ആലപ്പുഴ: ആലപ്പുഴ കെഎസ്ആര്ടിസി സ്റ്റാന്ഡിനു സമീപത്തെ ഓട്ടോറിക്ഷാ സ്റ്റാന്ഡിലെ പ്രീപെയ്ഡ് കൗണ്ടര് നോക്കുകുത്തിയായി. പ്രീപെയ്ഡ് കൗണ്ടര് സ്ഥാപിക്കുന്നതിന് മുറി നിര്മ്മിച്ചിട്ട് രണ്ടുവര്ഷംകഴിഞ്ഞെങ്കിലും ഇതുവരെയും പ്രവര്ത്തനം ആരംഭിച്ചിട്ടില്ല.
സ്റ്റാന്ഡ് കേന്ദ്രീകരിച്ചുള്ള ഓട്ടോ, ടൂറിസ്റ്റ് ടാക്സി ഡ്രൈവര്മാര് അമിതചാര്ജ് വാങ്ങുന്നതായി പരാതി നിരവധിയാണ്. ചിലര് അതിക്രമങ്ങള് കാട്ടുന്നതായും പരാതി ഉയര്ന്നിട്ടുണ്ട്. ഇതിനാല് രാത്രികാലങ്ങളില് സ്ത്രീകള്ക്ക് ഓട്ടോറിക്ഷയില് സഞ്ചരിക്കാന്പോലും ഭയമാണ്.
ചോദ്യം ചെയ്താല് അപമര്യാദയായി പെരുമാറുന്നതും അസഭ്യം പറയുന്നതും പതിവാണ്. സ്ത്രീകള് സഞ്ചരിക്കുന്ന ഓട്ടോറിക്ഷയുടെ മുന്സീറ്റില് ഡ്രൈവര്മാരുടെ കൂടെ അപരിചിതരായവരെ കയറ്റിയിരുത്തുന്നതും പതിവാണ്. ഇത്തരം അതിക്രമങ്ങള് ഒഴിവാക്കാന് ഓട്ടോ സ്റ്റാന്ഡിലെ പ്രീപെയ്ഡ് കൗണ്ടര് കാര്യക്ഷമമായി തുറന്നു പ്രവര്ത്തിക്കണമെന്ന് വലിയമരം വാര്ഡ് ആക്ഷന് കൗണ്സില് ആവശ്യപ്പെട്ടു.
പ്രതികരിക്കാൻ ഇവിടെ എഴുതുക: