കുട്ടനാട്: സ്കൂള് സമയങ്ങളില് പൂപ്പള്ളി ചമ്പക്കുളം വഴി കൂടുതല് ബസുകള് സര്വീസ് വേണമെന്ന ആവശ്യം ശക്തമാകുന്നു. വൈകുന്നേരങ്ങളിലാണു ബസുകള് കിട്ടാതെ സ്കൂള് കുട്ടികള് സ്വകാര്യ വാഹനങ്ങളെ കൂടുതലായി ആശ്രയിക്കേണ്ടിവരുന്നത്.
നിലവില് പൂപ്പള്ളി ചമ്പക്കുളം വഴി വൈകുന്നേരം 4.10നും 4.35നും ചങ്ങനാശേരിയിലേക്ക് ഓരോ ബസുകള് വീതം സര്വീസ് നടത്തുന്നുണ്ട്. രണ്ടു ബസുകള് സര്വീസ് നടത്തുന്നുണ്ടെങ്കിലും പലപ്പോഴും കുട്ടികള്ക്കു ബസ് കിട്ടാറില്ലെന്നു പരാതി ഉണ്ട്. നെടുമുടി കൊട്ടാരം ഹയര് സെക്കന്ഡറി സ്കൂളിലെയും ചമ്പക്കുളം സെന്റ് മേരീസ് ഹയര് സെക്കന്ഡറി സ്കൂളിലെയും കുട്ടികളാണു പ്രധാനമായും പൂപ്പള്ളി ചമ്പക്കുളം വഴി സര്വീസ് നടത്തുന്ന കെഎസ്ആര്സി ബസുകളെ ആശ്രയിക്കുന്നത്.
ഹയര് സെക്കന്ഡറി വിഭാഗം കുട്ടികള്ക്ക് 4.30 വരെ ക്ലാസ് ഉള്ളതിനാല് പലപ്പോഴും ഇവര്ക്കു ബസ് കിട്ടാറില്ല. പെണ്കുട്ടികള് അടക്കമുള്ളവര് മണിക്കൂറുകള് ബസ് സ്റ്റോപ്പില് കാത്തുനിന്ന ശേഷം വരുന്ന ബസുകളിലാണു യാത്ര ചെയ്യാറ്. ബസില് തിരക്കു കൂടുതലാണെങ്കില് സ്വന്തം കൈയിലെ പണം മുടക്കി ഓട്ടോറിക്ഷകളില് പൂപ്പള്ളി ജംക്ഷനില് എത്തിയ ശേഷം ചങ്ങനാശേരി, ആലപ്പുഴ പ്രദേശങ്ങളിലേക്കുള്ള ബസുകളെ ആശ്രയിച്ചാണു വീടുകളിലേക്കു പോകുന്നത്.
രാവിലെയും വൈകുന്നേരവും പൂപ്പള്ളി ചമ്പക്കുളം റൂട്ടില് കെഎസ്ആര്ടിസി ചങ്ങനാശേരി ആലപ്പുഴ ഡിപ്പോകളില് നിന്നും കൂടുതല് ബസുകള് സര്വീസ് നടത്തണമെന്നാണു സ്കൂള് കുട്ടികളുടെ ആവശ്യം.
പ്രതികരിക്കാൻ ഇവിടെ എഴുതുക: