പാലാ: ഉന്നത വിദ്യാഭ്യാസ സ്ഥാപനം തുടങ്ങാന് മീനച്ചില് യൂണിയന് കുന്നോന്നിയില് വാങ്ങിയ സ്ഥലത്തില് സാമ്പത്തിക ക്രമക്കേട് നടത്തിയെന്ന ആരോപണം സംബന്ധിച്ച് അന്വേഷണം നടത്താന് പാലാ പോലീസ് സ്റ്റേഷനില് വിളിച്ചുവരുത്തിയ എസ്എന്ഡിപി യൂണിയന് കണ്വീനര് അഡ്വ. കെ.എം. സന്തോഷ്കുമാറിനെ അറസ്റ്റ് ചെയ്ത് പാലാ കോടതിയില് ഹാജരാക്കി. ചൊവ്വാഴ്ച അഞ്ചുമണിയോടെ കോടതിയില് ഹാജരാക്കിയ അഡ്വ. സന്തോഷ് കുമാറിനെ ഒരു ദിവസത്തേക്ക് റിമാന്ഡു ചെയ്തു. ദേഹാസ്വാസ്ഥ്യം തോന്നിയതിനെതുടര്ന്ന് അദ്ദേഹത്തെ പാലാ ജനറല് ആശുപത്രിയിലേക്ക് മാറ്റി.
പുലിയന്നൂര് തേക്കലക്കാട്ടില് ഗോപാലന് കോടതിയില് നല്കിയ ഹര്ജിയില് കോടതി നിര്ദ്ദേശപ്രകാരമാണ് നടപടിയെന്ന് പാലാ സിഐ പറഞ്ഞു. പണാപഹരണം, വഞ്ചന തുടങ്ങിയ ആറ് വകുപ്പുകളിലാണ് പോലീസ് കേസെടുത്തിട്ടുള്ളത്. വസ്തു ഉടമ റ്റോമി സെബാസ്റ്റിയന് കേസിലെ രണ്ടാം കക്ഷിയാണ്.
യൂണിയന് മുന് സെക്രട്ടറികൂടിയായ അഡ്വ. സന്തോഷ് കുമാറിനെതിരെ സിപിഎമ്മും പാലാ പോലീസും ചേര്ന്നു നടത്തിയ ഗൂഢാലോചനയാണ് അറസ്റ്റിന് കാരണമെന്ന് എസ്എന്ഡിപി നേതാക്കളായ ശാര്ങ്ധരന്, സുരേഷ് ഇട്ടിക്കുന്നേല്, പ്രദീപ് പ്ലാച്ചേരില്, അനീഷ് പുല്ലുവേലില് എന്നിവര് ആരോപിച്ചു.
പ്രതികരിക്കാൻ ഇവിടെ എഴുതുക: