മുക്കം: നാടും നഗരവും പനിച്ച് വിറക്കുമ്പോള് സര്ക്കാര് ഡോക്ടര്മാര് ഡ്യൂട്ടി സമയത്തും സ്വകാര്യ പ്രാക്ടീസില് .മലയോര മേഖലയില് ഡിഫ്തീരിയ, ഡെങ്കിപ്പനി,പകര്ച്ച പനി തുടങ്ങിയവ പടര്ന്നു പിടിക്കുമ്പോഴാണ് ഡ്യൂട്ടി സമയത്ത് ഡോക്ടര് മാര് മുങ്ങി സ്വകാര്യ പ്രാക്ടീസ് നടത്തുന്നത്.ഇന്നലെ മുക്കം സി എച്ച്സിയില് 300 ഓളം രോഗികള് പരിശോധനക്കായി കാത്തു നില്ക്കുമ്പോള് മുങ്ങിയ ഡോക്ടറെ നാട്ടുകാര് കയ്യോടെ പിടികൂടി. ഇന്നലെ രാവിലെ 11 മണിയോടെയാണ് സംഭവം. 6 ഓളം ഡോക്ടര്മാരുള്ള മുക്കത്ത് ഇന്നലെ 2 പേര് മാത്രമാണ് ഉണ്ടായിരുന്നത്. 300 ല് പരം രോഗികളും ഇവിടെ ചികിത്സക്കായെത്തിയിരുന്നു.
രാവിലെ ഏതാനും രോഗികളെ പരിശോധിച്ച ശേഷം ഒരു ഡോക്ടര് മെല്ലെ ഇറങ്ങിപ്പോയി. ചായ കുടിക്കാനായിരിക്കുമെന്ന് കരുതി രോഗികളും ഒപ്പമുളളവരും ഏറെ നേരം കാത്തിരുന്നങ്കിലും ഡോക്ടര് തിരിച്ചു വന്നില്ല. അപ്പോഴാണ് എല്ലു രോഗവിദഗ്ധന് കൂടിയായ ഡോക്ടര് ആശുപത്രിയുടെ 50 മീറ്റര് അകലെയുളള തന്റെ വീട്ടില് രോഗികളെ പരിശോധിക്കുന്നത് ശ്രദ്ധയില് പെട്ടത്.ഇതില് ക്ഷുഭിതരായ രോഗികളും കൂട്ടിനു വന്നവരും പ്രതിഷേധവുമായി രംഗത്ത് വരികയായിരുന്നു. നിരവധി പേര് വന്നതോടെ സ്ഥലത്ത് സംഘര്ഷാവസ്ഥയും നിലനിന്നു.ഇതോടെ ഭയപ്പെട്ട ഡോക്ടര് സ്വകാര്യ പ്രാക്ടീസ് നിര്ത്തിവെച്ച് ആശുപത്രിയില് തന്നെ എത്തുകയായിരുന്നു. സംഭവം വിവാദമായതോടെ മറ്റു മൂന്നു ഡോക്ടര് മാര് കൂടി ആശുപത്രിയിലെത്തുകയും ചെയ്തു. മുക്കം പോലീസ് സ്ഥലത്തെത്തിയാണ് രംഗം ശാന്തമാക്കിയത്. ദിവസവും നൂറുകണക്കിന് രോഗികള് ആശ്രയിക്കുന്ന മുക്കം സി എച്ച് സി യില് ആവശ്യത്തിന് ഡോക്ടര്മാരും പാരാമെഡിക്കല് സ്റ്റാഫും ഇല്ലാത്തപ്പോഴാണ് ഉളള ഡോക്ടര്മാര് രോഗികളെ പരിശോധിക്കാതെ സ്വകാര്യ പ്രാക്ടീസ് നടത്തുന്നത്. മലയോര മേഖലയിലെ 5 ഓളംപഞ്ചായത്തുകളിലെ ജനങ്ങളുടെ ഏക ആശ്രയമാണീ സര്ക്കാര് ആതുരാലയം.നിലവില് ഉള്ള ആറ് ഡോക്ടര്മാര് രോഗികളെ പരിശോധിച്ചാല് തന്നെ മണിക്കൂറുകള് കാത്തു നിന്നെങ്കില് മാത്രമേ ഡോക്ടറെ കാണാനും മരുന്ന് വാങ്ങാനും പറ്റൂ. ഈ അവസ്ഥയില് വന്ന ഡോക്ടര്മാര് സ്വകാര്യ പ്രാക്ടീസിനായി പോവുക കൂടി ചെയ്യുന്നതോടെ ആശുപത്രിയുടെ പ്രവര്ത്തനം തന്നെ അവതാളത്തിലാവുകയാണ്.
പ്രതികരിക്കാൻ ഇവിടെ എഴുതുക: