ആലപ്പുഴ: യുഗപ്രഭാവനായ ശ്രീനാരായണ ഗുരുദേവന്റെ 89-ാമത് സമാധിദിനം ഇന്ന് നാടൊട്ടുക്കും ആചരിക്കും. ഇന്ന് വിവിധ കേന്ദ്രങ്ങളില് പുഷ്പാര്ച്ചന, അനുസ്മരണ സമ്മേളനം, കഞ്ഞിവീഴ്ത്തല്, ശാന്തിയാത്ര, ദിപക്കാഴ്ച, ഗുരു ഭാഗവത പാരായണം തുടങ്ങിയവ നടക്കും. എസ്എന്ഡിപിയും വിവിധ ശ്രീനാരായണ പ്രസ്ഥാനങ്ങളും നേതൃത്വം നല്കും.
എസ്എന്ഡിപി അമ്പലപ്പുഴ താലൂക്ക് യൂണിയന്റെ ആഭിമുഖ്യത്തില് ഇന്നു രാവിലെ യൂണിയന് ആസ്ഥാനത്ത് പ്രസിഡന്റ് കലവൂര് എന്. ഗോപിനാഥ് പതാക ഉയര്ത്തും. വൈകിട്ട് മൂന്നിന് അനുസ്മരണ സമ്മേളനം.
തുമ്പോളി 478 നമ്പര് ശാഖയില് രാവിലെ 11ന് അനുസ്മരണ സമ്മേളനം സി.പി. രവീന്ദ്രന് പ്രഭാഷണം നടത്തും. കെ.കെ. മഹീധരന് അദ്ധ്യക്ഷത വഹിക്കും.
മുഹമ്മ മേഖല സംയുക്ത ദിനാചരണ കമ്മറ്റിയുടെ ആഭിമുഖ്യത്തില് നടക്കും. രാവിലെ 9ന് പതാക ഉയര്ത്തല്. വൈകിട്ട് 4.30ന് ശാന്തിയാത്ര മുഹമ്മ കമ്യൂണിറ്റി ഹെല്ത്ത് സെന്ററിന് സമീപത്ത് നിന്നാരംഭിച്ച് ആര്യക്കര എസ്എന് കവല 498-ാം നമ്പര് ശാഖായോഗം ഹാളില് എത്തിച്ചേരും. വൈകിട്ട് 5.30ന് നടക്കുന്ന മഹാസമ്മേളനം എസ്എന് ട്രസ്റ്റ് ബോര്ഡ് മെമ്പര് പ്രീതിനടേശന് വെള്ളാപ്പള്ളി ഉദ്ഘാടനം ചെയ്യും. കണിച്ചുകുളങ്ങര യൂണിയന് സെക്രട്ടറി കെ.കെ. മഹേശന് അദ്ധ്യക്ഷത വഹിക്കും. പത്തിയൂര് ശശികുമാര് മുഖ്യപ്രഭാഷണം നടത്തും. എസ്. രാജേഷ്, തങ്കമണിഗൗതമന്, രഞ്ജന് തൈവെളി, ഡി പൊന്നപ്പന്, ബിജു, പി.കെ. മോഹന്ദാസ്, ടി.ആര്. സോമന്, ഇ.ടി. രമണന്, പി. പ്രേമാനന്ദന്, പി.എന്. സദാനന്ദന് എന്നിവര് സംസാരിക്കും.
ശ്രീനാരായണഗുരു സമാധി ദിനാചരണത്തോടനുബന്ധിച്ചു ചെറുവാരണം ശ്രീനാരായണപുരം ക്ഷേത്രത്തില് (പുത്തനമ്പലം) ഇന്ന് വിവിധ ചടങ്ങുകള് നടക്കും. രാവിലെ 5.30നു ഗണപതിഹോമം, വിശേഷാല് പൂജകള്. മൂന്നിനു കാട്ടുകട, കല്ലാപ്പുറം, കാട്ടുകട വെസ്റ്റ്, കൊല്ലംപറമ്പ്, ചെറുവാരണം, അയ്യപ്പഞ്ചേരി എസ്എന്ഡിപി ശാഖകളില്നിന്നും കല്ലാപ്പുറം കിഴക്കേ ഗുരുമന്ദിരം ഗുരുധര്മ്മ പ്രചാരണ സഭ യൂണിറ്റില്നിന്നു മൗനജാഥ ക്ഷേത്രത്തില് എത്തിച്ചേരും. 3.30നു സമാധിപൂജ. തുടര്ന്നു പ്രാര്ഥന, പ്രസാദവിതരണം.
ഗുരുദേവപുരം തെക്കനാര്യാട് 298 എസ്എന്ഡിപി ശാഖയുടെ നേതൃത്വത്തില് ഗുരുദേവന്റെ 89-ാമത് മഹാസമാധി ദിനാചരണവും സമാധി ദീപ പ്രകാശവും ഇന്നു നടക്കും. രാവിലെ എട്ടുമുതല പുഷ്പാര്ച്ചന, ഭജന, പ്രഭാഷണം, ദൈവദശക ആലാപന പദയാത്ര എന്നിവ നടക്കും.
ചേര്ത്തല താലൂക്കില് മഹാസമാധി ദിനാചരണ കമ്മിറ്റിയുടെ നേതൃത്വത്തില് സമാധിദിനാചരണത്തോട് അനുബന്ധിച്ച് 21ന് വിവിധ പരിപാടികള് സംഘടിപ്പിക്കും. രാവിലെ കളവംകോടം ശക്തീശ്വരം ക്ഷേത്രത്തില് നിന്നു ചേര്ത്തല ഗവ.ബോയ്സ് സ്കൂളിലേക്ക് വിദ്യാര്ഥികള് നയിക്കുന്ന ദീപശിഖാറിലേ നടക്കും. ഉച്ചയ്ക്ക് രണ്ടിന് നടക്കുന്ന സമ്മേളനം മന്ത്രി പി.തിലോത്തമന് ഉദ്ഘാടനം ചെയ്യും. സമാധിദിനാചരണ കമ്മിറ്റി ചെയര്മാന് സി.കെ.വിജയഘോഷ് ചാരങ്കാട്ട് അധ്യക്ഷത വഹിക്കും. വൈകിട്ട് 3.30ന് പുഷ്പാര്ച്ചനയും മഹാസമാധി സമൂഹപ്രാര്ഥനയും. വൈകിട്ട് നാലിന് വര്ണമൗനമഹാജാഥയും നടക്കും.
തിരുവിഴ ശ്രീനാരായണ സമാധിദിനാചരണ സംഘത്തിന്റെ നേതൃത്വത്തില് ഇന്ന് സമാധി ദിനാചരണം നടത്തും. രാവിലെ ഭാഗവതപാരായണം. 10ന് സംഗീതഭജന. ഉച്ചയ്ക്ക് സമൂഹസദ്യയും ഉണ്ടാവും.
പ്രതികരിക്കാൻ ഇവിടെ എഴുതുക: