കോട്ടയം: ദര്ശന അന്താരാഷ്ട്ര പുസ്തകമേളയോടനുബന്ധിച്ച് നല്കിവരുന്ന ദേശീയ പുസ്തക അവാര്ഡുകള് പ്രഖ്യാപിച്ചു. മുദ്രണത്തിലുള്ള മികവ്, സാമൂഹ്യ പ്രതിബദ്ധതയുള്ള വിഷയം, വിന്യാസത്തിലുള്ള സവിശേഷത, നിര്മ്മിതിയിലുള്ള അവധാനത തുടങ്ങിയ മാനദണ്ഡളുടെ അടിസ്ഥാനത്തിലാണ് പുരസ്കാരങ്ങള് നല്കുന്നത്.
പുസ്തക നിര്മ്മിതിയിലെ മികവിനുള്ള പുരസ്കാരം മലയാളം വിഭാഗത്തില് മനോരമ ബുക്സിന്റെ ‘പൂക്കള് അലങ്കാരത്തിനും ആദായത്തിനും’ എന്ന പുസ്തകത്തിനാണ്. ഈ വിഭാഗത്തില് ഡി.സി ബുക്സ് പ്രസിദ്ധീകരിച്ച ദലയ്ലാമ വിശേഷാല് പുരസ്കാരം നേടി. ഇംഗ്ലീഷ് വിഭാഗത്തില് തിരുവല്ലയിലെ പീസ് പീപ്പിള് പ്ലാനറ്റ് പ്രസിദ്ധീകരിച്ച ദ ടെന്റ് ഓഫ് പില്ഗ്രിം ഇന് എക്സൈലിനാണ് സമ്മാനം.
മികച്ച കവര് ഡിസൈന് അവാര്ഡ് ഡി.സി. ബുക്സിന്റെ കൊല്ലപ്പാട്ടി ദയയ്ക്കാണ്. മികച്ച ബാലസാഹിത്യ ഗ്രന്ഥത്തിനുള്ള പ്രഥമ പുരസ്കാരം ഇംഗ്ലീഷ് വിഭാഗത്തില് ക്രാഫ്റ്റ് കോമിക്സിന്റെ ലിയോ ഗ്രാന്ഡ് പാ ആന്ഡ് ദ വണ്ടര് ബെഡ് നേടി. മലയാളം വിഭാഗത്തില് ലിപി പബ്ളിക്കേഷന്റെ കുഞ്ഞുറുമ്പും മാടപ്രാവും, ഡി.സി ബുക്സിന്റെ നാറാണത്തു ഭ്രാന്തന് എന്നീ പുസ്തകങ്ങള്ക്കാണ് പുരസ്കാരങ്ങള്. ഐടി വിഭാഗത്തില് ഡി സി ബുക്സിന്റെ മൊബൈലും ജയിലും അവാര്ഡ് നേടി.
മികച്ച പ്രചോദനാത്മക ഗ്രന്ഥങ്ങള്ക്കുള്ള അവാര്ഡ് മാതൃഭൂമിയുടെ ഒന്നിനും തോല്ക്കാതിരിക്കാന്, മനോരമയുടെ വിജയത്തിനു വിശ്വജ്ഞാനം എന്നീ പുസ്തകങ്ങള്ക്കാണ്. ഇംഗ്ലീഷ് വിഭാഗത്തില് വൈറ്റ് ഫാള്ക്കന്റെ ദ സ്കേല്സ് ഓഫ് ട്രൂത്ത് വിശേഷാല് പുരസ്കാരം നേടി. ശനിയാഴ്ച വൈകുന്നേരം നടക്കുന്ന പുരസ്കാര സായാഹ്നത്തില് ജസ്റ്റീസ് കെ.ടി. തോമസ് അവാര്ഡുകള് വിതരണം ചെയ്യും.
പ്രതികരിക്കാൻ ഇവിടെ എഴുതുക: