കൊച്ചി: ഐഎസ്എല് മൂന്നാം പതിപ്പിനൊരുങ്ങുന്ന കേരളത്തിന്റെ സ്വന്തം ബ്ലാസ്റ്റേഴ്സ് ഇന്ന് തായ്ലന്ഡിലേക്ക് പറക്കും. മികച്ച പരിശീലനവും സന്നാഹ മത്സരങ്ങളും ലക്ഷ്യമിട്ടാണ് ബ്ലാസ്റ്റേഴ്സ് ഇന്ന് ബാങ്കോക്കിലേക്ക് പോകുന്നത്. പുതിയ പരിശീലകന് സ്റ്റീവ് കോപ്പലിന്റെ നേതൃത്വത്തിലാണ് ബ്ലാസ്റ്റേഴ്സിന്റെ പരിശീലന ക്യാമ്പ്.
തിരുവനന്തപുരം ഗ്രീന്ഫീല്ഡ് സ്റ്റേഡിയത്തിലെ പത്തുദിവസം നീണ്ട ആദ്യഘട്ട പരിശീലനത്തിനുശേഷം ഇന്നലെ വൈകിട്ട് കൊച്ചിയിലെത്തിയ ടീം ഇന്ന് വൈകിട്ടാണ് യാത്രതിരിക്കുക.
ബാങ്കോക്കിലേക്ക് പോകുന്ന ടീമിന് ഇന്ന് രാവിലെ 11 ന് മാരിയറ്റ് ഹോട്ടലില് യാത്രയപ്പ് നല്കും. ടീം സഹ ഉടമ ക്രിക്കറ്റ് ഇതിഹാസം മാസ്റ്റര് ബ്ലാസ്റ്റര് സച്ചിന് ടെണ്ടുല്ക്കര്, ചലച്ചിത്രതാരങ്ങളായ ചിരഞ്ജീവി, നാഗാര്ജ്ജുന, അല്ലുഅരവിന്ദ്, പ്രമുഖ വ്യവസായി എന്. പ്രസാദ് എന്നിവര് ചടങ്ങില് പങ്കെടുക്കും. മൂന്നാം പതിപ്പിലെ ടീമിന്റെ ജേഴ്സിയും ഇന്നത്തെ ചടങ്ങില് പുറത്തിറക്കും.
ഐഎസ്എല് ആദ്യ പതിപ്പില് ഫൈനലില് കളിച്ച ബ്ലാസ്റ്റേഴ്സ് രണ്ടാം പതിപ്പില് ഏറ്റവും പിന്നിലായിരുന്നു. കളിച്ച 14 കളികൡ മൂന്നെണ്ണത്തില് മാത്രമാണ് ബ്ലാസ്റ്റേഴ്സിന് ജയിക്കാന് കഴിഞ്ഞത്. ഏഴെണ്ണത്തില് തോല്ക്കുകയും ചെയ്തു. ഈ ദുഷ്പ്പേര് മാറ്റുക എന്ന ഉദ്ദേശ്യത്തോടെയാണ് വിദേശത്തുള്ള പരിശീലനവും മറ്റും. ബാങ്കോക്കിലെ പരിശീലനം കഴിഞ്ഞ് 20-ാം തീയതിയോടെ ടീം കൊച്ചിയില് മടങ്ങിയെത്തും.
പ്രതികരിക്കാൻ ഇവിടെ എഴുതുക: