ന്യൂയോര്ക്ക്്: സ്വാതന്ത്ര്യ ദിനത്തില് പ്രശസ്ത സംഗീതജ്ഞ അന്തരിച്ച എം. എസ്. സുബ്ബലക്ഷ്മിക്ക് ആദരം അര്പ്പിച്ച് ഓസ്കാര് ജേതാവ് എ. ആര്. റഹ്മാന് യുഎന് പൊതു സഭയില്സംഗീത പരിപാടി അവതരിപ്പിക്കും. ഐക്യരാഷ്ട്രസഭയില് സുബ്ബലക്ഷ്മി സംഗീത പരിപാടി അവതരിപ്പിച്ചതിന്റെ അമ്പതാം വാര്ഷികാഘോഷവേളയിലാണ് റഹ്മാന്റെ ഈ സ്നേഹാദരം.
1966ലാണ് സുബ്ബലക്ഷ്മി യുഎന്നില് പരിപാടി അവതരിപ്പിച്ചത്. അതിനുശേഷം ഭാരതത്തില് നിന്നുള്ള പ്രതിഭകളാരും ഇതുവരെ യുഎന്നില് പാടിയിട്ടില്ല. ചെന്നൈ ശങ്കര നേത്രാലയയുടെ സഹകരണത്തോടെയാണ് യുഎന്നിലെ ഭാരത പ്രതിനിധി സംഘം റഹ്മാന്റെ പരിപാടി സംഘടിപ്പിക്കുന്നത്.
ഇതു കൂടാതെ സുബ്ബലക്ഷ്മിയുടെ ജന്മശതാബ്ദി ആഘോഷത്തോടനുബന്ധിച്ച് യുഎന്നില് 15 മുതല് 19 വരെ ഫോട്ടോ പ്രദര്ശനവും സംഘടിപ്പിക്കുന്നുണ്ട്.
അതിനിടെ സ്വാതന്ത്ര്യ ദിനത്തോടനുബന്ധിച്ച് യുഎസിന്റെ വിവിധ ഭാഗങ്ങളിലും ആഘോഷ പരിപാടികള് അരങ്ങേറും. കേന്ദ്ര വിദേശ സഹമന്ത്രി എം. ജെ. അക്ബര് യുഎന്നിലെ ഭാരത കോണ്സുലേറ്റിന്റെ സ്വാതന്ത്ര്യദിനാഘോഷച്ചടങ്ങുകളുടെ ഉദ്ഘാടനം നിര്വ്വഹിക്കും. മന്ഹട്ടനില് ബോളിവുഡ് താരം അഭിഷേക് ബച്ചനും യോഗ ഗുരു ബാബ രാംദേവും ചേര്ന്നു നയിക്കുന്ന പരേഡും നടത്തുന്നതാണ്.
പ്രതികരിക്കാൻ ഇവിടെ എഴുതുക: