കൊച്ചി: സ്ത്രീകളുടെ സുരക്ഷയ്ക്കായി കൊച്ചി നഗരത്തില് ഒരുങ്ങുന്ന പിങ്ക് പോലീസ് സംവിധാനം മുഖ്യമന്ത്രി പിണറായി വിജയന് ഇന്ന് രാവിലെ 10.30ന് ദര്ബാര് ഹാള് ഗ്രൗണ്ടില് ഫ്ളാഗ് ഓഫ് ചെയ്യും. നാലു വാഹനങ്ങളാണ് പിങ്ക് പട്രോളിങ്ങിന്റെ ഭാഗമായി നിരത്തിലിറങ്ങുക. ജിപിഎസ് സംവിധാനവും ക്യാമറയുമുള്പ്പെടെ പ്രത്യേകം സജ്ജീകരണങ്ങളുള്ള ഈ വാഹനത്തില് ഡ്രൈവറുള്പ്പെടെ പരിശീലനം നേടിയ നാലു വനിതാപോലീസ് ഉദ്യോഗസ്ഥര് വീതമാണുണ്ടാവുക. സ്ത്രീകള്ക്കുനേരെയുള്ള അക്രമം, സ്ത്രീ സുരക്ഷ എന്നിവയെ സംബന്ധിച്ച് കണ്ട്രോള് റൂമില് ലഭിക്കുന്ന വിവരങ്ങള് ഉടന് പിങ്ക് പട്രോള് വാഹനങ്ങള്ക്ക് കൈമാറുകയും അവര് സംഭവസ്ഥലത്തെത്തി നടപടികള് സ്വീകരിക്കുകയും ചെയ്യും. ആള്ത്തിരക്കുള്ള ഇടങ്ങളിലും സ്കൂള്, കോളേജ് പരിസരങ്ങളിലും സംഘം പട്രോളിങ് നടത്തും. രാവിലെ 8 മുതല് വൈകീട്ട് 8 മണിവരെയായിരിക്കും പിങ്ക് പട്രോളിങ് ടീം പ്രവര്ത്തിക്കുക. പട്രോള് സഹായത്തിനായി 1515 നമ്പരില് വിളിക്കാം. സ്ത്രീ സുരക്ഷയെ സംബന്ധിച്ച കാവലാള് എന്ന ഡോക്യുമെന്ററി പ്രദര്ശനവും നടത്തും. എഡിജിപി സന്ധ്യ, സിറ്റിപോലീസ് കമ്മീഷണര് എംപി ദിനേശ് തുടങ്ങിയവര് പങ്കെടുക്കും.
പ്രതികരിക്കാൻ ഇവിടെ എഴുതുക: