ഇരിട്ടി: കീഴൂര്കുന്ന് ഇടിച്ചു നിരത്തുന്നത് ബിജെപി ഇരിട്ടി മുന്സിപ്പല് കമ്മറ്റിയുടെ നേതൃത്വത്തിലെത്തിയ പ്രവര്ത്തകര് തടഞ്ഞു. മുന്സിപ്പല് കമ്മറ്റി പ്രസിഡന്റ് കെ.ശിവശങ്കരന്റെയും ബിജെപി പേരാവൂര് മണ്ഡലം പ്രസിഡണ്ടും മുന്സിപ്പല് കൗണ്സിലറുമായ പി.എന്.രവീന്ദ്രന്റെയും നേതൃത്വത്തിലുള്ള പ്രവര്ത്തകരാണ് സ്ഥലം സന്ദര്ശിച്ച് മണ്ണിടിക്കല് തടഞ്ഞ് സ്ഥലത്ത് കൊടിനാട്ടിയത്.
അതീവ പരിതസ്ഥിതി പ്രാധാന്യമുള്ളതാണ് ഈ കുന്ന്. ഏതാനും മാസങ്ങള്ക്ക് മുന്പ് ഇതേ സ്ഥലത്ത് നിന്നും രാത്രികാലങ്ങളില് മണ്ണിടിക്കുകയും മണ്ണ് തലശ്ശേരി-കുടക് അന്തര്സംസ്ഥാന പാതയുടെ അരികിലെ കുന്നുകളിലെ ചാലില് കൊണ്ടു തള്ളുകയും ചെയ്തിരുന്നു. നൂറുകണക്കിന് ലോഡ് മണ്ണാണ് അന്ന് ഇവിടെ തള്ളിയിരുന്നത്. പ്രതിഷേധവുമായി പരിസ്ഥിതി പ്രവര്ത്തകര് എത്തിയതോടെ അധികൃതര് ഇവര്ക്ക് സ്റ്റോപ്പ് മെമ്മോ നല്കിയിരുന്നു. എന്നാല് ഇത് ലംഘിച്ചുകൊണ്ടാണ് ഇപ്പോള് വീണ്ടും രാത്രിയുടെ മറവില് മണ്ണിടിക്കല് നടന്നു കൊണ്ടിരിക്കുന്നത്.
ഈ കുന്നില് നിന്നാണ് വള്ളിയാട് കീഴൂര് മേഖലയില് വേനല്ക്കാലത്ത് പോലും വറ്റാത്ത വെള്ളമൊഴുകുന്ന കാമിയാട് തോട് ഉത്ഭവിക്കുന്നത്. ഈ നീരുരവയുടെ പ്രഭവസ്ഥാനമായ കുന്നിന്റെ ചാലിലാണ് ഇപ്പോള് ഇവിടെ നിന്നും ഇടിക്കുന്ന മണ്ണ് കൊണ്ടുപോയി തള്ളുന്നതും. ഒരേസമയം തന്നെ കുന്നിടിച്ചു റോഡിന് സമമാക്കുന്നതോടൊപ്പം ഇതിനു എതിര്വശത്തുള്ള കുന്നുകളുടെ ചെങ്കുത്തായ ചാല് മൂടി റോഡിനു സമമാക്കാനുള്ള നീക്കവുമാണ് നടക്കുന്നത്. ചാലില് കൊണ്ടുതള്ളുന്ന മണ്ണ് മുഴുവന് ശക്തമായ മഴ പെയ്യുന്നതോടെ ഇടിഞ്ഞ് ഇതിനു താഴെ വശത്ത് കൂടെ ഒഴുകുന്ന കാമിയാട് തോട് മൂടുകയും ഇതിലൂടെ ചെളി വെള്ളം ഒഴുകി കീഴൂര്, വള്ളിയാട് മേഖലയിലെ കൃഷിയിടങ്ങള് നശിക്കുകയും ചെയ്യും. ഇത് വന് പാരിസ്ഥിതിക പ്രശ്നമാണ് സൃഷ്ടിക്കുക. കൂടാതെ ഈ കുന്നിനു മുകളില് സ്ഥിതിചെയ്യുന്ന മഹാത്മാഗാന്ധി കോളേജ്, നിരവധി വീടുകള് തുടങ്ങിയ ജനവാസ മേഖലയിലെ കുടിവെള്ളത്തിനുള്ള ക്ഷാമവും ഭൂഗര്ഭ ജലത്തിന്റെ അളവിലുണ്ടാവുന്ന നഷ്ടം കാരണം വേനല്ക്കാലങ്ങളില് രൂക്ഷമാകാനും ഇടയുണ്ട്. എന്തു വിലകൊടുത്തും മണ്ണിടിക്കല് തടയുമെന്ന് ബിജെപി പ്രവര്ത്തകര് പറയുന്നു. ബിജെപി ഇരിട്ടി മുന്സിപ്പല് കമ്മിറ്റി പ്രസിഡന്റ് കെ.ശിവശങ്കരന്, മണ്ഡലം പ്രസിഡണ്ട് പി.എന്.രവ്രീന്ദ്രന് എന്നിവരെക്കൂടാതെ ഇരിട്ടി നഗരസഭാ കൗണ്സിലര് സത്യന് കൊമ്മേരി, കെ.ജയപ്രകാശ് പ്രാദേശിക നേതാക്കളായ വി.ശ്രീധരന്, എം.സതീഷ്, കെ.ബാവ, പ്രേമരാജന് തുടങ്ങിയവരും സംഘത്തില് ഉണ്ടായിരുന്നു.
പ്രതികരിക്കാൻ ഇവിടെ എഴുതുക: