ഇരിട്ടി: പൊതു വിദ്യാലയങ്ങള് മികവിന്റെ കേന്ദ്രങ്ങള് എന്ന ആശയവുമായി വിദ്യാര്ഥികളില് ആത്മവിശ്വാസവും ലക്ഷ്യ ബോധവും വര്ധിപ്പിച്ചു ജീവിത വിജയം കൈവരിക്കുന്നതിനായി പാല ഗവ. ഹയര്സെക്കന്ഡറി സ്കൂളില് നടത്തി വരുന്ന ഉണര്വ് നവജീവിത പരിശീലന പരിപാടിയുടെ മൂന്നാം ബാച്ചിന്റെ ഉദ്ഘാടനം സണ്ണി ജോസഫ് എംഎല്എ നിര്വഹിച്ചു. സ്കൂള് പിടിഎയും കണ്ണൂരിലെ ട്രെയിനര്മാരുടെ കൂട്ടായ്മയായ പോസിറ്റീവ് കമ്മ്യൂണ് സോഫ്റ്റ് സ്കില് ട്രെനിംഗ് ടീമും ചേര്ന്നാണ് പരിശീലനം നടപ്പാക്കുന്നത്. ലക്ഷ്യബോധം, ആത്മവിശ്വാസം, പഠന ശേഷികള്, ഏകാഗ്രത, മൂല്യ ബോധം, ജീവിത ശേഷികള് തുടങ്ങി വ്യക്തിയെ മാറ്റിപ്പണിയാന് തക്ക വിധത്തിലുള്ള ശാസ്ത്രീയമായ പരിശീലനമാണ് ഉണര്വിലൂടെ വിദ്യാര്ഥികള്ക്ക് നല്കുന്നത്. കഴിഞ്ഞ നാല് വര്ഷമായി തുടരുന്ന പരിപാടിയിലൂടെ 2 ബാച്ചുകള് വിജയകരമായി പരിശീലനം പൂര്ത്തിയാക്കി. ശനി, ഞായര് തുടങ്ങിയ ഒഴിവ് ദിവസങ്ങളിലാണ് പരിശീലനം. അഭിമുഖങ്ങള്, യാത്രകള്, സന്ദര്ശന ക്യാമ്പുകള് എന്നിവയും ഇതോടൊപ്പം നടത്തുന്നു. സര്ക്കാര് സ്കൂളുകളിലെ കുട്ടികള്ക്ക് അന്താരാഷ്ട്ര നിലവാരത്തില് മേന്മയുള്ള വിദ്യാഭ്യാസം ലഭ്യമാക്കുക എന്നതാണ് ഇതിന്റെ ലക്ഷ്യം. ഇതോടൊപ്പം രക്ഷിതാക്കള്ക്കും പരിശീലനം നല്കി വരുന്നു. പിടിഎ പ്രസിഡന്റ് പി.വിനോദ് പരിപാടിയില് അധ്യക്ഷത വഹിച്ചു. ഉണര്വ് വഴികാട്ടി പുസ്തക പ്രകാശനം ജില്ലാ പഞ്ചായത്തംഗം സണ്ണി മേച്ചേരി നിര്വഹിച്ചു. പ്രധാനാദ്ധ്യാപിക കെ.ആര്.വിനോദിനി, പഞ്ചായത്തംഗം മിനി ചന്ദ്രന്, ഉണര്വ് കോ-ഓഡിനേറ്റര് പ്രദീപന് മാലോത്ത്, എം.വി.സതീശന്, എ.ഹരിദാസന്, എന്.സുലോചന, വി.രാജു, എ.കെ.ഹസ്സന്, കെ.ഐശ്വര്യ, എം.ശില്പ്പ, ബിന്ദു ഷാജി തുടങ്ങിയവര് പ്രസംഗിച്ചു.
പ്രതികരിക്കാൻ ഇവിടെ എഴുതുക: