ന്യൂദല്ഹി: ഭാരതത്തിന്റെ ആദ്യ ആണവ അന്തര്വാഹിനി ഐഎന്എസ് അരിഹന്ത് കമ്മീഷന് ചെയ്തതോടെ ഇന്ത്യന് മഹാസമുദ്രത്തിലെ ശാക്തിക സമവാക്യങ്ങള് മാറും. കരയില് നിന്നും ആകാശത്തുനിന്നും കടലില് നിന്നും ആണവായുധങ്ങള് വിക്ഷേപിക്കാനുള്ള ശേഷിയാണ് ഭാരതം കൈവരിച്ചത്. അമേരിക്ക, റഷ്യ, ബ്രിട്ടന്, ഫ്രാന്സ്, ചൈന എന്നീ രാജ്യങ്ങള്ക്കൊപ്പം ആണവമുങ്ങിക്കപ്പല് ക്ലബിലെ അംഗമായി ഭാരതവും മാറി.
അരിഹന്ത് എന്ന വാക്കിന്റെ അര്ത്ഥം ശത്രുഘാതകന് എന്നാണ്. 6000 ടണ് ഭാരമുള്ള അന്തര്വാഹിനി ഇന്ത്യന് മഹാസമുദ്രത്തില് ആധിപത്യം ഉറപ്പിക്കാന് ശ്രമിക്കുന്ന ചൈനീസ് ആണവ അന്തര്വാഹിനികള്ക്കുള്ള മുന്നറിയിപ്പാണ്. പ്രധാനമന്ത്രിയുടെ ഓഫീസിന്റെ നിര്ദ്ദേശ പ്രകാരം ആഗസ്തില് വിശാഖപട്ടണത്ത് അരിഹന്തിന്റെ കമ്മീഷന് അതീവരഹസ്യമായി നടത്തിയ വിവരം ഇപ്പോഴാണ് പുറത്തുവന്നത്. 3,500 കിലോമീറ്റര് ദൂരപരിധിയുള്ള ആണവ പോര്മുനകള് ഘടിപ്പിച്ച ബാലിസ്റ്റിക് മിസൈലുകളാണ് ഐഎന്എസ് അരിഹന്തിന്റെ ശക്തി.
പൂര്ണ്ണമായും തദ്ദേശീയമായി നിര്മ്മിച്ച അന്തര്വാഹിനിയാണ് അരിഹന്ത്. അകുല വിഭാഗത്തില് പെട്ട അന്തര്വാഹിനികളുടെ തുടര്ച്ചയായാണ് നാവിക സേന അരിഹന്തിന് രൂപകല്പ്പന ചെയ്തത്. യുറേനിയം അടിസ്ഥാനമാക്കി പ്രവര്ത്തിക്കുന്ന 83 മെഗാവാട്ട് ലൈറ്റ് വാട്ടര് റിയാക്ടറാണ് ആണവ ശക്തി നല്കുന്നത്. 750 കിലോമീറ്റര് ദൂരപരിധിയുള്ള പന്ത്രണ്ട് കെ.-15 ബാലിസ്റ്റിക് മിസൈലുകളും 3500 കിലോമീറ്ററെത്തുന്ന നാല് കെ-4 ബാലിസ്റ്റിക് മിസൈലുകളും വഹിക്കാനുള്ള ശേഷിയാണ് അരിഹന്തിനുള്ളത്. നൂറോളം നാവികരെയും വഹിക്കാം.
2014 ഡിസംബര് 15ന് പരീക്ഷണയാത്രകള്ക്കായി കടലിലിറക്കിയ അരിഹന്ത് രണ്ടുവര്ഷത്തിന് ശേഷമാണ് പൂര്ണ്ണമായി പ്രവര്ത്തന സജ്ജമായത്. ഇന്ത്യന് മഹാസമുദ്രത്തില് വിന്യസിച്ചിരിക്കുന്ന ചൈനീസ് ആണവ അന്തര്വാഹനികളുടെ സാന്നിധ്യം ഭീഷണിയുയര്ത്തുന്ന സാഹചര്യത്തിലാണ് അരിഹന്ത് നാവികസേനയ്ക്ക് കരുത്ത് പകരുന്നത്. 2018ഓടെ രണ്ടാമത്തെ ആണവ അന്തര്വാഹിനിയായ ഐഎന്എസ് അരിധമനും കമ്മീഷന് ചെയ്യും. അരിഹന്ത് വിഭാഗത്തിലെ മൂന്ന് അന്തര്വാഹനികള് ഭാരതം നിര്മ്മിക്കുന്നുണ്ട്.
5,000 കിലോമീറ്റര് ദൂരപരിധിയില്വരെ ആണവ മിസൈലുകള് തൊടുക്കാന് ശേഷിയുള്ള ജിന്,സിയ, താങ് വിഭാഗത്തില് പെട്ട 4 ആണവ അന്തര്വാഹനികളാണ് ചൈനയുടെ പക്കലുള്ളത്. 2020 ഓടെ ആണവ അന്തര്വാഹനികളുടെ എണ്ണം 8 ആയി ഉയര്ത്താനാണ് ചൈനീസ് പദ്ധതി. എങ്കിലും ആണവ അന്തര്വാഹനി ക്ലബിലേക്ക് ഭാരതം കൂടി കടന്നെത്തുന്നതോടെ മേഖലയില് ശാക്തിക പ്രതിരോധം ഉയര്ത്താന് നമുക്ക് സാധിച്ചിട്ടുണ്ട്.
പ്രതികരിക്കാൻ ഇവിടെ എഴുതുക: