കണ്ണൂര്: ജില്ലയിലെങ്ങും സ്കൂളുകള് കേന്ദ്രീകരിച്ച് അധ്യാപകദിനം സമുചിതമായി കൊണ്ടാടി. രണ്ടാമത്തെ രാഷ്ട്രപതിയായിരുന്ന ഡോ.സര്വ്വേപ്പള്ളി രാധാകൃഷ്ണന്റെ ജന്മദിനമായ സെപ്തംബര് അഞ്ചാണ് അധ്യാപക ദിനമായി ആചരിച്ചുവരുന്നത്. ഇതോടനുബന്ധിച്ച് വിവിധ സ്കൂളുകളില് അധ്യാപകരെ ആദരിക്കുകയും പൂര്വ്വ അധ്യാപകരെ സ്വീകരിച്ചാനയിക്കുകയും ചെയ്തു.
തലശ്ശേരി: ഗുരുവന്ദനം പരിപാടിയോടെ പാലയാട് ഗവ എച്ച്എസ്എസില് അധ്യാപകദിനാഘോഷം നടത്തി. പരിപാടിയോടനുബന്ധിച്ച് വിരമിച്ച അധ്യാപകരെ ആദരിച്ചു. വാര്ഡ് അംഗം സി.പി.അജിതയുടെ അധ്യക്ഷതയില് ഡയററ് മുന് പ്രിന്സിപ്പാള് എം.പി.ബാലകൃഷ്ണന് പരിപാടി ഉദ്ഘാടനം ചെയ്തു. സൗത്ത് എഇഒ പി.പി.സനകന്, പിടിഎ പ്രസിഡണ്ട് പി.എം.പ്രഭാകരന്, പനോളി ലക്ഷ്മണന്, ജിതേന്ദ്രന്, സ്റ്റാഫ് സെക്രട്ടറി ബിന്ദു, പ്രധാനാധ്യാപിക പി.കെ.ഗീത തുടങ്ങിയവര് സംസാരിച്ചു.
ചാമക്കാല് ഗവ എല്പി സ്കൂളില് അധ്യാപക ദിനാഘോഷം വിവിധ പരിപാടികളോടെ ആഘോഷിച്ചു. മുന്കാല പ്രധാനാധ്യാപകരായ ദാമോദരന് നായനാര്, ഒ.എം.ആഗസ്തി, എം.കെ.ലീല, ലൗലി ജോര്ജ്ജ് എന്നിവരെ അധ്യാപകരും കുട്ടികളും ചേര്ന്ന് പൂവ് നല്കി സ്വീകരിച്ചു. പിടിഎ പ്രസിഡണ്ട് ഷാജി ചെറിയാന് അധ്യക്ഷത വഹിച്ചു. പയ്യാവൂര് ഗ്രാമപഞ്ചായത്ത് വാര്ഡ് മെമ്പര് അനില് കുമാര് അധ്യാപകരെ പൊന്നാടയണിയിച്ച് ആദരിച്ചു. മദര് പിടിഎ പ്രസിഡണ്ട് ദീപ ബിജു, കെ.എ.ആന്സി, കെ.വി.മനോഹരന്, ജോസ്മി ജോസ് എന്നിവര് സംസാരിച്ചു.
പയ്യാവൂര്: ചാമക്കാല് ഗവ. എല്പി സ്കൂളില് അദ്ധ്യാപക ദിനാഘോഷം വിവിധ പരിപാടികളോടെ ആഘോഷിച്ചു മുന്കാല പ്രധാനാധ്യാപകരായ ദാമോദരന് നായനാര്, ഒ.എം.ആഗസ്തി, എ.ജെ.ലീല, ലൗലി ജോസഫ് എന്നിവരെ അദ്ധ്യാപകരും കുട്ടികളും ചേര്ന്ന് പൂക്കള് നല്കി സ്വീകരിച്ചു. തുടര്ന്ന് നടന്ന യോഗത്തില് ഷാജി ചെറിയാന് അദ്ധ്യക്ഷത വഹിച്ചു.പയ്യാവൂര് ഗ്രാമപഞ്ചായത്ത് അംഗം കെ.ടി.അനില്കുമാര് അദ്ധ്യാപകരെ പൊന്നാടയണിയിച്ച് ആദരിച്ചു. ദീപാ ബിജു, കെ.എ.ആന്സി, കെ.വി.മനോഹരന്, ജോസ്മി ജോസ്, പ്രധാനാധ്യാപിക എല്സമ്മ മാത്യു എന്നിവര് പ്രസംഗിച്ചു.
പയ്യാവൂര്: പയ്യാവൂര് സേക്രഡ് ഹാര്ട്ട് ഹയര് സെക്കന്ഡറി സ്കൂളില് അധ്യാപക ദിനാഘോഷം കണ്ണൂര് ജില്ലാപഞ്ചായത്തംഗം പി.കെ.സരസ്വതി ഉദ്ഘാടനം ചെയ്തു. പയ്യാവൂര് ഗ്രാമപഞ്ചായത്ത് അംഗം സുഷ ബെന്നി അധ്യക്ഷത വഹിച്ചു. 25 ഓളം പൂര്വ്വ അധ്യാപകരെ ചടങ്ങില് പിടിഎ എക്സിക്യൂട്ടീവ് അംഗങ്ങളുടെ നേതൃത്വത്തില് പൊന്നാടയിണിയിച്ച് ആദരിച്ചു. സ്കൂളിലെ നിലവിലുള്ള അധ്യാപകരെ വിദ്യാര്ത്ഥികള് പൂച്ചെണ്ടും ആശംസാകാര്ഡും നല്കി ആദരിച്ചു. അധ്യാപകര് തങ്ങളുടെ അനുഭവങ്ങള് പങ്കിട്ടും കലാപരിപാടികള് അവതരിപ്പിച്ചും ആഘോഷം അവിസ്മരണീയമാക്കി. പ്രധാന അദ്ധ്യാപകന് പി.എം.മാത്യു, പിടിഎ വൈസ് പ്രസിഡന്റ് സിറിയക് മുത്തലക്കാട്ടില്, ടി.ടി.കുരുവിള, ഇ.കെ.മേരി, സ്കൂള് ലീഡര് റിഷാദ് അബൂബക്കര്, ചെയര്പേഴ്സണ് പ്രിയ ജോര്ജ് എന്നിവര് സംസാരിച്ചു. ടി.ജെ.ബെന്നി, ബിനു ജേക്കബ്, കെ.എസ്.ബിനോയ്, വി.ടി.സാലു, സ്റ്റുഡന്റ് പോലീസ് കേഡറ്റ് അംഗങ്ങള് എന്നിവര് പരിപാടികള്ക്ക് നേതൃത്വം നല്കി.
കരയത്തുംചാല്: കരയത്തുംചാല് ഗവ.യുപി സ്കൂളില് അധ്യാപക ദിനം സമുചിതമായി ആഘോഷിച്ചു. എസ്എംസി വൈസ് പ്രസിഡണ്ട് മാത്തുക്കുട്ടി ജേക്കബ് പനക്കലിന്റെ അധ്യക്ഷതയില് ശ്രീകണ്ഠപുരം മുനിസിപ്പല് കൗണ്സിലര് സൂസന് ദേവസ്യ ഉദ്ഘാടനം ചെയ്തു. മുന് പ്രധാനാധ്യാപകരായ വി.വി.കൃഷ്ണന്, കെ.ജെജോണ്, കെ.ഗോപാലന്, തങ്കമണി എന്നിവരെ പൊന്നാടയണിച്ച് ആദരിച്ചു. പ്രധാനാധ്യാപകന് ബാബു ജോര്ജ്ജ്, ടി.ജെ.ത്രേസ്യ, സി.വി.ലക്ഷ്മണന്, സി.വി.കുഞ്ഞിരാമന്, ജോയല് രാജി, പി.സി.ടോമി, എ.സി.മറിയക്കുട്ടി, പി.സിന്ധു എന്നിവര് സംസാരിച്ചു. കുട്ടികളുടെ കലാപരിപാടികളും ഉണ്ടായിരുന്നു.
അഴീക്കോട്: അഴീക്കോട് നോര്ത്ത് യുപി സ്കൂളില് അധ്യാപക ദിനാഘോഷം വിവിധ പരിപാടികളോടെ നടന്നു. ജീവിത ശൈലിയെക്കുറിച്ച് മുന് അധ്യാപിക പി.അരുണ ടീച്ചര് ക്ലാസെടുത്തു. യുപി ക്ലാസിലെ കുട്ടി അധ്യാപകര് മറ്റു കുട്ടികള്ക്ക് ക്ലാസെടുത്ത് മാതൃക കാട്ടി. പ്രധാനാധ്യാപിക കെ.ശ്രീലത ടീച്ചര് സ്വാഗതവും സ്റ്റാഫ് സെക്രട്ടറി യു.എം.സജില നന്ദിയും പറഞ്ഞു.
പ്രതികരിക്കാൻ ഇവിടെ എഴുതുക: