കണ്ണൂര്: വിരമിച്ച ജീവനക്കാരന്റെ പെന്ഷന് ആനുകൂല്യം ഓഫീസിലെ ജീവനക്കാര് പിടിച്ചുവെക്കുന്നതായി പരാതി. തോട്ടട ഇഎസ്ഐ ആശുപത്രിയില് നിന്നും വിരമിച്ച ചേലോറ സ്വദേശി കെ.ഹരീന്ദ്രനാണ് ഓഫീസ് ജീവനക്കാര്ക്കെതിരേ ഇന്ഷ്വറന്സ് മെഡിക്കല് സര്വീസ് ഡയറക്ടര്, കളക്ടര് എന്നിവര്ക്കു പരാതി നല്കിയത്. 2014 നവംബറില് സര്വീസില് നിന്നും വിരമിച്ച ഹരീന്ദ്രന് 2014 ജൂലൈ ഒന്നിനു നിലവില് വന്ന പുതുക്കിയ ശമ്പളപരിഷ്കരണ പ്രകാരമുള്ള പെന്ഷന് ലഭിക്കണം. എന്നാല് ഇതുമായി ബന്ധപ്പെട്ട നടപടികള് തോട്ടട ഇഎസ്ഐ ആശുപത്രി ഓഫീസിലെ ഹെഡ്ക്ലര്ക്ക് ഉള്പ്പെടെയുള്ളവര് ചെയ്യുന്നില്ലെന്നാണ് പരാതി. സര്വീസിലിരിക്കെയുള്ള ശമ്പള പരിഷ്കരണവും ഇതിനാനുപാതികമായ പെന്ഷനും ലഭിക്കേണ്ടതുണ്ട്. ഇതുമായി ബന്ധപ്പെട്ട രേഖകള് ശരിയാക്കിത്തരണമെന്നു കാണിച്ചു നിരവധി തവണ ഓഫീസിലുള്ളവരെ സമീപിച്ചെങ്കിലും നിഷേധ നിലപാടാണ് സ്വീകരിക്കുന്നതെന്നു പരാതിയില് പറയുന്നു. ഓഫീസ് ജീവനക്കാര് പെന്ഷന് ആനുകൂല്യം മനപൂര്വം വൈകിപ്പിക്കുകയാണെന്നു കാണിച്ചു ആശുപത്രി സൂപ്രണ്ടിനും പരാതി നല്കിയിരുന്നു. എന്നാല് സൂപ്രണ്ടിന്റെ ഭാഗത്തു നിന്നും നടപടി ഉണ്ടായില്ലെന്ന് ഇന്ഷ്വറന്സ് മെഡിക്കല് സര്വീസ് ഡയറക്ടര്, കളക്ടര് എന്നിവര്ക്കു നല്കിയ പരാതിയില് ചൂണ്ടിക്കാട്ടുന്നു.
പ്രതികരിക്കാൻ ഇവിടെ എഴുതുക: