കണ്ണൂര്: കേരളത്തില് പ്രത്യേകിച്ച് കണ്ണൂര് ബിസിനസ് ഏരിയായില് ബിഎസ്എന്എല് റവന്യൂ വരുമാനത്തില് കഴിഞ്ഞ വര്ഷത്തെ അപേക്ഷിച്ച് വന് വര്ദ്ധനയുണ്ടായതായി ബിഎസ്എന്എല് കണ്ണൂര് ബിസിനസ് ഏരിയ ജനറല് മാനേജര് എന്.കെ.സുകുമാരന് വാര്ത്താസമ്മേളനത്തില് അറിയിച്ചു. കണ്ണൂര് എസ്എസ്എയില് മൊബൈല് പോര്ട്ടബിലിറ്റി സമ്പ്രദായം ആരംഭിച്ചതിനു ശേഷം മറ്റ് കമ്പനികളുടെ കണക്ഷനുണ്ടായിരുന്ന 2,60, 000 പേര് ബിഎസ്എന്എല് വരിക്കാരായി മാറിയതായി അദ്ദേഹം പറഞ്ഞു. ഇത് റെക്കാര്ഡാണ്. കഴിഞ്ഞ ബിസിനസ് വര്ഷം 5 ശതമാനമായിരുന്നു റവന്യൂ വര്ദ്ധനയെങ്കില് ഇത്തവണ പകുതി പിന്നിടുമ്പോഴേക്കും 14 ശതമാനമായി റവന്യൂവര്ദ്ധിച്ചു കഴിഞ്ഞു.
കണ്ണൂര് എസ്എസ്എയില് 5 ജി വൈ ഫൈ ഹോട്ട്സ്പോട് സംവിധാനം ഓണത്തിന് മുമ്പ് പ്രവര്ത്തന ക്ഷമമാക്കാനുളള നടപടികള് നടന്നു വരുന്നു. 5 ജി വൈ ഫൈ ഹോട്ട്സ്പോട് സംവിധാനം പ്ലാന് ചെയ്ത 70 ടവറുകളില് 10 എണ്ണമാണ് ഓണത്തിനു മുമ്പ് പ്രവര്ത്തനം ആരംഭിക്കുക. കണ്ണൂര് കോര്പ്പറേഷന് പരിധിയില് 4 ഏണ്ണവും മറ്റുളളവ തലശ്ശേരി, കാസര്കോട്, കാഞ്ഞങ്ങാട്, കൂത്തുപറമ്പ്, തളിപ്പറമ്പ്, ചക്കരക്കല് മുതലായ സ്ഥലങ്ങളിലുമാണ് സ്ഥാപിക്കുക. ഭൂരിഭാഗം മൊബൈല് ടവറുകളിലും 3ജി സംവിധാനം ഉടന് നടപ്പിലാക്കും. 792 2ജി ടവറുകളില് 467 എണ്ണത്തില് ത്രിജി സംവിധാനം നിലവിലുണ്ട്. 67 ടവറുകളില്കൂടി ത്രിജി ഏര്പ്പെടുത്താനുളള പ്രവര്ത്തനങ്ങള് ദ്രുതഗതിയില് നടന്നുവരുന്നുണ്ട്.
ബിഎസ്എന്എല് ലാന്ഡ്ലൈന് വരിക്കാരുടെ എണ്ണം കുറഞ്ഞെങ്കിലും മൊബൈല് രംഗത്ത് വന് കുതിച്ചുചാട്ടമാണ് ഉണ്ടായിരിക്കുന്നത്. ലാന്ഡ് വൈന് വരിക്കാരുടെ എണ്ണം വര്ദ്ധിപ്പിക്കാനായി പുതിയ പദ്ധതികള് ആവിഷ്ക്കരിച്ച് നടപ്പിലാക്കി വരുന്നതായി അദ്ദേഹം പറഞ്ഞു. ലാന്ഡ് ലൈന് വരിക്കാരെ സംബന്ധിച്ച് നിലവില് 50 ശതമാനം സൗജന്യമാണ്. രാത്രി 9 മുതല് രാവിലെ 7 മണിവരെ ഫോണ്വിളി പൂര്ണ്ണസൗജന്യമാണ്. കൂടാതെ കഴിഞ്ഞ ഞായറാഴ്ച മുതല് എല്ലാ ഞായറാഴ്ചകളിലും മുഴുവന് സമയം ലാന്ഡ്ലൈന് വരിക്കാര്ക്കും പൂര്ണ്ണമായും സൗജന്യ സേവനം ലഭ്യമാക്കിയിരിക്കുകയാണ്. ലാന്ഡ്ലൈന് ആകര്ഷകമാക്കാന്ആറുമാസം വരെ 49 രൂപ മാത്രം പ്രതിമാസ വാടകയുളള പുതിയ എക്സ്പീരിയന്സ് ലാന്റ് ലൈന് 49 പ്ലാന് ആരംഭിച്ചതായും അദ്ദേഹം അറിയിച്ചു. ബിഎസ്എന്എല്ലിന്റെ 44 കസ്റ്റമര് സെന്ററുകളിലും രജിസ്ട്രേഷന് സൗകര്യം ഏര്പ്പെടുത്തിയിട്ടുണ്ട്. നവംബര് 12 വരെ ഈ പദ്ധതി പ്രകാരം കണക്ഷന് അപേക്ഷിക്കാവുന്നതാണ്.
ബ്രോഡ്ബാന്റ് ഇന്റര്നെറ്റ് കണക്ഷനുകളുടെ കുറഞ്ഞ സ്പീഡ് ഇരട്ടിയാക്കി. ഫൈബര് ഓപ്റ്റിക് ഇന്റര്നെറ്റ് കണക്ഷനുകള് കണ്ണൂരില് നല്കി തുടങ്ങിയതായും അദ്ദേഹം പറഞ്ഞു. പുതുതായി ബിഎസ്എന്എലിന്റെ മൊബൈല് കണക്ഷന് എടുക്കുന്നവര്ക്കും മൊബൈല് നമ്പര് മാറാതെ ബിഎസ്എന്എല് കണക്ഷന് എടുക്കുന്നവര്ക്കും മൊബൈല് നമ്പര് മാറാതെ ബിഎസ്എന്എലിലേക്ക് മാറിവരുന്നവര്ക്കും ഇന്റര്നെറ്റ് ഉപയോഗത്തിന് പ്രാമുഖ്യം നല്കി കൊണ്ടുളള പുതിയ പ്രീപെയ്ഡ് മൊബൈല് പ്ലാനായ സ്റ്റുഡന്സ് പ്ലാന് ആരംഭിച്ചതായും അദ്ദേഹം പറഞ്ഞു.
പ്രതികരിക്കാൻ ഇവിടെ എഴുതുക: