ആലപ്പുഴ: മത്സ്യത്തൊഴിലാളികളെ വെടിവെച്ചുകൊന്ന സംഭവത്തില് കര്ദിനാള് ആലഞ്ചേരി ഇറ്റലിക്കാരോടൊപ്പം നിന്നതിന് കേരള സ്വതന്ത്ര മത്സ്യത്തൊഴിലാളി ഫെഡറേഷന് രംഗത്തെത്തി. മത്സ്യത്തൊഴിലാളി സമൂഹത്തെയും ഇന്ത്യാക്കാരേയും അപമാനിക്കുംവിധം കര്ദിനാള് റോമില് നടത്തിയ പ്രകടനം അങ്ങേയറ്റം പ്രതിഷേധാര്ഹമാണെന്ന് സ്വതന്ത്ര മത്സ്യതൊഴിലാളി ഫെഡറേഷന് ജില്ലാ കമ്മറ്റി പ്രതിഷേധിച്ചു. കര്ദിനാളിന്റെ ഇടപെടല് വേദനാജനകവും നിയമ നടപടികളെ ദുര്ബലപ്പെടുത്തുന്നതുമാണ്. മനുഷ്യ ജീവന് വിലകല്പിക്കുന്നതില് സമൂഹം കാണിക്കുന്ന വേര്തിരിവാണ് പ്രസ്താവനയില് നിന്ന് വ്യക്തമാകുന്നത്.
സമൂഹത്തിന്റെ പുറംപോക്കില് ജീവിക്കുകയും ഖജനാവിലേക്ക് ആയിരം കോടിയിലേറെ വിദേശനാണ്യം നേടിത്തരുകയും രാജ്യസുരക്ഷയില് നിര്ണായാ പങ്കുവഹിക്കുകയും ചെയ്യുന്ന മത്സ്യതൊഴിലാളികളുടെ ജീവന് വിലകല്പിക്കാത്ത കര്ദിനാള് തീരദേശവാസികളുടെ ചരിത്രം പഠിക്കണമെന്ന് ഫെഡറേഷന് ആവശ്യപ്പെട്ടു. സെക്രട്ടറി ജാക്സണ് പൊള്ളയില്, ബാബു, ആന്റണി ആറാട്ടുവഴി, പോള് എഴുപുന്ന എന്നിവര് സംസാരിച്ചു.
പ്രതികരിക്കാൻ ഇവിടെ എഴുതുക: