ആലപ്പുഴ: എല്ലാ സ്കൂളുകളിലും ഗാന്ധി ഓര്മമരം നട്ടും ശുചിത്വ-ലഹരിവിരുദ്ധ പരിപാടികള്ക്ക് പ്രാധാന്യം നല്കിയും ജില്ലയില് ഗാന്ധി ജയന്തി വാരാഘോഷം വിപുലമായി സംഘടിപ്പിക്കും. ഒക്ടോബര് രണ്ടുമുതല് എട്ടു വരെയാണ് വാരാഘോഷം.
ജില്ലാതല ഉദ്ഘാടനം രണ്ടിന് രാവിലെ ഒമ്പതിന് കളക്ടറേറ്റില് ഗാന്ധിസ്മാരക മണ്ഡപത്തില് നടക്കും. വൈകിട്ട് 5.30ന് കളക്ടറേറ്റിലെ വേദിയില് നെഹ്റു യുവകേന്ദ്രയുടെ നേതൃത്വത്തില് സബര്മതിയുടെ സഹകരണത്തോടെ ഗാന്ധി സ്മരണയില് ദീപാജ്ഞലിയും കാവ്യാഞ്ജലിയും നടക്കും.
മൂന്നിന് സ്കൂളുകളില് ശുചിത്വ ദിനം ആചരിക്കും. സ്കൂള് പരിസരവും ക്ലാസ് മുറികളും വിദ്യാര്ഥികളുടെയും അധ്യാപകരുടെയും പിറ്റിഎയുടെയും നേതൃത്വത്തില് ശുചീകരിക്കും.
നാലിന് ജില്ലാ, ബ്ലോക്ക്, ഗ്രാമപഞ്ചായത്തുകളിലും നഗരസഭകളിലും ശുചിത്വ ദിനം ആചരിക്കും. സ്കൂളുകളില് പെയിന്റിങ്, പ്രസംഗം, ക്വിസ് മത്സരം, ഉപന്യാസരചന മത്സരങ്ങള് സംഘടിപ്പിക്കും.
അഞ്ചിന് വിവിധ സര്ക്കാര് ഓഫീസുകളില് ശുചിത്വദിനം ആചരിക്കും. അന്ന് ആലപ്പുഴ ജവഹര് ബാലഭവനില് സ്കൂള് വിദ്യാര്ഥികള്ക്കായുള്ള ജില്ലാതല ക്വിസ്, ഉപന്യാസരചന, പെയിന്റിങ്, പ്രസംഗ മത്സരങ്ങള് നടക്കും.
ആറിന് കുടുംബശ്രീ, ആരോഗ്യപ്രവര്ത്തകര് എന്നിവര് ചേര്ന്ന് പൊതുസ്ഥലങ്ങള് ശുചീകരിക്കും. ഒക്ടോബര് ഏഴിന് നെഹ്റു യുവകേന്ദ്രയുടെ നേതൃത്വത്തില് സഹകരണത്തോടെ നഗരചത്വരത്തിലെ ആര്ട്ട് ഗാലറിയില് ഗാന്ധി ചിത്രപ്രദര്ശനം സംഘടിപ്പിക്കും. ഒക്ടോബര് എട്ടിന് ശുചിത്വപഠനയാത്ര സംഘടിപ്പിക്കും. വിശ്വദര്ശന ബാലജനസഖ്യവും സബര്മതിയും ചേര്ന്നായിരിക്കും യാത്ര സംഘടിപ്പിക്കുക.
കുടുംബശ്രീ യൂണിറ്റുകളുടെ ഉത്പന്നങ്ങളുടെ പ്രത്യേക വിപണന മേളകള് സംഘടിപ്പിക്കും. ഖാദി ഗ്രാമവ്യവസായ ബോര്ഡിന്റെ ആഭിമുഖ്യത്തില് ഖാദി വിപണന മേള നടക്കും. ഒക്ടോബര് എട്ടിന് ജില്ലാതല സമാപന സമ്മേളനം അമ്പലപ്പുഴ കുഞ്ചുപിള്ള സ്മാരക സ്കൂളില് സംഘടിപ്പിക്കും.
പ്രതികരിക്കാൻ ഇവിടെ എഴുതുക: