ഇസ്ലാമാബാദ്: സഹോദരന് വധിച്ച പാക് മോഡല് ഖന്ദീല് ബലൂച്ച് ഭാരത പൗരത്വം നേടാനാഗ്രഹിച്ചിരുന്നതായി വെളിപ്പെടുത്തല്. തനിക്ക് ഭാരതം പൗരത്വം വേണമെന്ന് മാസങ്ങള്ക്ക് മുമ്പ് ഇവര് ട്വീറ്റ് ചെയ്തിരുന്നു. പാകിസ്ഥാന് തന്നെ നിരാശപ്പെടുത്തുന്നുവെന്നും അതുകൊണ്ട് ഭാരത പൗരത്വം വേണമെന്നുമായിരുന്നു ബലൂച്ചിന്റെ വെളിപ്പെടുത്തല്. തന്റെ ട്വിറ്റീല് അവര് പ്രധാനമന്ത്രി നരേന്ദ്ര മോദിയെയും ടാഗ് ചെയ്തിരുന്നു.
പാകിസ്ഥാനില് ആരും തന്നെ അംഗീകരിക്കുന്നില്ലെന്ന്് കൊല്ലപ്പെടുന്നതിന് ദിവസങ്ങള്ക്ക് മുമ്പ് ഒരു അഭിമുഖത്തിലും ഇവര് പറഞ്ഞു. അതേസമയം, ഭാരതത്തില് ജോലി ചെയ്യാന് എളുപ്പമായിരിക്കുമെന്നും അവര് കൂട്ടിച്ചേര്ത്തു. ഇവര് ബിഗ് ബോസ് 10ന്റെ ഭാഗമാകാന് പോകുന്നുവെന്നും വാര്ത്തകള് പുറത്ത് വന്നിരുന്നു. എന്നാല്, ഇക്കാര്യം സ്ഥിരീകരിച്ചിരുന്നില്ല. ബിഗ്ബോസിന്റെ നിര്മാതാക്കള് തന്റെ നിബന്ധനകള് അംഗീകരിച്ചാല് താന് പരിപാടിയില് പ്രത്യക്ഷപ്പെടുമെന്നും ഇവര് ട്വീറ്റ് ചെയ്തിരുന്നു.
ഇവര്ക്ക് സ്വന്തം കുടുംബത്തില് നിന്ന് വലിയ ഭീഷണിയുണ്ടായിരുന്നു. അടുത്തിടെ ഇവരുടെ ഒരു സംഗീത വീഡിയോയും നിരോധിച്ചിരുന്നു. തനിക്ക് സംരക്ഷണം വേണമെന്ന് കാട്ടി ബലൂച്ചി ഫെഡറല് അന്വേഷണ ഏജന്സി മേധാവിക്കും ഇസ്ലാമാബാദിലെ സീനിയര് സൂപ്രണ്ടിനും കത്ത് നല്കിയിരുന്നു. സുരക്ഷാ ഭീഷണിയുളളതിനാല് താന് വിദേശത്തേക്ക് പോകാന് ആലോചിക്കുന്നുവെന്നും ഫൗസിയ അസീം എന്ന ബലൂച്ച് വ്യക്തമാക്കിയിരുന്നു.
പ്രതികരിക്കാൻ ഇവിടെ എഴുതുക: