കണ്ണൂര്: തദ്ദേശസ്വയംഭരണ സ്ഥാപനങ്ങളിലെ ആരോഗ്യ അനുബന്ധ മേഖലകളില് പ്രൊജക്ടുകള് തയ്യാറാക്കാനുളള ആശയങ്ങളെക്കുറിച്ച് ചര്ച്ച ചെയ്യുന്നതിനായി ബ്ലോക്ക്, ഗ്രാമപഞ്ചായത്ത് പ്രസിഡണ്ടുമാര്, ആരോഗ്യകാര്യ സ്ഥിരംസമിതി അധ്യക്ഷന്മാര്, ആശുപത്രി സൂപ്രണ്ടുമാര്, സിഎച്ച്സി/പിഎച്ച്സി മെഡിക്കല് ഓഫീസര്മാര് എന്നിവര്ക്കായി ആരോഗ്യവകുപ്പ് ശില്പശാല സംഘടിപ്പിച്ചു. ശില്പശാല കലക്ടറേറ്റ് ഓഡിറ്റോറിയത്തില് ജില്ലാ പഞ്ചായത്ത് ആരോഗ്യ വിദ്യാഭ്യാസ സ്ഥിരം സമിതി അധ്യക്ഷന് കെ.പി.ജയബാലന് ഉദ്ഘാടനം ചെയ്തു. ഡിഎംഒ ഡോ.പി.കെ. ബേബി അധ്യക്ഷത വഹിച്ചു. ജൂനിയര് അഡ്മിനിസ്ട്രേറ്റീവ് മെഡിക്കല് ഓഫീസര് ഡോ.എന്.എന്.പമീലി വിഷയം അവതരിപ്പിച്ചു.
ആരോഗ്യത്തെ സ്വാധീനിക്കുന്ന ഘടകങ്ങളുമായി ബന്ധപ്പെട്ട പുതിയ പ്രൊജക്ടുകള് കൂടുതലായി കണ്ടെത്തല്, പ്രൊജക്ടിനനുസരിച്ച് ധനകാര്യ വിശകലനവും ധനസ്രോതസ്സുകളും തയ്യാറാക്കല്, പഞ്ചായത്ത് വികസന ഫണ്ടിന് പുറമെ വിവിധ വകുപ്പുകള്, മിഷനുകള്, ഏജന്സികള്, സ്പോണ്സര്ഷിപ്പുകള് തുടങ്ങിയവയില് നിന്നും വിഭവസ്രോതസ്സ് കണ്ടെത്തല് എന്നീ കാര്യങ്ങളില് ജനപ്രതിനിധികളുടെയും മെഡിക്കല് ഓഫീസര്മാരുടെയും സജീവമായ ഇടപെടല് ഉറപ്പാക്കുകയാണ് ശില്പശാലയുടെ ലക്ഷ്യം. ശില്പശാലയോടനുബന്ധിച്ച് ദേശീയ വിരശല്യ നിവാരണദിന പരിപാടിയെക്കുറിച്ച് ജില്ലാ ആര്സിഎച്ച് ഓഫീസര് ഡോ.പി.എം.ജ്യോതിയും ഡിഫ്തീരിയ പ്രതിരോധ പ്രവര്ത്തനങ്ങളെക്കുറിച്ച് സര്വൈലന്സ് മെഡിക്കല് ഓഫീസര് ഡോ.ആര്.ശ്രീനാഥും സംസാരിച്ചു. ഡെപ്യൂട്ടി ഡിഎംഒ ഡോ.എം.കെ.ഷാജ് സ്വാഗതവും ടെക്നിക്കല് അസി.പി.സുനില്ദത്തന് നന്ദിയും പറഞ്ഞു.
പ്രതികരിക്കാൻ ഇവിടെ എഴുതുക: