വിദേശനയത്തെ പ്രായോഗികതയിലേക്ക് ഉയര്‍ത്തി: രാംമാധവ്

Sunday 18 September 2016 10:33 pm IST

ബിജെപി ദേശീയ കൗണ്‍സിലിന്റെ മുന്നോടിയായി സംഘടിപ്പിച്ചസെമിനാറില്‍ ദേശീയ ജനറല്‍ സെക്രട്ടറി രാം മാധവ് സംസാരിക്കുന്നു. കോസ്റ്റ്ഗാര്‍ഡ് മുന്‍ ഡയറക്ടര്‍ ജനറല്‍ പ്രഭാകരന്‍ പലേരി,ടി. പി. ശ്രീനിവാസന്‍, ടി. പി. ജയചന്ദ്രന്‍ എന്നിവര്‍ സമീപം

കോഴിക്കോട്: കാല്‍പ്പനിക ആശയങ്ങളില്‍ നിന്ന് പ്രായോഗികതയിലേക്ക് ഭാരതത്തിന്റെ വിദേശനയത്തെ പരിവര്‍ത്തിപ്പിച്ചു എന്നതാണ് മോദി സര്‍ക്കാറിന്റെ ഏറ്റവും വലിയ സംഭാവനയെന്ന് ബിജെപി ദേശീയ ജനറല്‍സെക്രട്ടറി രാംമാധവ് പറഞ്ഞു. ബിജെപി ദേശീയ കൗണ്‍സില്‍ സമ്മേളനത്തിന്റെ മുന്നോടിയായി ഇന്നലെ ആരംഭിച്ച സെമിനാര്‍ പരമ്പരയില്‍ ‘മോദി സര്‍ക്കാര്‍ വേറിട്ട വിദേശനയം’ എന്ന വിഷയത്തില്‍ സംസാരിക്കുകയായിരുന്നു അദ്ദേഹം.

ആറ് പതിറ്റാണ്ടുകളായി അയല്‍പക്ക ബന്ധങ്ങളുടെയും ചേരിചേരാനയത്തിലും കുടുങ്ങിക്കിടക്കുകയായിരുന്നു ഭാരതത്തിന്റെ വിദേശനയം. ഭാരതീയന് അഭിമാനപൂര്‍വ്വം തലയുയര്‍ത്തി നില്‍ക്കാനുള്ള അവസരം ഉണ്ടാക്കി എന്നതാണ് മോദിസര്‍ക്കാറിന്റെ വിദേശനയത്തിന്റെ നേട്ടം. ഭാരതത്തിന്റെ ആത്മാഭിമാനം സംരക്ഷിക്കണമെന്നതിലാണ് കേന്ദ്രസര്‍ക്കാറിന്റെ വിദേശനയം ആദ്യ ഊന്നല്‍ നല്‍കിയത്. ഇന്ന് വിദേശരാഷ്ട്രങ്ങളില്‍ കഴിയുന്ന പ്രവാസി ഭാരതീയര്‍ക്ക് അഭിമാനപൂര്‍വ്വം താന്‍ ഭാരതീയനാണെന്ന് തലയുയര്‍ത്തി പറയാന്‍ അവസരം കൈവന്നിരിക്കുന്നു. ഏത് അര്‍ദ്ധരാത്രിയിലും പ്രവാസി ഭാരതീയരുടെ വിളി കേള്‍ക്കാന്‍ തയ്യാറായി രാജ്യത്തിന് ഒരുവിദേശകാര്യ വകുപ്പ് മന്ത്രിയുണ്ടായി.

വിദേശരാജ്യങ്ങളിലെ വിവിധ വിഭാഗങ്ങളുമായും ഗവേഷകരുമായും സംവാദം നടത്താനും അവരെ യോജിപ്പിക്കാനും അവരുടെ മികച്ച സംഭാവകള്‍ ഭാരതത്തിന്റെകൂടിയാണെന്ന് ഉറപ്പുവരുത്താനും വിദേശ നയസമീപനത്തിന് കഴിഞ്ഞു. വിദേശ ഭാരതീയ സമൂഹത്തിന് സ്വത്വബോധവും ഐക്യവുമുണ്ടാക്കാന്‍ അതിന് കഴിഞ്ഞു.

സാംസ്‌കാരിക മാനബിന്ദുക്കളെ നയതന്ത്ര ഉപകരണമായി ഉപയോഗിക്കാനും അതുവഴി അയല്‍രാജ്യങ്ങളുമായി സുദൃഢബന്ധം സ്ഥാപിക്കാനും ഭാരതത്തിന് കഴിഞ്ഞു. ശക്തമായ അയല്‍പക്ക ബന്ധത്തിലൂടെ ഒരുമിച്ച് മുന്നേറാമെന്ന് വളരാമെന്നുമുള്ള കാഴ്ചപ്പാടാണ് ഭാരതം മുന്നോട്ട് വെച്ചത്. ഈ അഞ്ച് ഘടകങ്ങളെ ഊന്നിയാണ് ഭാരതത്തിന്റെ പുതിയ വിദേശനയം രൂപപ്പെട്ടത്. അതിര്‍ത്തിബന്ധങ്ങളുടെയും സര്‍ക്കാറുകള്‍ തമ്മിലുള്ള ചര്‍ച്ചയിലും മാത്രം ഒതുങ്ങിക്കിടന്ന വിദേശനയത്തില്‍ നിന്നുള്ള മോചനമാണുണ്ടായത്. ഭാരതത്തിന്റെ ആവശ്യങ്ങള്‍ മാത്രമല്ല താല്‍പര്യങ്ങളും സംരക്ഷിക്കണമെന്ന നിലപാടിലാണ് അത് ഉറച്ചുനിന്നത്. സ്ഥിരം ശത്രുവോ സ്ഥിരം മിത്രമോ അല്ല, വിദേശനയത്തില്‍ ഉള്ളതെന്നും സ്ഥിരം താത്പര്യം ഭാരതം മുന്നോട്ട്‌വെച്ചു.

ഭാരതത്തെ ലോകശക്തിയാക്കി മാറ്റണമെന്ന ആഗ്രഹത്തില്‍ നിന്നാണ് പുതിയ സമീപനം ഉടലെടുത്തത്- അദ്ദേഹം പറഞ്ഞു. മുന്‍ കോസ്റ്റ്ഗാര്‍ഡ് ഡയറക്ടര്‍ ജനറല്‍ പ്രഭാകരന്‍ പലേരി അധ്യക്ഷതവഹിച്ചു. കാശ്മീര്‍ ഭാരതത്തിന്റെ ഒരു പ്രശ്‌നമല്ലെന്നും കാശ്മീരിന് ചില പ്രശ്‌നങ്ങള്‍ ഉണ്ടെന്നും അദ്ദേഹം പറഞ്ഞു. അത് സംസ്ഥാന ഭരണകൂടം പരിഹരിക്കേണ്ട പ്രശ്‌നങ്ങളാണ്. ഏത് സംസ്ഥാനത്തിലും ഉണ്ടാകുന്ന ഭരണ പ്രശ്‌നങ്ങളേ കാശ്മീരിനുള്ളൂ. അദ്ദേഹം പറഞ്ഞു. നയതന്ത്രവിദഗ്ധനും മുന്‍ ഭാരത സ്ഥാനപതിയുമായ ടി. പി. ശ്രീനിവാസന്‍ സംസാരിച്ചു. സ്വാതന്ത്ര്യത്തിന് ശേഷം ദൃഢമായ തീരുമാനമെടുക്കുന്ന സര്‍ക്കാറാണ് മോദി സര്‍ക്കാറെന്ന് അദ്ദേഹം പറഞ്ഞു.

സ്വാതന്ത്ര്യത്തിന് ശേഷം ഭാരതത്തിന്റെ താല്‍പര്യങ്ങള്‍ സംരക്ഷിക്കാന്‍ സര്‍ക്കാറുകള്‍ക്കായില്ല. രാഷ്ട്രത്തിന്റെ താല്‍പര്യങ്ങള്‍ എന്താണെന്ന് നിര്‍വ്വചിക്കാന്‍പോലും ഈ സര്‍ക്കാറുകള്‍ക്കായില്ല. ടി.പി. ജയചന്ദ്രന്‍ സ്വാഗതവും പി. ജിജേന്ദ്രന്‍ നന്ദിയും പറഞ്ഞു. ഇന്ന് ദളിത് രാഷ്ട്രീയത്തിന്റെ അര്‍ത്ഥതലങ്ങള്‍ എന്ന വിഷയത്തില്‍ അളകാപുരി ഓഡിറ്റോറിയത്തില്‍ വൈകീട്ട് 5.30ന് നടക്കുന്ന സെമിനാറില്‍ സി.കെ. ജാനു, ടി.ജി.മോഹന്‍ദാസ്, പി. ജി.കുമാരദാസ്, അഡ്വ. ബി. ഗോപാലകൃഷ്ണന്‍ തുടങ്ങിയവര്‍ പങ്കെടുക്കും.

പ്രതികരിക്കാന്‍ ഇവിടെ എഴുതുക:

ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. പ്രതികരണങ്ങളില്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. വായനക്കാരുടെ അഭിപ്രായങ്ങള്‍ ജന്മഭൂമിയുടേതല്ല.