യാത്രക്കാരെ വലച്ച് മിന്നല്‍ ഓട്ടോക്കാരുടെ പണിമുടക്ക്

Monday 19 December 2016 11:04 pm IST

കൊച്ചി: കോര്‍പ്പറേഷന്‍ പരിധിയില്‍ ഓട്ടോ ഡ്രൈവര്‍മാരുടെ മിന്നല്‍ പണിമുടക്ക്. ഓണ്‍ലൈന്‍ ടാക്‌സികള്‍ തടഞ്ഞതിന്റെ പേരില്‍ ഓട്ടോ ഡ്രൈവര്‍മാരെ പൊലീസ് കസ്റ്റഡിയില്‍ എടുത്തതില്‍ പ്രതിഷേധിച്ചാണ് ഓട്ടോ തെഴിലാളികള്‍ മിന്നല്‍ പണിമുടക്ക് നടത്തിയത്. നോര്‍ത്ത്, സൗത്ത് റെയില്‍വേ സ്‌റ്റേഷനുകളിലെ ഓട്ടോ ഡ്രൈവര്‍മാരും കെഎസ്ആര്‍ടിസി ബസ് സ്റ്റാന്‍ഡിനു സമീപമുള്ള ഓട്ടോക്കാരുമാണ് ആദ്യം പണിമുടക്ക് തുടങ്ങിയത്. പിന്നീടിത് കോര്‍പ്പറേഷന്‍ പരിധിയിലേക്ക് വ്യാപിക്കുകയായിരുന്നു. ഇന്നലെ രാവിലെയാണ് ഓട്ടോറിക്ഷാ തൊഴിലാളി സംഘടനകള്‍ സമരം പ്രഖ്യാപിച്ചത്. പുലര്‍ച്ചെ രണ്ടു മണിയോടെയാണ് പ്രശ്‌നങ്ങള്‍ക്ക് ആസ്പദമായ സംഭവം. എറണാകുളം സൗത്ത് റെയില്‍വേ സ്‌റ്റേഷനില്‍ എത്തിയ ഓണ്‍ലൈന്‍ ടാക്‌സി, ഓട്ടോ ഡ്രൈവര്‍മാര്‍ തടഞ്ഞു. ഇതറിഞ്ഞ് പൊലീസ് ഇവിടെ എത്തുകയും ടാക്‌സി തടഞ്ഞവര്‍ക്കെതിരെ നടപടിയെടുക്കുകയുമായിരുന്നു. എന്നാല്‍, പൊലീസുകാരെ ഓട്ടോറിക്ഷാ തൊഴിലാളികള്‍ സംഘടിതമായി നേരിട്ടു. പൊലീസും ഓട്ടോ തൊഴിലാളികളും തമ്മില്‍ ഉന്തും തള്ളുമുണ്ടായി. തുടര്‍ന്ന് അന്‍പതിലേറെ പേരെ പൊലീസ് കസ്റ്റഡിയിലെടുത്തു. സമാനമായ സംഭവം നോര്‍ത്ത് റെയില്‍വേ സ്‌റ്റേഷനിലും ഉണ്ടായതോടെ സമരം പ്രഖ്യാപിക്കുകയായിരുന്നു. ഇതോടെ, രാവിലെ റെയില്‍വേ സ്‌റ്റേഷനുകളിലും കെഎസ്ആര്‍ടിസി ബസ് സ്റ്റാന്‍ഡിലും എത്തിയ യാത്രക്കാര്‍ വലഞ്ഞു.

പ്രതികരിക്കാന്‍ ഇവിടെ എഴുതുക:

ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. പ്രതികരണങ്ങളില്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. വായനക്കാരുടെ അഭിപ്രായങ്ങള്‍ ജന്മഭൂമിയുടേതല്ല.