കൊച്ചി: കേരള ബ്ലാസ്റ്റേഴ്സിന് ഇന്ന് രണ്ടാം നാട്ടങ്കം. തുടരെ രണ്ടു തോല്വികളുടെ ക്ഷീണം തീര്ക്കാന്, ജയിക്കാനുറച്ച് ദല്ഹി ഡൈനാമോസിനോട് കൊമ്പുകോര്ക്കുന്നു. രാത്രി ഏഴിന് കലൂര് രാജ്യാന്തര സ്റ്റേഡിയത്തില് പോരാട്ടം.
ആദ്യ കളിയില് ഗുവാഹതിയില് നോര്ത്ത് ഇൗസ്റ്റിനോടും കഴിഞ്ഞ ദിവസം കൊച്ചിയില് അത്ലറ്റികോയോടും തോറ്റതോടെ പ്രതിസന്ധിയിലായ ആതിഥേയര്ക്ക് ജയത്തെക്കുറിച്ചൊന്നും ചിന്തിക്കാനാകില്ല. കഴിഞ്ഞ രണ്ടു കളിയിലും വ്യത്യസ്ത താരങ്ങളെ പരീക്ഷിച്ച സ്റ്റീവ് കോപ്പല് ഇന്ന് എന്താകും കരുതിയിട്ടുള്ളതെന്നാണ് ആരാധകരുടെ ചോദ്യം.
അത്ലറ്റികോയ്ക്കെതിരെ പ്രകടനം മെച്ചപ്പെട്ടുവെങ്കിലും മധ്യ-മുന്നേറ്റ നിരകള് ഇണങ്ങിച്ചേരാത്തത് തിരിച്ചടിയായി. പന്ത് കൈവശം വെക്കുന്നതില് വിജയിച്ചുവെങ്കിലും ഭാവനാപൂര്ണമായ മുന്നേറ്റങ്ങള്ക്കായില്ല. കഴിഞ്ഞ രണ്ട് കളികളിലും 4-4-2 ശൈലിയിലാണ് കൊപ്പല് ടീമിനെ കളത്തിലെത്തിച്ചത്. എന്നാല് കളിക്കാരെയും പൊസിഷനും അഴിച്ചുപണിതു. മാര്ക്വീ താരം ആരോണ് ഹ്യൂഗസ് രാജ്യത്തിന് കളിക്കാനായി മടങ്ങിയതതോടെ പ്രതിരോധത്തില് നാഥനില്ലാത്ത അവസ്ഥ. പകരം ഇടതുവിങ് ബാക്കായി എത്തിയത് സ്പാനിഷ് പ്ലേ മേക്കറും വിങ്ങറുമായ ഹോസു കുരായിസ്.
ഹോസു വിങ്ങുകളിലൂടെ മികച്ച മുന്നേറ്റം നടത്തിയെങ്കിലും സഹതാരങ്ങളില് നിന്ന് വേണ്ടത്ര പിന്തുണ കിട്ടിയില്ല. മുന്നേറ്റനിരയില് അന്റോണിയോ ജര്മനും ഡക്കന്സ് നാസണുമായിരുന്നു ഇറങ്ങിയത്. ജര്മ്മന് നിറംമങ്ങിയപ്പോള് നാസണ് മികച്ചുനിന്നു. ഇന്നും ഇവര് തന്നെയാകും ആദ്യ ഇലവനില് ഇടംപിടിക്കുക. മധ്യനിരയില് സി.കെ. വിനീതിന്റെയും റിനോ ആന്റോയുടെയും അഭാവം നിഴലിക്കുന്നു.
അതേസമയം, നിലവിലെ ചാമ്പ്യന്മാരായ ചെന്നൈയിന് എഫ്സിയെ ആദ്യ മത്സരത്തില് അവരുടെ തട്ടകത്തില് ചെന്ന് തകര്ത്തതിന്റെ ആത്മവിശ്വാസത്തിലാണ് ദല്ഹി ഡൈനാമോസ്. വിഖ്യാത ഇറ്റാലിയന് ഡിഫന്ഡര് ജിയാന്ലൂക്ക സംബ്രോട്ടയുടെ പരിശീലനത്തിനു കീഴിലെത്തുന്ന ദല്ഹി ആധികാരിക പ്രകടനമാണ് ആദ്യ കളിയില് പുറത്തെടുത്തത്. ഒന്നിനെതിരെ മൂന്ന് ഗോളുകള്ക്ക് ജയം. 4-1-4-1 ശൈലിയിലാണ് അവര് മൈതാനത്തെത്തിയത്. ഇന്നും അതേ രീതി തുടരുമെന്നു സൂചന.
ഘാന താരം റിച്ചാര്ഡ് ഗാഡ്സെയെ സ്ട്രൈക്കറായി ഇറക്കുന്ന ടീമില് ബ്രസീല് താരങ്ങളായ മാഴ്സെലോ പെരേര, എമേഴ്സണ് മൗറ എന്നിവര് ഏറെക്കുറെ ഉറപ്പ്. കഴിഞ്ഞ കൡയിലെന്നപോലെ മാര്ക്വീ താരം ഫ്ളോറന്റ് മലൂദ ഇന്നും പകരക്കാരന്റെ റോളിലാകും കളത്തിലെത്തുക. ഗോള്കീപ്പറായി സ്പാനിഷ് താരം ടോണി ടൊബ്ലാസും പ്രതിരോധത്തില് മലയാളി താരം അനസും ഡിഫന്സീവ് മിഡ്ഫീല്ഡറായി മാര്ക്കോസ് ടെബറും ഇറങ്ങിയേക്കും.
കഴിഞ്ഞ സീസണില് കൊച്ചിയില് നടന്ന മത്സരത്തില് ഡൈനാമോസ് 1-0ന് ബ്ലാസ്റ്റേഴ്സിനെ തോല്പ്പിച്ചു. എവേ മത്സരത്തില് 3-3ന് സമനില. ആദ്യ ജയത്തിന് ബ്ലാസ്റ്റേഴ്സും ജയം തുടരാന് ദല്ഹിയും കച്ചമുറുക്കുമ്പോള് ആവേശം അലകടലാകുമെന്നുറപ്പ്.
പ്രതികരിക്കാൻ ഇവിടെ എഴുതുക: