കുമരകം: കുമരകം 7-ാം വാര്ഡില് കുമര്ത്തുശേരിയില് കളത്തില് റോഡിനോടുള്ള പഞ്ചായത്തിന്റെ അവഗണനയ്ക്കെതിരെ ബിജെപി പഞ്ചായത്ത് കമ്മിറ്റി പ്രതിഷേധിച്ചു. കാല്നടയാത്രപോലും പറ്റാത്തതരത്തില് കുളമായ റോഡില് വാഴനട്ടാണ് പ്രതിഷേധിച്ചത്. പ്രദേശവാസികള് ജില്ലാ കളക്ടര്ക്കും പഞ്ചായത്ത് കമ്മിറ്റിക്കും പരാതി നല്കിയിട്ടും യാതൊരുനടപടിയും ഉണ്ടാകാത്ത സാഹചര്യത്തിലാണ് ബിജെപി സമരവുമായി രംഗത്തെത്തിയത്.സ്കൂള്കുട്ടികളടക്കം നൂറുകണക്കിനാളുകളുടെ ഏക ആശ്രയമാണ് ഈവഴി. ഇതിന്റെ വികസനം നടപ്പിലാക്കാതെ ജനോപകാരപ്രദമല്ലാത്ത കളത്തില് കടമ്പനാട് നടവഴി കോണ്ക്രീറ്റ് ചെയ്ത പഞ്ചായത്ത് പ്രസിഡന്റിന്റെ നടപടി സിപിഎം ലോക്കല് നേതാവിന്റെ സ്ഥലം സംരക്ഷിക്കുന്നതിനുവേണ്ടിയുള്ള ഒത്തുകളിയുടെ ഭാഗമാണെന്ന് സമരം ഉദ്ഘാടനം ചെയ്തുകൊണ്ട് ബിജെപി പഞ്ചായത്ത് ജനറല് സെക്രട്ടറി പി.കെ.സേതു പറഞ്ഞു. ഇനിയും അവഗണന തുടര്ന്നാല് പ്രദേശവാസികളെ സംഘടിപ്പിച്ചുകൊണ്ട് ശക്തമായ പ്രക്ഷോഭ പരിപാടികള്ക്ക് രൂപം നല്കുമെന്ന് അദ്ദേഹം പറഞ്ഞു. കെ.ടി.സുരേഷ് കളപ്പുരമറ്റം അദ്ധ്യക്ഷത വഹിച്ചു. ആര്എസ്എസ് കുമരകം മണ്ഡല് കാര്യവാഹ് പി.കെ.രാജേഷ്, ബിജെപി പഞ്ചായത്ത് വൈസ് പ്രസിഡന്റ് കെ.എസ്.സതീഷ്, ഖജാന്ജി കെ.എസ്.സുരേഷ്, യുവമോര്ച്ച പഞ്ചായത്ത് പ്രസിഡന്റ് സനീഷ് നന്തികണ്ണന്തറ, മഹേഷ് കണ്ടാത്ര, പി.എസ്.സന്തോഷ് പുതപവീട്, കെ.ഡി.വിനോദ് കളത്തില് തുടങ്ങിയവര് നേതൃത്വം നല്കി.
പ്രതികരിക്കാൻ ഇവിടെ എഴുതുക: