദ്യോഗിക ഇ മെയില് ഉപയോഗിച്ചിരുന്നതായും തന്ത്രപ്രധാന രേഖകള് സ്വകാര്യസെര്വറിലേക്ക് മാറ്റിയിരുന്നതായും എഫ്ബിഐ കണ്ടെത്തി. തന്ത്രപ്രധാന വിവരങ്ങളടങ്ങിയ നൂറിലേറെ ഇ മെയിലുകള് സ്വകാര്യ സെര്വറില് നിന്ന് കണ്ടെത്തി. ഇത് ശത്രുക്കള്ക്ക് എളുപ്പത്തില് കണ്ടെത്താമായിരുന്നു എന്നകാര്യം ഹിലരി ശ്രദ്ധിച്ചില്ല.
അതേസമയം അന്വേഷണസംഘത്തില് നിന്ന് മറച്ചുവയ്ക്കാനായി ഹിലരി ഈ ഇമെയിലുകള് ഡിലീറ്റ് ചെയ്തിരുന്നില്ലെന്നും ജെയിംസ് കോമി പറഞ്ഞു. ഏതായാലും പ്രോസിക്യൂഷന് നടപടികളില്നിന്ന് ഒഴിവായത് റിപ്പബ്ലിക്കന് സ്ഥാനാര്ത്ഥി ഡൊണാള്ഡ് ട്രംപുമായി അവസ്സാനവട്ട പോരാട്ടത്തിനിറങ്ങുന്ന ഹിലരിക്ക് തുണയാകും.
പ്രതികരിക്കാൻ ഇവിടെ എഴുതുക: