കൊച്ചി: ബ്രോഡ് വേയില് വ്യാപാര സ്ഥാപനത്തിന് തീപിടിച്ച് ലക്ഷങ്ങളുടെ നാശനഷ്ടം. ബ്രോഡ് വേ പോസ്റ്റ് ഓഫീസിനു സമീപമുള്ള ഗെയിം സോണ് എന്ന കടയ്ക്കാണ് തീപിടിച്ചത്. കളിപ്പാട്ടങ്ങള്, കുട്ടികളുടെ വസ്ത്രങ്ങള് എന്നിവ വില്ക്കുന്ന കടയാണിത്. ഇന്നലെ പുലര്ച്ചെ 5.30നാണ് തീപിടിത്തമുണ്ടായത്. സ്ഥാപനവും അതിലുണ്ടായിരുന്ന സാധനങ്ങളും പൂര്ണമായി കത്തിനശിച്ചു. എകദേശം 35 ലക്ഷം രൂപയുടെ നഷ്ടം കണക്കാക്കുന്നതായി കടയുടമ പറഞ്ഞു. നോട്ട് ക്ഷാമത്തെ തുടര്ന്ന് കച്ചവടം കുറവായതിനാല് കടയില് സാധനങ്ങള് കൂടുതല് ഉണ്ടായിരുന്നു. ഇതാണ് നഷ്ടം വര്ധിക്കാന് കാരണമായത്. ഷോര്ട്ട് സര്ക്യൂട്ടാണ് തീപിടിത്തത്തിന് കാരണമെന്നാണ് പ്രാഥമിക നിഗമനം.
അഗ്നിശമന സേനയെത്തി ഒരു മണിക്കൂര് പരിശ്രമിച്ചാണ് തീയണച്ചത്. കെട്ടിടത്തിന്റെ താഴത്തെ നിലയില് രണ്ടു ഷട്ടറുകളായാണ് വ്യാപാരസ്ഥാപനം പ്രവര്ത്തിക്കുന്നത്. മുകള് നിലയിലേക്കും അടുത്ത സ്ഥാപനങ്ങളിലേക്കും തീ പടരും മുമ്പ് അണയ്ക്കാന് സാധിച്ചതു വന് ദുരന്തം ഒഴിവാക്കി. കെട്ടിടത്തിന്റെ മുകള്നില ഓടിട്ടതാണ്. സെന്ട്രല് പോലീസ് അന്വേഷണം ആരംഭിച്ചു. ക്ലബ് റോഡ് ഫയര് സ്റ്റേഷന് ഓഫിസര് സാബു തോമസ്, അസിസ്റ്റന്റ് സ്റ്റേഷന് ഓഫീസര് കെ.വി മനോഹരന് എന്നിവര് തീയണയ്ക്കാന് നേതൃത്വം നല്കി.
പ്രതികരിക്കാൻ ഇവിടെ എഴുതുക: