പാനൂര്: പാനൂര് റീജിയണല് വനിതാ സഹകരണ സംഘം പുതിയ ഓഫീസ് കെട്ടിടം ഒ.രാജഗോപാല് എംഎല്എ ഉദ്ഘാടനം ചെയ്തു. സഹകരണ മേഖലയില് നൂതനമായ മാറ്റം അനിവാര്യമാണെന്നും ഇവിടെ രാഷ്ട്രീയം കലര്ത്തുന്നത് നീതികരിക്കാന് പറ്റാത്തതും അപലപനീയവുമാണെന്നും പാനൂര് ഹൈസ്കൂള് ഗ്രൗണ്ടില് നടന്ന ഉദ്ഘാടന സമ്മേളനത്തില് ഒ.രാജഗോപാല് ചൂണ്ടിക്കാട്ടി. കണ്ണൂര് എന്ന ജില്ല തലവെട്ട് ജില്ലയെന്ന കുപ്രസിദ്ധിയിലാണ് പുറത്ത് അറിയപ്പെടുന്നത്. ഇതിനെതിരെ സ്ത്രീകളുടെ കൂട്ടായ്മകള് ഉയര്ന്നു വരേണ്ടതുണ്ട്. ഇത്തരം സഹകരണസ്ഥാപനങ്ങളിലൂടെ മഹിളകള് രംഗത്തുവന്നാല് തന്നെ ജില്ലയുടെ കുപ്രസിദ്ധി മാറും. പരസ്പരം സഹകരണവും സ്നേഹവുമാണ് ഭാരതീയ ദര്ശനം ഉദ്ഘോഷിക്കുന്നത്. പാശ്ചാത്യചിന്തകളിലെ വര്ഗസമരവും സംഘര്ഷവുമല്ല നമുക്കു വേണ്ടതെന്നും, സമന്വയമാണെന്നും അദ്ദേഹം തുടര്ന്നു പറഞ്ഞു. സഹകാര്ഭാരതി സംസ്ഥാന പ്രസിഡണ്ട് എന്.സദാനന്ദന് അധ്യക്ഷത വഹിച്ചു. പാനൂര് നഗരസഭ വൈസ്ചെയര്മാന് എം.കെ.പത്മനാഭന് മാസ്റ്റര് ലോക്കറിന്റെ ഉദ്ഘാടനം നിര്വ്വഹിച്ചു. ബിജെപി ജില്ലാപ്രസിഡണ്ട് പി.സത്യപ്രകാശ്, വി.സുരേന്ദ്രന്, സി.വിജയന്, പി.കെ.പ്രവീണ്, പി.കെ.ഷാഹുല്ഹമീദ്, എന്.കെ.നാണു, സി.കെ.കുഞ്ഞിക്കണ്ണന്, വി.പി. ഷാജി, കെ.കുമാരന്, കെ.സന്തോഷ്, എ.പി.വസന്ത എന്നിവര് പ്രസംഗിച്ചു. സഹകരണസംഘം പ്രസിഡണ്ട് കെ.വി.ഉഷ സ്വാഗതവും സെക്രട്ടറി കെ.ടി.സജില നന്ദിയും പറഞ്ഞു. എന്.രതി ഉപഹാര സമര്പ്പണം നടത്തി. ചെണ്ടമേളങ്ങളുടെ അകമ്പടിയോടെ പാനൂര് ടൗണില് ഒ.രാജഗോപാലിന് ഹൃദ്യമായ സ്വീകരണം നല്കി.
പ്രതികരിക്കാൻ ഇവിടെ എഴുതുക: