കണ്ണൂര്: സംസ്ഥാന സര്ക്കാരിന്റെ 100 ദിനാഘോഷങ്ങളുടെ ജില്ലാതല പരിപാടി 24, 25 തിയ്യതികളില് നടക്കുമെന്ന് ജില്ലാ പഞ്ചായത്ത് പ്രസിഡണ്ട് എം.വി.സുമേഷ് പത്രസമ്മേളനത്തില് പറഞ്ഞു. ജില്ലാതല ജലസംരക്ഷണ ശില്പ്പശാല, ഫോട്ടോ പ്രദര്ശനം, മെഡിക്കല് എക്സിബിഷന്, വൃക്കരോഗ സൗജന്യപരിശോധനാ ക്യാമ്പ്, ചിത്രരചനാ മത്സരം, പ്രബന്ധരചനാ മത്സരം എന്നീ പരിപാടികള് ആഘോഷത്തിന്റെ ഭാഗമായി സംഘടിപ്പിക്കും. ഇന്ഫര്മേഷന് പബ്ലിക് റിലേഷന്സ് വകുപ്പ് ജില്ലാ പഞ്ചായത്തുമായി ചേര്ന്ന് കണ്ണൂര് വൊക്കേഷണല് ഹയര് സെക്കറി സ്കൂളിലാണ് പരിപാടികള് സംഘടിപ്പിക്കുന്നത്.
പരിപാടികളുടെ ഉദ്ഘാടനം 24ന് രാവിലെ 10 മണിക്ക് മന്ത്രി കെ.കെ.ശൈലജ നിര്വഹിക്കും. മന്ത്രി രാമചന്ദ്രന് കടന്നപ്പള്ളി അധ്യക്ഷത വഹിക്കും. ജലസംരക്ഷണ ശില്പ്പശാല മേയര് ഇ.പി.ലതയും വൃക്കരോഗ സൗജന്യ പരിശോധന ക്യാമ്പ് പി.കെ.ശ്രീമതി എംപിയും ഫോട്ടോ പ്രദര്ശനം ജില്ലാ പഞ്ചായത്ത് പ്രസിഡണ്ട് കെ. വി.സുമേഷും ഉദ്ഘാടനം ചെയ്യും. എംഎല്എമാരായ സി.കൃഷ്ണന്, ജെയിംസ് മാത്യു, ടി.വി.രാജേഷ് എന്നിവര് പരിപാടികളില് പങ്കെടുക്കും. ജില്ലാ കലക്ടര് മിര് മുഹമ്മദലി സ്വാഗതം ആശംസിക്കും.
തുടര്ന്ന് “ജലസമൃദ്ധി, നല്ല കുടിവെള്ളം” എന്ന വിഷയത്തില് ശില്പ്പശാല നടക്കും. പരിയാരം മെഡിക്കല് കോളേജുമായി സഹകരിച്ച് വടകര തണല് ഒരുക്കുന്ന “വൃക്കക്ക് ഒരു തണല്” എക്സിബിഷന് ഉണ്ടാകും. ആവശ്യമുള്ളവര്ക്ക് വൃക്കരോഗ സൗജന്യപരിശോധനക്കുള്ള സൗകര്യവും ക്യാമ്പില് ഒരുക്കും. 24, 25 തിയ്യതികളില് വൈകിട്ട് 5 മണി വരെ മെഡിക്കല് എക്സിബിഷന് കാണാന് സൗകര്യമുണ്ടായിരിക്കും.
കണ്ണൂര് പ്രസ്സ്ക്ലബ്ബുമായി സഹകരിച്ച ജില്ലയിലെ പ്രസ്സ് ഫോട്ടോഗ്രാഫര്മാരുടെ ജലം, പരിസ്ഥിതി വിഷയമായ ഫോട്ടോ പ്രദര്ശനവും രണ്ട് ദിവസങ്ങളിലായി നടക്കും.
കോളേജ്, ഹയര് സെക്കണ്ടറി വിദ്യാര്ഥികള്ക്കായി പ്രബന്ധരചനാ മത്സരം, എല്പി, യുപി, എച്ച്എസ് വിദ്യാര്ഥികള്ക്കായി ചിത്രരചനാ മത്സരം (വാട്ടര് കളര്), സ്റ്റാംപ് പ്രദര്ശനം എന്നിവയും ഒരുക്കിയിട്ടുണ്ട്. വിദ്യാര്ഥികള്ക്കുള്ള മത്സരങ്ങള് 25ന് രാവിലെ 10 മണിക്ക് കണ്ണൂര് വൊക്കേഷണല് ഹയര് സെക്കറി സ്കൂളില് പ്രശസ്ത ചിത്രകാരന് കെ കെ മാരാര് ഉദ്ഘാടനം ചെയ്യും. രാവിലെ 9.30ന് രജിസ്ട്രേഷന് ആരംഭിക്കും.
വാര്ത്താ സമ്മേളനത്തില് എഡിഎം മുഹമ്മദ് യൂസഫ്, ജില്ലാ ഇന്ഫര്മേഷന് ഓഫീസര് ഇ.കെ.പത്മനാഭന്, തണല് എക്സിബിഷന് കോഓര്ഡിനേറ്റര് എം.ഷമീര്, കണ്ണൂര് തണല് സെക്രട്ടറി വി.വി.മുനീര് എന്നിവരും സംബന്ധിച്ചു.
പ്രതികരിക്കാൻ ഇവിടെ എഴുതുക: