കണ്ണൂര്: ജില്ലാ പഞ്ചായത്തിന്റെ നേതൃത്വത്തില് നടപ്പാക്കിവരുന്ന സമഗ്രവിദ്യാഭ്യാസ പദ്ധതിയുടെ ഭാഗമായി ജില്ലയിലെ മുഴുവന് സ്കൂളുകളെയും ലഹരിവിമുക്തമാക്കുകയെന്ന ലക്ഷ്യത്തോടെ ആരംഭിക്കുന്ന ലഹരിവിരുദ്ധ ക്യാംപയിന്റെ ജില്ലാതല ഉദ്ഘാടനം മന്ത്രി ടി.പിരാമകൃഷ്ണന് നിര്വഹിക്കും. 22ന് രാവിലെ 9 മണിക്ക് മുനിസിപ്പല് ഹയര്സെക്കന്ററി സ്കൂളിലാണ് പരിപാടി. ചടങ്ങില് ജില്ലാ പഞ്ചായത്ത് പ്രസിഡന്റ് കെ.വി.സുമേഷ് അധ്യക്ഷനാവും. ബ്രോഷര് പ്രകാശനം മേയര് ഇ.പി.ലത നിര്വഹിക്കും. എക്സൈസ് വകുപ്പുമായി സഹകരിച്ചാണ് പരിപാടികള് സംഘടിപ്പിക്കുകയെന്ന് ജില്ലാ പഞ്ചായത്ത് പ്രസിഡന്റ് കെ.വി സുമേഷ് വാര്ത്താസമ്മേളനത്തില് അറിയിച്ചു.
ജില്ലയിലെ മുഴുവന് സര്ക്കാര്-എയിഡഡ്-അണ് എയിഡഡ് സ്കൂളുകളിലെയും പ്രിന്സിപ്പല്മാര്, പ്രധാനാധ്യാപകര്, ലഹരിവിരുദ്ധ ക്ലബ്ബിന്റെ ചുമതലയുള്ള അധ്യാപകര്, സ്കൂള് ലീഡര്മാര് തുടങ്ങിയവര് പരിപാടിയില് പങ്കെടുക്കും.
മൂന്നുമാസം നീണ്ടുനില്ക്കുന്ന ക്യാംപയിന്റെ ഭാഗമായി സ്കൂളുകളില് ലഹരിവിരുദ്ധ സേനകള്ക്ക് രൂപം നല്കും. വിദ്യാലയങ്ങള് കേന്ദ്രീകരിച്ച് നടക്കുന്ന ലഹരി ഉപയോഗം, വില്പ്പന തുടങ്ങിയവയുടെ വിവരങ്ങള് ശേഖരിച്ച് ബന്ധപ്പെട്ടവരുടെ ശ്രദ്ധയില്പ്പെടുത്തുന്നതിനു വേണ്ടിയാണിത്. വിദ്യാര്ഥികളെയും രക്ഷിതാക്കളെയും പങ്കെടുപ്പിച്ചുള്ള ലഹരിവിരുദ്ധ ബോധവല്ക്കരണ പരിപാടികള്, സമൂഹത്തിന്റെ വിവിധ മേഖലകളില് പ്രവര്ത്തിക്കുന്നവരെ ഉള്പ്പെടുത്തി വിദ്യാലയ സംരക്ഷണ സമിതി രൂപീകരണം എന്നിവയും ഇതിന്റെ ഭാഗമായി നടക്കും. ബോധവല്ക്കരണ പ്രവര്ത്തനങ്ങളുടെ ഭാഗമായി ലഹരി വിരുദ്ധ പ്രതിജ്ഞകള്, ജാഥകള്, നാടകങ്ങള്, ചിത്രരചന-പോസ്റ്റര് രചന-കവിതാരചന- പ്രസംഗ മല്സരങ്ങള്, സിനിമ-ഡോക്യുമെന്ററി പ്രദര്ശനങ്ങള്, കൗണ്സലിംഗ് സെഷനുകള്, മോട്ടിവേഷന് ക്ലാസ്സുകള് തുടങ്ങിയവ സംഘടിപ്പിക്കും. ക്യാംപയിന് കാലത്ത് മാസത്തില് രണ്ട് എന്ന തോതില് സ്കൂളുകള് കേന്ദ്രീകരിച്ച് പ്രധാന പരിപാടികള് സംഘടിപ്പിക്കും.
വിദ്യാലയങ്ങളില് വ്യാപകമായിക്കൊണ്ടിരിക്കുന്ന ലഹരി ഉപയോഗവും അതിലേക്ക് വഴിയൊരുക്കുന്ന സാഹചര്യവും ഇല്ലാതാക്കുകയാണ് ലക്ഷ്യമിടുന്നതെന്ന് ജില്ലാ പഞ്ചായത്ത് പ്രസിഡന്റ് പറഞ്ഞു. കുട്ടികളെ ലഹരിയുടെ അടിമകളാക്കാന് വന് മാഫിയ തന്നെ രംഗത്തുണ്ട്. ജനകീയ പങ്കാളിത്തത്തോടെ മാത്രമേ അവയെ ഇല്ലാതാക്കാനാവൂ എന്നും അദ്ദേഹം പറഞ്ഞു. ജില്ലാ പഞ്ചായത്ത് വൈസ് പ്രസിഡന്റ് പി.പി.ദിവ്യ, സ്റ്റാന്ഡിംഗ് കമ്മിറ്റി ചെയര്മാന്മാരായ കെ.പി.ജയബാലന് മാസ്റ്റര്, വി.കെ.സുരേഷ് ബാബു, ടി.ടി.റംല, ഡയറ്റ് പ്രിന്സിപ്പല് കെ.ബാലകൃഷ്ണന് മാസ്റ്റര്, ജില്ലാ പഞ്ചായത്ത് പ്ലാന് കോ-ഓഡിനേറ്റര് കെ.പി.ഗോവിന്ദന് തുടങ്ങിയവരും വാര്ത്താസമ്മേളനത്തില് സംബന്ധിച്ചു.
പ്രതികരിക്കാൻ ഇവിടെ എഴുതുക: