ആലപ്പുഴ: രാജ്യത്തിന്റെ എഴുപതാമത് സ്വാതന്ത്ര്യദിനം വിപുലമായി ആഘോഷിക്കാന് ജില്ലയൊരുങ്ങി. ജില്ലാതലത്തിലും ബ്ളോക്ക്ഗ്രാമപഞ്ചായത്ത് തലത്തിലും ആഘോഷങ്ങള് നടക്കും. ഇന്ന് രാവിലെ 8.30ന് പോലീസ് പരേഡ് മൈതാനത്ത് നടക്കുന്ന സ്വാതന്ത്ര്യദിനാഘോഷചടങ്ങില് മന്ത്രി ജി.സുധാകരന് ദേശീതപതാക ഉയര്ത്തും.
മന്ത്രി പരേഡില് അഭിവാദ്യം സ്വീകരിക്കും. പോലീസിന്റെയും എക്സൈസിന്റെയും എന്സിസി, സ്റ്റുഡന്റ് പോലീസ് കേഡറ്റ്സ്, സ്കൗട്ട്, ഗൈഡ്സ്, റെഡ്ക്രോസ്, കബ്സ്, ബുള്ബുള് എന്നിവയുടെയുമായി 32 പ്ലാറ്റൂണുകളും ഒമ്പത് ബാന്ഡ് ട്രൂപ്പുകളും പരേഡില് പങ്കെടുക്കും. പരേഡ് കമാന്ഡര് എം.ജെ. ജോഷിയുടെ നേതൃത്വത്തിലാണ് പരേഡ് നടക്കുക.
മുഖ്യമന്ത്രിയുടെ പോലീസ് മെഡലിന് അര്ഹരായ വിജിലന്സ് ആന്റ് ആന്റി കറപ്ഷന് ബ്യൂറോയിലെ എഎസ്ഐ ജി. ലാല്ജി, ആലപ്പുഴ ഹെഡ് ക്വാര്ട്ടേഴ്സിലെ സീനിയര് സിവില് പോലീസ് ഓഫീസര് ടി.ഡി.നെവിന്, മുഹമ്മ സ്റ്റേഷനിലെ സീനിയര് സിവില് പോലീസ് ഓഫീസര് കെ.സന്തോഷ്, കായംകുളം സ്റ്റേഷനിലെ സിവില് പോലീസ് ഓഫീസര് കെ.സുരേഷ്, എആര് ക്യാമ്പിലെ സീനിയര് സിവില് പോലീസ് ഓഫീസര് എന്.ബാലകൃഷ്ണ കാരണവര് എന്നിവര്ക്ക് ചടങ്ങില് മെഡല് സമ്മാനിക്കും. മികച്ച ട്രൂപ്പുകള്ക്കുള്ള ട്രോഫികളും വിതരണം ചെയ്യും. പൊതുവിദ്യാഭ്യസ വകുപ്പ് സംഘടിപ്പിച്ച ദേശഭക്തി ഗാനാലാപന മത്സരത്തില് ഒന്നാംസ്ഥാനം നേടിയ ആലപ്പുഴ സെന്റ് ആന്റണീസ് ഗേള്സ് എച്ച്എസിനും ദേശീയഗാനാലാപന മത്സരത്തില് ഒന്നാംസ്ഥാനം നേടിയ പുന്നപ്ര ജ്യോതിനികേതന് സീനിയര് സെക്കന്ഡറി സ്കൂളിനുമുള്ള സമ്മാനങ്ങള് ചടങ്ങില് വിതരണം ചെയ്യും.
സായുധസേനാ പതാകദിനനിധിയിലേക്ക് ഏറ്റവും കൂടുതല് തുക സംഭാവന ചെയ്ത ആലപ്പുഴ സെന്റ് ജോസഫ്സ് ജിഎച്ച്എസ്എസ്സിനും സര്ക്കാര് സ്ഥാപനമായ സഹകരണ സംഘം ജോയിന്റ് രജിസ്ട്രാര് ഓഫീസിനുമുള്ള ട്രോഫികളും സമ്മാനിക്കും.
പ്രതികരിക്കാൻ ഇവിടെ എഴുതുക: