തിരുവനന്തപുരം : ഹിന്ദു സ്പിരിച്വല് ആന്റ് സര്വ്വീസ് ഫൗണ്ടേഷന് (എച്ച്എസ്എസ്എഫ്) സംഘടിപ്പിക്കുന്ന ഹൈന്ദവ ആദ്ധ്യാത്മിക, സേവന ഉത്സവം ഫെബ്രുവരി 2 മുതല് 5 വരെ പൂജപ്പുര മൈതാനത്തു നടക്കുമെന്ന് സ്വാഗതസംഘം ചെയര്മാന് എസ്. പ്രിയദര്ശന് വാര്ത്താസമ്മേളനത്തില് പറഞ്ഞു.
ഉത്സവത്തിന് മുന്നോടിയായുള്ള സ്വാമി വിവേകാനന്ദ രഥപൂജ ജനുവരി 12ന് യക്ഷിയമ്മ ആല്ത്തറയില് നടക്കും. സ്വാമി വിവേകാനന്ദന്റെ വേഷമിട്ട 154 വിദ്യാര്ത്ഥികളും സ്കൂള് യൂണിഫോമിലുള്ള 1000 വിദ്യാര്ത്ഥികളും പങ്കെടുക്കും. സ്വാമി വിവേകാനന്ദന്റെ ഛായാചിത്രം പേറിയ രണ്ട് രഥങ്ങള് ജനുവരി 12നും 21നും ഇടയില് 100 വിദ്യാലയങ്ങള് സന്ദര്ശിക്കും. 21ന് ശ്രീകൃഷ്ണനെ ആസ്പദമാക്കി പൂജപ്പുര മൈതാനത്തില് നടക്കുന്ന യോഗപ്രദര്ശനത്തില് 1000 വിദ്യാര്ത്ഥികള് പങ്കെടുക്കും.
ധാര്മ്മിക, ആദ്ധ്യാത്മിക മൂല്യങ്ങള് ആസ്പദമാക്കി ഏഴ് ഭാഷകളിലായി ജനുവരി 27ന് നടക്കുന്ന ഗാനമേളയില് 1000 വിദ്യാര്ത്ഥിനികള് പങ്കെടുക്കും. ജനുവരി 29ന് മ്യൂസിയം ആഡിറ്റോറിയത്തില് പെയിന്റിംഗ് മത്സരം നടക്കും. ഫെബ്രുവരി 2 മുതല് 5 വരെ നടക്കുന്നു ആദ്ധ്യാത്മിക സേവനോത്സവത്തില് കുടുംബ – മാനുഷിക മൂല്യങ്ങള്, പരിസ്ഥിതി സംരക്ഷണം, വനിതകളോടുള്ള ആദരം, ദേശസ്നേഹം തുടങ്ങിയ വിഷയങ്ങള് ആസ്പദമായ ചര്ച്ച നടക്കും. പ്രായമായവരടക്കമുള്ള വനിതകളെ ആദരിക്കുന്ന കന്യാവന്ദനം, സുവാസിനി വന്ദനം എന്നിവയും കര, നാവിക, വ്യോമസേനയുടെ യൂണിഫോമണിഞ്ഞ വിദ്യാര്ത്ഥികള് 21ല്പ്പരം വീരചക്ര ജേതാക്കളെ ആദരിക്കുന്ന ചടങ്ങും ഇതോടൊപ്പം നടക്കും. ഫെബ്രുവരി 2ന് ഗുരുമൂര്ത്തി സേവന ഉത്സവം ഉദ്ഘാടനം ചെയ്യും. ഉത്സവത്തില് 100 ഓളം സ്റ്റാളുകള് ഉണ്ടാകും.
‘ഹിന്ദു’, ‘ഹൈന്ദവത’ എന്നീ സംജ്ഞകള്ക്ക് സുപ്രീം കോടതി നിര്ദ്ദേശിച്ച വ്യാഖ്യാനത്തിന് ആസ്പദമായി രൂപംകൊണ്ടിട്ടുള്ള പൊതുസംഘടനയാണ് എച്ച്എസ്എസ്എഫ്. സ്വാമി ദയാനന്ദ സരസ്വതി ചെയര്മാനായുള്ള ബോര്ഡ് ഓഫ് ട്രസ്റ്റീസില് ബോഫോഴ്സ് കേസ് അടക്കമുള്ള അഴിമതികള് വെളിച്ചത്തുകൊണ്ടുവന്ന മാധ്യമ പ്രവര്ത്തകനായ എസ്. ഗുരുമൂര്ത്തി, നര്ത്തകി ഡോ. പത്മസുബ്രഹ്മണ്യം, സാമൂഹ്യപ്രവര്ത്തകയായ ആര്. രാജലക്ഷ്മി എന്നിവര് അംഗങ്ങളാണ്.
ഭാരതസംസ്കാരത്തെക്കുറിച്ച് പുതുതലമുറയില് കൂടുതല് അവബോധമുണ്ടാക്കുക എന്നതും ഭാരതീയ മൂല്യങ്ങള്ക്ക് പ്രാധാന്യം നല്കുക എന്നതുമാണ് പരിപാടി കൊണ്ടുദ്ദേശിക്കുന്നതെന്ന് പ്രിയദര്ശന് പറഞ്ഞു. ദേശസ്നേഹമെന്നത് നമ്മുടെ പാരമ്പര്യത്തിലൂടെയും സംസ്കാരത്തിലൂടെയും പകര്ന്നുകിട്ടുന്ന വികാരമാണെന്നും അത് ആരെയും നിര്ബന്ധിച്ച് നടപ്പാക്കേണ്ടതല്ലെന്നും പ്രിയദര്ശന് പറഞ്ഞു.
പത്ര സമ്മേളനത്തില് ഓര്ഗനൈസിംഗ് കമ്മിറ്റി വൈസ് ചെയര്മാന്മാരായ റിട്ട. എയര്മാര്ഷല് ഡോ. പി. മധുസൂദനന്, നിര്മ്മാതാവ് ദിനേശ് പണിക്കര്, ഫൗണ്ടേഷന് ട്രസ്റ്റി രാജലക്ഷ്മി, ജനറല് കണ്വീനര് എം.ആര്. രഞ്ജിത്ത് കാര്ത്തികേയന് എന്നിവരും പങ്കെടുത്തു.
ചടങ്ങില് വെബ്സൈറ്റിന്റെ പ്രകാശനം ദിനേശ് പണിക്കര് നിര്വ്വഹിച്ചു. സംഘടനകളുടെ രജിസ്ട്രേഷന് വിതരണം ഉദ്ഘാടനം നടി മേനക സുരേഷ് സംവിധായകന് പ്രിയദര്ശന് നല്കി നിര്വ്വഹിച്ചു.
പ്രതികരിക്കാൻ ഇവിടെ എഴുതുക: