അമ്പലപ്പുഴ: മുഖമൂടി ധരിച്ച് വീടുകയറി ആക്രമണം നടത്തിയ അഞ്ച് യുവാക്കള് അറസ്റ്റില്. പുന്നപ്ര തെക്ക് പഞ്ചായത്ത് 15-ാം വാര്ഡില് വിയാനി കൊച്ചിക്കാരന് വീട്ടില് ജോണിയുടെ മകന് തെയ്യപ്പന് എന്നു വിളിക്കുന്ന ടോണി (21), വിയാനി പുത്തന്പുരയ്ക്കല് കുഞ്ഞുമോന്റെ മകന് ജിബിന്(19), വിയാനി പള്ളിപറമ്പില് മോന്സി മോന്റെ മകന് എമ്പില് (20), അയ്യല്പ്പറമ്പില് സജിമോന്റെ മകന് സജിത്(21) എന്നിവരെയാണ് പുന്നപ്ര എസ്ഐ വി.ഡി. ശിവപ്രസാദിന്റെ നേതൃത്വത്തിലുള്ള സംഘം അറസ്റ്റ് ചെയ്തത്.
കഴിഞ്ഞ മാസം 15നുപുലര്ച്ചെ ഒരു മണിയോടെ പ്രതികള് സംഘം ചേര്ന്ന് പുന്നപ്ര കപ്പക്കട സായാഹ്നം വീട്ടില് പുഷ്കരന്റെ വീട്ടില് കയറി അക്രമങ്ങള് അഴിച്ചുവിടുകയും വീട്ടുപകരണങ്ങള് അടിച്ചു തകര്ക്കുകയുമായിരുന്നു. പ്രതികള്ക്കായി പോലീസ് അന്വേഷണം ഊര്ജ്ജിതമാക്കുകയായിരുന്നു. എന്നാല് സംഭവ ദിവസം ഇതില് ഒരു പ്രതി മുഖംമൂടി ധരിച്ചിട്ടില്ലായിരുന്നു.
ഇതേ സൂചനയില് അന്വേഷണം വ്യാപിപ്പിക്കുകയും ഇയാളെ കസ്റ്റഡിയിലെടുക്കുകയുമായിരുന്നു. പിന്നീടുള്ള ചോദ്യം ചെയ്യലില് മറ്റു പ്രതികളെപ്പറ്റി സൂചന ലഭിച്ചതിനെത്തുടര്ന്ന് ഇവരെ പുന്നപ്ര ചള്ളി കടപ്പുറത്തുനിന്നും പിടികൂടുകയായിരുന്നു. എസ്ഐക്കൊപ്പം സീനിയര് സിവില് പോലീസ് ഓഫീസര്മാരായ നിഥില്, വേണുഗോപാല്, അഗസ്റ്റിന്, സിദ്ധിക്ക്, പ്രദീപ് എന്നിവരും പോലീസ് സംഘത്തിലുണ്ടായിരുന്നു.
അമ്പലപ്പുഴ മജിസ്ട്രേറ്റ് കോടതിയില് ഹാജരാക്കിയ പ്രതികളെ 14 ദിവസത്തേക്ക് റിമാന്റ് ചെയ്തു.
പ്രതികരിക്കാൻ ഇവിടെ എഴുതുക: