കണ്ണൂര്: ടൂറിസം വകുപ്പിന് വെണ്ടി ജില്ലാ ടൂറിസം പ്രമോഷന് കൗണ്സിലിന്റെ ആഭിമുഖ്യത്തില് സംഘടിപ്പിക്കുന്ന ഓണോത്സവത്തിന് ഇന്ന് ഘോഷയാത്രയോടെ തുടക്കമാവും. ഓണാഘോഷത്തിന്റെ ഭാഗമായുളള കലാപരിപാടികളുടെ ഉദ്ഘാടനം 11 ന് വൈകിട്ട് 6 മണിക്ക് മന്ത്രി രാമചന്ദ്രന് കടന്നപ്പളളിയുടെ അധ്യക്ഷതയില് മന്ത്രി കെ.കെ.ശൈലജ നിര്വഹിക്കും. കെ.കെ.രാഗേഷ് എംപി മുഖ്യാതിഥിയാകും. ജില്ലാ കലക്ടര് മിര് മുഹമ്മദലി, പ്രോഗ്രാം കമ്മിറ്റി ചെയര്മാന് വെളേളാറ രാജന് എന്നിവര് വാര്ത്താ സമ്മേളനത്തില് അറിയിച്ചതാണിത്.
ശനിയാഴ്ച വൈകിട്ട് 4 മണിക്ക് പ്രഭാത് ജംഗ്ഷനില് നിന്ന് ആരംഭിക്കുന്ന ഘോഷയാത്രയില് തൃശ്ശൂരില് നിന്നുളള പുലികളി ടീമുകളായിരിക്കും പ്രധാന ആകര്ഷണം. ശിങ്കാരിമേള മത്സരം, വനിതാ കോല്ക്കളി, മയൂര നൃത്തം, അമ്മക്കൂടം തുടങ്ങിയവയും ഘോഷയാത്രയിലുണ്ടാകും. കണ്ണൂര് നഗരത്തിലെ സരക്കാര്/അര്ദ്ധസര്ക്കാര്/സ്വകാര്യ സ്ഥാപനങ്ങള്ക്കായി ഡി ടി പി സി സംഘടിപ്പിക്കുന്ന പൂക്കളമത്സരവും 10 ന് നടക്കും.
11 ന് വൈകിട്ട് ലിംക ബുക്ക് ഓഫ് റെക്കോര്ഡില് ഇടംതേടിയ സോപാനം സ്കൂള് ഓഫ് പഞ്ചവാദ്യം അവാതരിപ്പിക്കുന്ന തിമിലയിടച്ചില്, സിനിമാതാരം മേഘ്ന വിന്സെന്റ് (ചന്ദനമഴ സീരിയല് ഫെയിം) അവതരിപ്പിക്കുന്ന ക്ലാസിക്കല് ഡാന്സ്, ഉഗ്രം ഉജ്ജ്വലം ഫെയിം ടീമായ എറണാകുളം സൃഷ്ടി ഡാന്സ് അക്കാദമി അവതരിപ്പിക്കുന്ന ഒട്ടകപക്ഷി ഡാന്സ്, ഡോള് ഡാന്സ് ട്രിപ്പിസ്, കോമഡി ഫയര് ഡാന്സ് എന്നിവ അരങ്ങേറും.
12 ന് പ്രശസ്ത കോറിയോഗ്രാഫറും ഹോംങ്കോങ്ങിലെ മാന്യ സ്കൂള് ഓഫ് ഡാന്സ് അധ്യാപികയുമായ രൂപ കിരണ് അവതരിപ്പിക്കുന്ന ഭരതനാട്യം, എരഞ്ഞോളി മൂസ, പട്ടുറുമാല് ഫെയിം സജിലി സലിം തുടങ്ങിയവര് അവതരിപ്പിക്കുന്ന ഇശല് സന്ധ്യ, റബ്ബ ഇവന്റ് അവതരിപ്പിക്കുന്ന ഒപ്പന എന്നിവ ഉണ്ടായിരിക്കും. തുടര്ന്നുളള ദിവസങ്ങളിലായി ഡോ.സംപ്രീത കേശവന് അവതരിപ്പിക്കുന്ന മോഹിനിയാട്ടം, സിനിമാ താരം ശ്രുതി ലക്ഷ്മിയും സംഘവും അവതരിപ്പിക്കുന്ന ഡാന്സ് ഫ്യൂഷന്, പ്രദീപ് കേളോത്ത് അവതരിപ്പിക്കുന്ന ഹിപ്നോട്ടിക്ക് നൈറ്റ് & ജംഗ്ലിങ്ങ്, മണിപ്പൂരി ഡാന്സ്, കേരള നടനം, ഷാഡോ ഷോ, ബലൂണ് ആര്ട്ട്, മെന്റലിസം, ചരടുപിന്നിക്കളി, ഫ്ളൈ വിങ്സ് മെഗാഷോ, കഥകളി, മദ്ദളകേളി, തോടയം, കോമഡിനൈറ്റ്, ഡാന്സ് ഫ്യൂഷന് എന്നിവയും ഉണ്ടാകും.
മധുമിത മൊഹപത്ര & ടീം അവതരിപ്പിക്കുന്ന ഒഡീസി ഡാന്സ്, പ്രസീതാ ചാലക്കുടി, സന്നിധാനം കൃഷ്ണകുമാര്, കീര്ത്തന എന്നിവര് അവതരിപ്പിക്കുന്ന മണിനാദം എന്നിവയും ഇത്തവണത്തെ സവിശേഷ പരിപാടികളാണ്. സമാപന ദിവസമായ 18 ന് വൈകുന്നേരം 6 മണിക്ക് നടക്കുന്ന സാംസ്കാരിക സമ്മേളനം സി.കൃഷ്ണന് എംഎല്എയുടെ അധ്യക്ഷതയില് റവന്യൂ വകുപ്പ് മന്ത്രി ഇ ചന്ദ്രശേഖരന് ഉദ്ഘാടനം ചെയ്യും.
പത്രസമ്മേളനത്തില് അസി.കലക്ടര് ജെറോമിക് ജോര്ജ്, ഡിടിപിസി സെക്രട്ടറി സജി വര്ഗ്ഗിസ്, പ്രോഗ്രാം കമ്മിറ്റി കണ്വിനര് പി.കെ.ബൈജു തുടങ്ങിയവരും പങ്കെടുത്തു.
പ്രതികരിക്കാൻ ഇവിടെ എഴുതുക: