തിരുവനന്തപുരം: വിവിധ ആവശ്യങ്ങള് ഉന്നയിച്ച് കെഎസ്ഇബി കരാര് തൊഴിലാളി ഫെഡറേഷന് (കെകെടിഎഫ്) തെക്കന് മേഖലാ കമ്മിറ്റിയുടെ നേതൃത്വത്തില് കെഎസ്ഇബി ഡിസ്ട്രിബ്യൂഷന് സൗത്ത് ചീഫ് എഞ്ചിനീയര് ഓഫീസിലേക്ക് (പവര്ഹൗസ്) മാര്ച്ചും ധര്ണയും നടത്തി.
പിഎസ്സിക്ക് കൈമാറിയ പട്ടികയിലുള്ള 3020 കരാര് ലൈന്വര്ക്കര്മാരേയും ഉടന് സ്ഥിരപ്പെടുത്തുക, വൈദ്യുതി ബോര്ഡ് ഉത്തരവുപ്രകാരമുള്ള വേതനവര്ദ്ധനവ് എല്ലാ വിഭാഗം കരാര് തൊഴിലാളികള്ക്കും ഉടന് നല്കുക, സ്ഥിരം തൊഴിലാളികള്ക്ക് തുല്യമായ വേതനം കരാര് തൊഴിലാളികള്ക്കും നല്കണമെന്ന സുപ്രീംകോടതി വിധി നടപ്പിലാക്കുക, പിഡിഎയുടെ പേരില് സീനിയര് അസിസ്റ്റന്റുമാരെ പിരിച്ചുവിടുന്നത് അവസാനിപ്പിക്കുക, ലൈസന്സ് നിര്ബന്ധമാക്കി പെറ്റി കോണ്ട്രാക്ടര്മാരെ ഒഴിവാക്കാനുള്ള നീക്കം ഉപേക്ഷിക്കുക എന്നീ ആവശ്യങ്ങള് ഉന്നയിച്ചായിരുന്നു സമരം. കെകെടിഎഫ് സംസ്ഥാന പ്രസിഡന്റ് അഡ്വ. ആര്. ലക്ഷ്മണയ്യര് മാര്ച്ചും ധര്ണയും ഉദ്ഘാടനം ചെയ്തു. തൊഴിലാളികളുടെ ന്യായമായ ആവശ്യങ്ങള് മാനേജ്മെന്റ് അംഗീകരിക്കുന്നില്ലെങ്കില് കൂടുതല് ശക്തമായ പ്രക്ഷോഭങ്ങള് നേരിടേണ്ടിവരുമെന്ന് അദ്ദേഹം മുന്നറിയിപ്പ് നല്കി.
തെക്കന് മേഖലാ കണ്വീനര് എസ്. സതീഷ്കുമാര് അദ്ധ്യക്ഷനായിരുന്നു. വൈസ് പ്രസിഡന്റുമാരായ സി.കെ. കരുണാകരന്, വി.എസ്. മോഹന്ലാല്, ട്രഷറര് പി. മുരളീധരന്, സെക്രട്ടറിമാരായ ബി. ഗിരീഷ്കുമാര്, ജെ. ജയഘോഷ്, ആര്. പത്മകുമാര്, ജില്ലാ സെക്രട്ടറി എസ്. ഷാജി, കൊല്ലം ജില്ലാ സെക്രട്ടറി വി.എസ്. ഷൂജ തുടങ്ങിയവരും ധര്ണയെ അഭിസംബോധന ചെയ്തു.
പ്രതികരിക്കാൻ ഇവിടെ എഴുതുക: