പാനൂര്: ധര്മ്മരാഷ്ട്രത്തിനായി വീരാഹുതി ചെയ്തവരെ സഹസ്രാബ്ദങ്ങള് കഴിഞ്ഞാലും ഓര്മ്മിക്കുന്നത് ഭാരതത്തിന്റെ മാത്രം പ്രത്യേകതയാണെന്നും സ്വര്ഗീയ കെ.ടി.ജയകൃഷ്ണന് മാസ്റ്ററെ ലോകം എന്നും സ്മരിക്കുന്നത് അദ്ദേഹം ധര്മ്മത്തിനായി വീരബലിദാനം ചെയ്തത് കൊണ്ടാണെന്നും വിദ്യാനികേതന് ദക്ഷിണക്ഷേത്രീയ സംഘടന സെക്രട്ടറി എന്.സി.ടി.രാജഗോപാല് പറഞ്ഞു. കെ.ടി.ജയകൃഷ്ണന്മാസ്റ്റര് അനുസ്മരണ സാംഘിക്കില് മുഖ്യപ്രഭാഷണം നടത്തുകയായിരുന്നു അദ്ദേഹം.രാഷ്ട്രത്തിനു വേണ്ടി ഒരു നിമിഷം മുന്പെ ബലിദാനം ചെയ്യാന് മത്സരിച്ച പൂര്വ്വസൂരികളുടെ നാടാണ് നമ്മുടേത്. അവരുടെ ലക്ഷ്യം രാഷ്ട്രത്തിന്റെ ധര്മ്മവും സംസ്ക്കാരവും നിലനിര്ത്തുക എന്നുളളതായിരുന്നു. ഒരു മഹിതമായ ലക്ഷ്യമാണ് ബലിദാനികളുടേത്. അങ്ങിനെയുളള ശ്രേഷ്ഠമായ ബലിദാന പരമ്പരയില് ഉള്പ്പെട്ടതാണ് കെ.ടി.ജയകൃഷ്ണന്മാസ്റ്ററുടെ വീരമൃത്യു. സംഘാദര്ശത്തിനു വേണ്ടി മുന്നണി പോരാളിയായി അദ്ദേഹം പ്രവര്ത്തിച്ചു.
ഭീഷണികള് ഏറെയുണ്ടായിട്ടും പിന്നോട്ടു കാലുകള് വെയ്ക്കാന് കൂട്ടാക്കിയില്ല. ഭാരതത്തെ ലോകത്തിന്റെ നെറുകയില് എത്തിക്കാനാണ് ബലിദാനങ്ങള് ഇവിടെ നടന്നിട്ടുളളത്. അതു സാര്ത്ഥകമാക്കാന് ഓരോത്തരും തങ്ങളുടെ കര്മ്മമണ്ഡലങ്ങളിലേക്ക് ഇറങ്ങണമെന്നും അദ്ദേഹം കൂട്ടിചേര്ത്തു. ആര്എസ്എസ് പാനൂര് താലൂക്ക് സംഘചാലക് എന്.കെ.നാണു മാസ്റ്റര് അദ്ധ്യക്ഷത വഹിച്ചു. കെപി.ജിഗീഷ് പ്രസംഗിച്ചു.
കെ.ടി.ജയകൃഷ്ണന്മാസ്റ്ററുടെ 17-ാം ബലിദാനദിനത്തില് മാക്കൂല്പീടികയിലെ സ്മൃതിമണ്ഡപത്തില് ആയിരങ്ങളാണ് പ്രണാമം അര്പ്പിക്കാന് എത്തിയത്. പതിറ്റാണ്ടുകള് കഴിഞ്ഞിട്ടും ഓര്മ്മകള് മറവിയെ പുണരാതെ ഇന്നും കണ്ണീരുമായി കഴിയുന്ന കെ.ടി.ജയകൃഷ്ണന് മാസ്റ്ററുടെ അമ്മയെ കാണാനും, ഒരുപിടി കാവിപൂക്കളര്പ്പിച്ച് ആ ആദര്ശപുരുഷനെ വണങ്ങാനും എത്തിയവരെ കൊണ്ട് വീട് നിറഞ്ഞിരുന്നു.
ആര്എസ്എസ് പ്രാന്തപ്രചാരക് ഹരികൃഷ്ണന്, വിദ്യാനികേതന് ദക്ഷിണക്ഷേത്രീയ സംഘടന സെക്രട്ടറി എന്.സി.ടി.രാജഗോപാല്, ആര്എസ്എസ് പ്രാന്തീയ സഹസമ്പര്ക്ക പ്രമുഖ് പി.പി.സുരേഷ്ബാബു, പ്രാന്തീയ കാര്യകാരി അംഗം വത്സന് തില്ലങ്കേരി, വിഭാഗ് കാര്യവാഹ് വി.ശശിധരന്, വിഭാഗ് സഹകാര്യവാഹ് തമ്പാന്,വിഭാഗ് പ്രചാരക് ഗിരീഷ്, ജില്ലാകാര്യവാഹ് കെ.പ്രമോദ്, കെസി.വിഷ്ണു,കെബി.പ്രജില്, വി.പി.ഷാജി, ടി.രാജശേഖരന്, കെ.സജീവന്, ടിപി.സുരേഷ്ബാബു, എന്പി.ശ്രീജേഷ്, യുവമോര്ച്ച സംസ്ഥാന പ്രസിഡണ്ട് അഡ്വ:ജയപ്രകാശ്, വൈസ്പ്രസിഡണ്ട് ബിജു എളക്കുഴി, ജില്ലാപ്രസിഡണ്ട് കെ.പി.അരുണ്, ബിജെപി ജില്ലാപ്രസിഡണ്ട് പി.സത്യപ്രകാശ്, സെല്കോര്ഡിനേറ്റര് കെ.രഞ്ജിത്ത്, പികെ.വേലായുധന്, കെ.പി.സഞ്ജീവ്കുമാര്, സി.കെ.കുഞ്ഞിക്കണ്ണന്, വിപി.സുരേന്ദ്രന്, എന്.ഹരിദാസ്, കെ.സുകുമാരന് മാസ്റ്റര്, കെ.കെ.ധനഞ്ജയന്, പത്മിനി ടീച്ചര്, സി.പി.സംഗീത, ലസിത പാലക്കല്, കെ.മഞ്ജുഷ, എന്.രതി, കെ.പി.വസന്ത തുടങ്ങിയവര് പുഷ്പാര്ച്ചനയ്ക്കു നേതൃത്വം നല്കി.
പ്രതികരിക്കാൻ ഇവിടെ എഴുതുക: