തെരുവുനായ നിയന്ത്രണം: എബിസി പദ്ധതിക്ക് തുടക്കമായി

Wednesday 5 October 2016 9:58 pm IST

കണ്ണൂര്‍: രൂക്ഷമായ തെരുവുനായ ശല്യത്തിന് പരിഹാരം കാണുന്നതിന്റെ ഭാഗമായി ജില്ലാ പഞ്ചായത്തിന്റെ നേതൃത്വത്തില്‍ നടപ്പാക്കുന്ന ആനിമല്‍ ബര്‍ത്ത് കണ്‍ട്രോള്‍ (എബിസി) പദ്ധതിക്ക് ജില്ലയില്‍ തുടക്കമായി. ഇതിന്നായി പാപ്പിനിശ്ശേരി മൃഗാശുപത്രിയോടനുബന്ധിച്ച് തയ്യാറാക്കിയ തെരുവുനായ പ്രജനന നിയന്ത്രണ ഉപകേന്ദ്രം പി.കെശ്രീമതി എംപി ഉദ്ഘാടനം ചെയ്തു. ജില്ലാപഞ്ചായത്ത് പ്രസിഡന്റ് കെ.വി.സുമേഷ് അധ്യക്ഷത വഹിച്ചു. പടിയൂര്‍ പഞ്ചായത്ത് വിട്ടുനല്‍കിയ രണ്ട് ഏക്കര്‍ സ്ഥലത്ത് കെട്ടിടങ്ങളുള്‍പ്പെടെയുള്ള സംവിധാനങ്ങളൊരുക്കാന്‍ സമയമെടുക്കുമെന്നതിനാലാണ് പാപ്പിനിശ്ശേരിയില്‍ ഉപകേന്ദ്രം ആരംഭിച്ചതെന്ന് അദ്ദേഹം പറഞ്ഞു. കേന്ദ്രം സ്ഥാപിക്കുന്നതിനോട് മറ്റുപല പഞ്ചായത്തുകളും മുഖംതിരിച്ചപ്പോള്‍ അതിന് സന്നദ്ധമായി മുന്നോട്ടുവന്ന പാപ്പിനിശ്ശേരി പഞ്ചായത്തിനെയും പ്രസിഡന്റ് കെ നാരായണനെയും അദ്ദേഹം അഭിനന്ദിച്ചു. ബംഗഌരു ആസ്ഥാനമായ ആനിമല്‍ റൈറ്റ്‌സ് ഫണ്ടണ്ട് എന്ന ഏജന്‍സിയാണ് പദ്ധതി നടപ്പാക്കുന്നത്. ഒരു നായയ്ക്ക് 1450 രൂപ എന്ന നിരക്കില്‍ ഒരു വര്‍ഷത്തേക്കാണ് ഏജന്‍സിയുമായി കരാര്‍ ഒപ്പിട്ടിരിക്കുന്നത്. ഗ്രാമ പഞ്ചായത്തുകള്‍, നഗരസഭകള്‍, കോര്‍പ്പറേഷന്‍ എന്നിവയുമായി ചേര്‍ന്നാണ് ജില്ലാ പഞ്ചായത്ത് പദ്ധതി നടപ്പിലാക്കുന്നത്. പദ്ധതിക്ക് ചെലവ് വരുന്ന 2.98 കോടി രൂപയുടെ 70 ശതമാനം സംസ്ഥാന സര്‍ക്കാരും 30 ശതമാനം ജില്ലയിലെ തദ്ദേശ സ്ഥാപനങ്ങളും വഹിക്കും. നായകളെ പിടികൂടി വന്ധ്യംകരണ ശസ്ത്രക്രിയക്ക് വിധേയമാക്കുകയും പേവിഷ ബാധക്കെതിരായ കുത്തിവെപ്പ് നടത്തുകയുമാണ് പദ്ധതിയുടെ ഭാഗമായി ചെയ്യുക. അതിനുള്ള സംവിധാനങ്ങള്‍ പാപ്പിനിശ്ശേരിയിലെ ഉപകേന്ദ്രത്തില്‍ ഒരുക്കിയിട്ടുണ്ട്. ചെവിയില്‍ അടയാളമിട്ട ശേഷം പിടികൂടുന്ന സ്ഥലത്ത് തന്നെ വന്ധ്യംകരിച്ച നായകളെ കൊണ്ടുവിടും. വന്ധ്യംകരിക്കുന്നതോടെ നായകളുടെ ശൗര്യവും ആക്രമണ പ്രവണതയും കുറയും. പേവിഷ ബാധക്കെതിരായ കുത്തിവെപ്പ് നല്‍കുന്നതിനാല്‍ പേയിളകാനുള്ള സാധ്യതയും ഇല്ലാതാകും. പാപ്പിനിശ്ശേരി, അഴീക്കോട്, മയ്യില്‍, കണ്ണൂര്‍ കോര്‍പ്പറേഷന്‍ തുടങ്ങിയ തെരുവുനായ ശല്യം രൂക്ഷമായ പ്രദേശങ്ങള്‍ കേന്ദ്രീകരിച്ചാണ് ആരംഭഘട്ടത്തില്‍ പദ്ധതിനടപ്പാക്കുന്നത്.. പദ്ധതി ശരിയായ രീതിയില്‍ നടക്കുന്നുവെന്ന് ഉറപ്പുവരുത്തുന്നതിന് വിവിധ തലങ്ങളിലായി ജനപ്രതിനിധികളുടെ നേതൃത്വത്തില്‍ മോണിറ്ററിംഗ് കമ്മിറ്റികളും സാങ്കേതിക മേല്‍നോട്ടം വഹിക്കുന്നതിന് വെറ്ററിനറി ഓഫീസര്‍മാരടങ്ങുന്ന ടെക്‌നിക്കല്‍ കമ്മിറ്റികളും രൂപീകരിച്ചിട്ടുണ്ട്. ചടങ്ങില്‍ മേയര്‍ ഇ.പി.ലത, ജില്ലാ പഞ്ചായത്ത് വൈസ് പ്രസിഡന്റ് പി.പി ദിവ്യ, പഞ്ചായത്ത് പ്രസിഡന്റ് കെ നാരായണന്‍, ജില്ലാ പഞ്ചായത്ത് സ്റ്റാന്റിങ്ങ് കമ്മിറ്റി ചെയര്‍മാന്‍മാരായ വി.കെ.സുരേഷ്ബാബു, കെ.പി.ജയബാലന്‍, ടി.ടി.റംല, കെ.ശോഭ, മെമ്പര്‍മാരായ പി.പി.ഷാജിര്‍, തോമസ് വര്‍ഗീസ്, അജിത്ത് മാട്ടൂല്‍, അന്‍സാരി തില്ലങ്കേരി, ജോയി കൊന്നക്കല്‍, മൃഗസംരക്ഷണ വകുപ്പ് ഡെപ്യൂട്ടി ഡയറക്ടര്‍ ഡോ.ടി.വി.ഉണ്ണികൃഷ്ണന്‍, ജില്ലാ മൃഗസംരക്ഷണ ഓഫീസര്‍ ഡോ.പി.പി.കണാരന്‍, എസ്എല്‍ബിപി ഡെപ്യൂട്ടി ഡയറക്ടര്‍ ഡോ.ഖലീല്‍ സി കെ, ഡോ.പി.വി.മോഹനന്‍, പീപ്പിള്‍ ഫോര്‍ ആനിമല്‍ വെല്‍ഫേര്‍ കമ്മിറ്റി പ്രസിഡണ്ട് സുഷമാ പ്രഭു, ജില്ലാപഞ്ചായത്ത് മുന്‍ സെക്രട്ടറി എം.കെ.ശ്രീജിത്ത് തുടങ്ങിയവര്‍ സംസാരിച്ചു.

പ്രതികരിക്കാന്‍ ഇവിടെ എഴുതുക:

ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. പ്രതികരണങ്ങളില്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. വായനക്കാരുടെ അഭിപ്രായങ്ങള്‍ ജന്മഭൂമിയുടേതല്ല.