കണ്ണൂര്: സര്ക്കസ് പരമ്പര തനത് ശൈലി നിലനിര്ത്തിക്കൊണ്ട് സാങ്കേതിക വിദ്യകള് കൂട്ടിയിണക്കി നിറപ്പകിട്ടാര്ന്ന കലാരൂപം കാഴ്ചവെക്കാനായി ഗ്രാന്റ് സര്ക്കസ് 22ന് വൈകീട്ട് ഏഴരക്ക് പൊലീസ് മൈതാനിയില് ആരംഭിക്കുന്നു. മേയര് ഇ പി ലതയുടെ അധ്യക്ഷതയില് മന്ത്രി കടന്നപ്പള്ളി രാമചന്ദ്രന് ഉദ്ഘാടനം നിര്വ്വഹിക്കുമെന്ന് പ്രൊപ്രൈറ്റര് എ.ചന്ദ്രന് വാര്ത്താസമ്മേളനത്തില് അറിയിച്ചു.
പാശ്ചാത്യസംഗീതത്തിന്റെയും എല് ഇ ഡി ലേസര് ലൈറ്റിന്റെ മാസ്മരിക പ്രകാശത്തിന്റെയും അകമ്പടിയോടെ ആഫ്രിക്കന് കലാകാരന്മാരും മണിപ്പൂരി കലാകാരന്മാരും ഒത്തുചേര്ന്ന് അവതരിപ്പിക്കുന്ന ഉജ്ജ്വലവും നയനമനോഹരമായ കലാസൃഷ്ടികളുമാണ് ഗ്രാന്റ് സര്ക്കസിന്റെ ഇത്തവണത്തെ പ്രധാന ആകര്ഷണം. റഷ്യന്കലാകാരന്മാരില് നിന്നും പരിശീലനം ലഭിച്ച ഇന്ത്യയിലെ പത്തോളം സംസ്ഥാനങ്ങളില് നിന്നുള്ളവരുടെ മികച്ച പ്രകടനവും സര്ക്കസില് കാണുവാന് സാധിക്കും. രണ്ട് മണിക്കൂര് നേരത്തെ വിസ്മയകരമായ പ്രകടനത്തില് മുപ്പതോളം ഇനങ്ങളാണ് അവതരിപ്പിക്കപ്പെടുക. 23 മുതല് എല്ലാ ദിവസവും ഉച്ചക്ക് ഒരു മണി, വൈകീട്ട് നാല് മണി, ഏഴ് മണി എന്നിങ്ങനെയാണ് സര്ക്കസിന്റെ സമയക്രമം. 100, 150, 200 എന്നിങ്ങനെയാണ് ടിക്കറ്റ് നിരക്ക്. ഉദ്ഘാടന ചടങ്ങില് കലക്ടര് മീര് മുഹമ്മദലി, ജില്ലാ പൊലീസ് മേധാവി സഞ്ജയ്കുമാര് ഗുരുഡിന്, കോര്പ്പറേഷന് ഡെപ്യൂട്ടി മേയര് പി.കെ.രാഗേഷ് തുടങ്ങിയവര് സംബന്ധിക്കും. മാനേജര്മാരായ സി.രാജന്, എസ്.എ ഹനീഫ്, ജയകൃഷ്ണന് എന്നിവരും വാര്ത്താസമ്മേളനത്തില് പങ്കെടുത്തു.
പ്രതികരിക്കാൻ ഇവിടെ എഴുതുക: