ലഹരിവിമുക്ത ക്യാംപയിന്‍

Wednesday 30 November 2016 12:22 am IST

കണ്ണൂര്‍: ജില്ലാപഞ്ചായത്ത് സംഘടിപ്പിച്ച എവെയര്‍ & എവെയ്ക്ക് ലഹരിവിമുക്ത ക്യാംപയിനിന്റെ ജില്ലാതല ഉദ്ഘാടനം മുന്‍സിപ്പല്‍ ഹയര്‍സെക്കന്ററി സ്‌കൂളില്‍ മന്ത്രി രാമചന്ദ്രന്‍ കടന്നപ്പള്ളി നിര്‍വ്വഹിച്ചു. ചടങ്ങില്‍ ജില്ലാപഞ്ചായത്ത് പ്രസിഡന്റ് കെ.വി.സുമേഷ് അധ്യക്ഷത വഹിച്ചു. എസ്.പി.സഞ്ജയ്കുമാര്‍ ഗുരുഡിന്‍, എക്‌സൈസ് ഡപ്യൂട്ടി കമ്മീഷണര്‍ പി.പി.സുരേന്ദ്രന്‍, വിവിധ സ്റ്റാന്റിംഗ്കമ്മറ്റി ചെയര്‍മാന്‍മാര്‍ തുടങ്ങിയവര്‍ സംസാരിച്ചു. ജില്ലാപഞ്ചായത്ത് ആരോഗ്യസ്റ്റാന്റിംഗ് കമ്മറ്റി ചെയര്‍മാന്‍ കെ.പി ജയബാലന്‍ ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. ലഹരിമുക്ത പദ്ധതിയെക്കുറിച്ച് കണ്ണൂര്‍ ഡയറ്റ് പ്രിന്‍സിപ്പല്‍ സി.എം ബാലകൃഷ്ണന്‍ വിശദീകരിച്ചു. എസ്പി സഞ്ജയ്കുമാര്‍ ഗുരുഡിന്‍ കെ.പി ജയബാലന് കൈമാറി ക്യാംപയിന്‍ ബ്രോഷര്‍ പ്രകാശനം ചെയ്തു. ജില്ലയിലെ മുഴുവന്‍ സ്‌കൂളുകളെയും ലഹരിവിമുക്തമാക്കുകയെന്ന ലക്ഷ്യത്തോടെ ജില്ലാ പഞ്ചായത്ത് സമഗ്രവിദ്യാഭ്യാസ പദ്ധതിയുടെ ഭാഗമായാണ് ലഹരിവിമുക്ത ക്യാംപയിന്‍ സംഘടിപ്പിക്കുന്നത്. ഒരു വര്‍ഷം സ്‌കൂള്‍ തലത്തിലും ജില്ലാതലത്തിലും നടത്തേണ്ട പ്രവര്‍ത്തനങ്ങളുടെ രൂപരേഖ ക്യാംപയിനില്‍ ചര്‍ച്ച ചെയ്തു. തുടര്‍ന്ന് നിഖി വേളം ഏകാങ്കനാടകം അവതരിപ്പിച്ചു. ഹയര്‍സെക്കന്ററി സ്‌കൂള്‍ പ്രിന്‍സിപ്പല്‍, ഹെഡ്മാസ്റ്റര്‍, പി.ടി.എ പ്രതിനിധികള്‍, ലഹരിവിരുദ്ധ ക്ലബ് കണ്‍വീനര്‍, സ്‌കൂള്‍ ലീഡര്‍ എന്നിവര്‍ പങ്കെടുത്തു. ലഹരി ഉപയോഗിക്കുന്ന വിദ്യാര്‍ഥികളെയും അവ എത്തിക്കുന്നവരെയും കുറിച്ചുള്ള വിവരങ്ങള്‍ നല്‍കുന്നതിന് വിദ്യാലയങ്ങളില്‍ ലഹരിവിരുദ്ധ സേന രൂപീകരണം, സമൂഹത്തിലെ വിവിധ തലങ്ങളിലുള്ളവരെ ഉള്‍പ്പെടുത്തി വിദ്യാലയ സംരക്ഷണ സമിതികളുണ്ടാക്കല്‍, ബോധവല്‍ക്കരണ പ്രവര്‍ത്തനങ്ങള്‍, ലഹരി വിരുദ്ധ പ്രവര്‍ത്തനങ്ങളില്‍ മുഴുവന്‍ വിദ്യാര്‍ഥികളെയും പങ്കാളികളാക്കുന്നതിനുള്ള വിവിധ പരിപാടികള്‍, സിനിമ-ഡോക്യുമെന്ററി പ്രദര്‍ശനങ്ങള്‍ തുടങ്ങിയവയാണ് കാംപയിന്റെ ഭാഗമായി നടക്കുക.

പ്രതികരിക്കാന്‍ ഇവിടെ എഴുതുക:

ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. പ്രതികരണങ്ങളില്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. വായനക്കാരുടെ അഭിപ്രായങ്ങള്‍ ജന്മഭൂമിയുടേതല്ല.