കണ്ണൂര്: കണ്ണൂര് സര്വ്വകലാശാല നാഷണല് സര്വ്വീസ് സ്കീം പുതിയ ഒരു കൂട്ടം പരിപാടികള് നടപ്പിലാക്കുന്നു. പുതുതായി എന്എസ്എസില് ചേരുന്ന ഓരോ വളണ്ടിയര്ക്കും ഇതാദ്യമായി ഒരു വര്ക്ക് ഡയറി നല്കുന്നു. എന്എസ്എസ്സുമായി ബന്ധപ്പെട്ടു ചെയ്യുന്ന എല്ലാ വര്ക്കുകളും ഡയറിയില് രേഖപ്പെടുത്താന് പറ്റുന്ന രീതിയിലാണ് ഡയറി രൂപകല്പന ചെയ്തിട്ടുള്ളത്. കൂടാതെ കോളേജുകളില് നിന്നും പ്രതിമാസ പ്രോഗ്രസ് റിപ്പോര്ട്ട് അയക്കുന്നതിന് സോഫ്റ്റ്വെയര് തയ്യാറാക്കിയിട്ടുമുണ്ട്. കാലതാമസം കൂടാതെ റിപ്പോര്ട്ടുകള് അയക്കുന്നതിന് സര്വ്വകലാശാല വെബ്സൈറ്റിലുള്ള പ്രത്യേക ലിങ്ക് കോളേജുകള്ക്ക് ഉപയോഗിക്കാവുന്ന രീതിയിലാണിത്.
സര്വ്വകലാശാലയിലെ എന്എസ്എസ് വളണ്ടിയര്മാരെ മാത്രം ഉള്പ്പെടുത്തിക്കൊണ്ട് കഴിഞ്ഞവര്ഷം നടത്തിയ എന്എസ്എസ് കലോല്സവം വന്വിജയമായിരുന്നു. കേരളത്തിലെ സര്വ്വകലാശാലകളില് ആദ്യമായി നടത്തിയ കലോല്സവം ഇത്തവണ മത്സരാടിസ്ഥാനത്തില് നടത്തുന്നതിന് ആലോചനയുണ്ട്. കൂടാതെ കായിക മത്സരം നടത്താനും പദ്ധതിയുണ്ട്.
സര്വ്വകലാശാലയുടെ കീഴിലുള്ള കോളേജുകളിലെ എന്എസ്എസ് യൂണിറ്റുകള് ‘ഓണത്തിനൊരുവീട്’ എന്ന പദ്ധതിയില് ഇപ്രാവശ്യം രണ്ട് വീട് നിര്മ്മിച്ചു നല്കും ഓരോ എന്.എസ്.എസ് യൂണിറ്റിനും 5000 രൂപ വീതം സമാഹരിച്ച് വീട് നിര്മ്മിക്കുന്ന യൂണിറ്റിനു നല്കുകയും ബാക്കി വരുന്നതുക വീട് നിര്മ്മിക്കുന്ന യൂണിറ്റ് കണ്ടെത്തുകയുമാണ് ചെയ്യുക. കഴിഞ്ഞ വര്ഷം എന്എസ്എസ് യൂണിറ്റുകള് ദുര്ബലവിഭാഗങ്ങള്ക്കായി 6 വീട് നിര്മ്മിച്ചു നല്കി മാതൃകയായി. കൂടാതെ സിപിസിആര്ഐയുടെ ആഭിമുഖ്യത്തില് ഓരോ എന്എസ്എസ് യൂണിറ്റിനും 100 ഗ്രോ ബാഗുകള് നല്കും. ഇവ ഓരോ യൂണിറ്റിലേയും ഓരോ വളണ്ടിയര്ക്ക് പച്ചക്കറിനട്ട് പരിപാലിക്കുന്നതിനായി തയ്യാറാക്കിയിട്ടുള്ളതാണ്. സര്വ്വകലാശാലയിലെ 80 യൂണിറ്റുകള്ക്കും 100 വീതം ഗ്രോ ബാഗുകള് തയ്യാറാക്കി നല്കാന് സിപിസിആര്ഐ സന്നദ്ധത പ്രകടിപ്പിച്ചിട്ടുണ്ട്.
എന്എസ്എസ് അഡൈ്വസറി കമ്മറ്റി യോഗത്തില് പ്രൊ.വൈസ് ചാന്സലര് ഡോ.ടി. അശോകന്, രജിസ്ട്രാര് ഡോ.ബാലചന്ദ്രന് കീഴോത്ത്, കണ്ട്രോളര് ഓഫ് ദി എക്സാമിനേഷന് ഡോ.എസ്.പ്രദീപ് കുമാര്, ഫിനാന്സ് ഓഫീസര് ഷാജി ജോസ്, എന്എസ്എസ് റീജിയണല് ഡയറക്ടര് ജി.പി.സജിത്ത് ബാബു, എന്.എസ്.എസ്.ട്രെയിനിംഗ് കോ-ഓര്ഡിനേറ്റര് ഐ.വി.സോമന്, കണ്ണൂര് ആകാശവാണി ഡയറക്ടര് കെ.ബാലചന്ദ്രന്, സര്വ്വകലാശാല എന്.എസ്.എസ് പ്രോഗ്രാം കോ-ഓര്ഡിനേറ്റര് കെ.പി.മുഹമ്മദ് തുടങ്ങിയവര് പങ്കെടുത്തു.
പ്രതികരിക്കാൻ ഇവിടെ എഴുതുക: