മട്ടന്നൂര്: വിമാനത്താവള നിര്മ്മാണത്തിനായി മൂര്ഖന് പറമ്പിലെ കൊടും കാടുകള് വെട്ടനിരത്തിയതോടെ വിവിധ സമീപ പ്രദേശങ്ങളില് കുരങ്ങുകളുടെയും, കാട്ടുപന്നികളുടെയും ശല്യം രൂക്ഷമായി. പറയനാട്, വെളിയമ്പ്ര, ആവട്ടി, കൊട്ടിയൂര്ഞാല് എന്നിവിടങ്ങളില് കുരങ്ങ് ശല്യം വര്ദ്ധിച്ചപ്പോള്, വെമ്പടി, കളറോട്, കിളിയങ്ങാട്, പെരിയച്ചൂര്, പൊറോറ, കോളാരി തുടങ്ങിയ പ്രദേശങ്ങളില് കാട്ടുപന്നികളുടെ ശല്യമാണ് രൂക്ഷമായത്. ഇതോടെ കര്ഷര് പത്രസന്ധിയിലായി. കുരങ്ങുകള് കൂട്ടമായെത്തി തെങ്ങുകളിലെ ഇളനീരും പാകമാകാത്ത തേങ്ങയും പറച്ചിട്ട് നശിപ്പിക്കുകയാണ്. ചേമ്പ്, വാഴ, കപ്പ തുടങ്ങിയവയാണ് പന്നികള് നശിപ്പിക്കുന്നത്.
വെമ്പടിയില് കഴിഞ്ഞ ഒരു മാസമായി നിരവധി കൃഷിയിടങ്ങളാണ് കാട്ടുപന്നികള് നശിപ്പിച്ചത്.കഴിഞ്ഞ ദിവസം വെമ്പടി മുനവ്വിറില് ഇസ്ലാം മദ്രസയുടെ സമീപം ചൂര്യോട് ഇബ്രാഹിം, ചേമ്പില് കുഞ്ഞാമിന, സി.മൂസ ഹാജി, സി.കെ.ആസ്യ ഉമ്മ എന്നിവരുടെ കൃഷിയിടങ്ങള് കാട്ടുപന്നി നശിപ്പിച്ചു. പ്രദേശത്ത് കാട്ടുപന്നി ശല്യം രൂക്ഷമായതോടെ ഈ മേഖലയില് കൃഷിയിറക്കുവാന് കര്ഷകര് മടിക്കുകയാണ്. കണ്ണൂര് അന്താരാഷ്ട്ര വിമാനത്താവളത്തിനായി മൂര്ഖന് പറമ്പിലെ കൊടുംകാടുകള് വെട്ടിനിരത്തിയതോടെയാണ് കുരങ്ങുകള്, കാട്ടുപന്നികള് മുതലായവ വാസസ്ഥലങ്ങള്ക്കായി പുതിയ താവളം തേടിയെത്തുന്നത്. ചില പ്രദേശങ്ങളില് മയിലുകളെത്തി കൗതുകം സൃഷ്ടിക്കുകയാണ്.
അംഗപരിമിതര്ക്ക് ഉപകരണ വിതരണം: പരിശോധന ഇന്ന്
മട്ടന്നൂര്: കേന്ദ്ര എസിഐപി പദ്ധതിയില് സാമൂഹ്യ സുരക്ഷാ മിഷന്റെ നേതൃത്വത്തില് അംഗപരിമിതര്ക്കുള്ള ഉപകരണ വിതരണത്തിനുള്ള പരിശോധന ഇന്ന് മട്ടന്നൂരില് നടക്കുമെന്ന് നഗരസഭാ ചെയര്മാന് കെ.ഭാസ്കരന് മാസ്റ്റര് പത്രസമ്മേളനത്തില് അറിയിച്ചു. മട്ടന്നൂര്, കൂത്തുപറമ്പ്, പേരാവൂര്, ഇരിക്കൂര്, ധര്മ്മടം തുടങ്ങി അഞ്ച് നിയമസഭാ മണ്ഡലങ്ങളിലുള്ളവര് ക്യാമ്പില് പങ്കെടുക്കാം. 40 ശതമാനം അംഗവൈകല്യം ഉള്ളവര്ക്ക് പരിശോധനയ്ക്ക് ശേഷം ആവശ്യമായ ഉപകരണങ്ങള് നല്കും. വീല്ചെയര്, ശ്രവണ സഹായി, വാക്കിംഗ് സ്റ്റിക്, എംഎസ്ഇഡി കിറ്റ്, മുച്ചക്ര വാഹനം, ലൈബ്രറി സ്ലേറ്റ്, നടക്കാന് സഹായിക്കുന്ന ഉപകരണങ്ങള് എന്നിവയാണ് നല്കുക. ക്യാമ്പില് പങ്കെടുക്കുന്നവര് രണ്ട് ഫോട്ടോ, വികലാംഗ സര്ട്ടിഫിക്കറ്റ്, റേഷന് കാര്ഡ്, ആധാര് കാര്ഡ്, വരുമാന സര്ട്ടിഫിക്കറ്റ് എന്നിവ ഹാജരാക്കണം.
പത്രസമ്മേളനത്തില് വൈസ് ചെയര്മാന് കെ.ശോഭന, സ്റ്റാന്റിംഗ് കമ്മറ്റി ചെയര്മാന്മാരായ വി.എന്.സത്യേന്ദ്രനാഥന്, എ.കെ.ഹരീന്ദ്രനാഥ്, ഷാഹിന സത്യന്, നഗരസഭാ സെക്രട്ടറി എം.സുരേശന് എന്നിവര് പങ്കെടുത്തു.
പ്രതികരിക്കാൻ ഇവിടെ എഴുതുക: