ചേര്ത്തല: ചേര്ത്തല നഗരസഭാ ഉപതെരഞ്ഞെടുപ്പില് ബിജെപിക്ക് ചരിത്ര വിജയം. ആഘോഷമാക്കി പ്രവര്ത്തകര്. നഗരസഭ 13-ാം വാര്ഡിലേക്കു നടന്ന ഉപതെരഞ്ഞെടുപ്പില് ബിജെപിയുടെ ജ്യോതിഷ് ഡി. ഭട്ട് 134 വോട്ടുകളുടെ ഭൂരിപക്ഷത്തിനാണ് ജയിച്ചത്. ചേര്ത്തല നഗരസഭയില് ബിജെപിക്ക് ആദ്യമായാണ് പ്രതിനിധിയുണ്ടാകുന്നത്. ആകെയുള്ള 791 വോട്ടുകളില് 662 വോട്ടുകളാണ് പോള് ചെയ്തത്. ജ്യോതിഷിന് 316 വോട്ടുകളും, എല്ഡിഎഫ് സ്ഥാനാര്ത്ഥി ജി. ഗോപിനാഥ പൈക്ക് 182 വോട്ടുകളും ലഭിച്ചു. നഗരം ഭരിക്കുന്ന യുഡിഎഫിന്റെ സ്ഥാനാര്ത്ഥി അജിത് ചാരങ്കാട്ടിന് 164 വോട്ടുകളോടെ മൂന്നാം സ്ഥാനം നേടാന് മാത്രമെ കഴിഞ്ഞുള്ളു.
കഴിഞ്ഞ തെരഞ്ഞെടുപ്പിലും ജ്യോതിഷ് ആയിരുന്നു ബിജെപി സ്ഥാനാര്ത്ഥി, അന്ന് നാലാമതാണെത്തിയത്. അന്ന് ഈ വാര്ഡില് ജയിച്ചത് സ്വതന്ത്ര സ്ഥാനാര്ത്ഥിയായിരുന്നു. സ്വതന്ത്ര സ്ഥാനാര്ത്ഥി പല ക്രമക്കേടുകളും കാണിച്ചാണ് വിജയിച്ചതെന്ന് ആരോപിച്ച് തെരഞ്ഞെടുപ്പ് കമ്മിഷന് ഉള്പ്പെടെ വിവിധ കേന്ദ്രങ്ങളില് ജ്യോതിഷ് പരാതി നല്കിയിരുന്നു. ഈ പരാതി നിലനില്ക്കെ വ്യക്തിപരമായ കാരണങ്ങളാല് താന് രാജി വയ്ക്കുകയാണെന്ന് പ്രഖ്യാപിച്ച് ഇദ്ദേഹം കൗണ്സിലര് സ്ഥാനം ഒഴിഞ്ഞു. ഇതെത്തുടര്ന്നാണ് ഇവിടെ ഉപതെരഞ്ഞെടുപ്പ് നടത്തിയത്.
ജ്യോതിഷിനെ തോളിലേറ്റി വാദ്യ മേളങ്ങളുടെ അകമ്പടിയില് പ്രവര്ത്തകര് നഗരം ചുറ്റി. വിവിധ സ്ഥലങ്ങളില് ജ്യോതിഷിന് വന് സ്വീകരണമാണ് ലഭിച്ചത്. ബിജെപി ദക്ഷിണ മേഖല പ്രസിഡന്റ് വെള്ളിയാകുളം പരമേശ്വരന്, അഡ്വ. പി.കെ. ബിനോയി എന്നിവരുടെ നേതൃത്വത്തിലാണ് നഗരത്തില് ആഹഌദ പ്രകടനം നടന്നത്. നഗരത്തിലെ വിവിധ ഭാഗങ്ങളില് നിന്നുള്ള ബിജെപി സംഘപരിവാര് പ്രവര്ത്തകര് പ്രകടനത്തില് പങ്കെടുത്തു. കഴിഞ്ഞ തെരഞ്ഞെടുപ്പില് നഗരത്തിലെ പല വാര്ഡുകളിലും ബിജെപി നിസ്സാര വോട്ടുകള്ക്കാണ് പരാജയപ്പെട്ടത്. ഇടതു വലതു മുന്നണികള് ഒത്തുകളിച്ചാണ് ബിജെപിയുടെ വിജയം തടഞ്ഞത്. ഇത്തവണ ഒത്തുകളിയെ അതിജീവിക്കാന് ബിജെപിക്കു സാധിച്ചു.
ജ്യോതിഷിന് കഴിഞ്ഞ തിരഞ്ഞെടുപ്പില് കിട്ടിയ വോട്ടിനേക്കാള് കുടുതലാണ് ഇത്തവണത്തെ ഭൂരിപക്ഷം. കഴിഞ്ഞ തിരഞ്ഞെടുപ്പില് ജ്യോതിഷിന് ആകെ കിട്ടിയത് 120 വോട്ടാണ്. എന്നാല് ഇപ്രാവശ്യം 134 വോട്ടിന്റെ ഭൂരിപക്ഷം ലഭിച്ചു.
പ്രതികരിക്കാൻ ഇവിടെ എഴുതുക: