കണ്ണൂര്: ക്ഷീരവികസനവകുപ്പ്, ക്ഷീരസഹകരണ സംഘങ്ങള് എന്നിവയുടെ സംയുക്താഭിമുഖ്യത്തില് ഇന്ന് മുതല് 15 വരെ പിണറായിയില് ജില്ലാ ക്ഷീരസംഗമത്തിന് ഇന്ന് കൊടിയുയരും. ഇന്ന് കാലത്ത് എല്ലാ ക്ഷീരസംഘങ്ങളിലും പതാകയുയര്ത്തന്നതോടെ സംഗമ പരിപാടിക്ക് തുടക്കമാകും. എട്ടിന് പിണറായി ബാങ്ക് ഓഡിറ്റോറിയത്തില് ജില്ലാതല ചിത്രരചനാ മത്സരം, കാര്ഷിക, നാടന് കായികമത്സരങ്ങള് എന്നിവ ഉണ്ടായിരിക്കും. ഒമ്പതിന് ജില്ലാതല കന്നുകാലി പ്രദര്ശന മത്സരവും വന്ധ്യതാനിവാരണ ക്യാമ്പും നടത്തും. കന്നുകാലി വന്ധ്യതാ-പ്രശ്നങ്ങളും പരിഹാരങ്ങളും എന്ന വിഷയത്തെ ആസ്പദമാക്കി ക്ലാസ്സും ഉണ്ടായിരിക്കും. 11ന് ക്ഷീരസംഗമ വിളംബരഘോയാത്ര പിണറായി ടൗണില് നടക്കും. 12ന് സ്റ്റുഡന്സ് ഡയറി ക്ലബ്ബ് ഉദ്ഘാടനം കെ.കെ.രാഗേഷ് എംപി നിര്വ്വഹിക്കും. സ്കൂള് വിദ്യാര്ത്ഥികള്ക്കായി കരിയര് ഗൈഡന്സ് പ്രോഗ്രാമും തുടര്ന്ന് സംരംഭകത്വ സെമിനാറും ഉണ്ടായിരിക്കും. 13ന് സണ്ണിജോസഫ് എംഎല്എയുടെ അധ്യക്ഷതയില് നടക്കുന്ന സംഘം ജീവനക്കാര്ക്കുള്ള ശില്പശാല സഹകരണ മന്ത്രി കടകംപള്ളി സുരേന്ദ്രന് ഉദ്ഘാടനം ചെയ്യും. തുടര്ന്ന് ക്ഷീരസംഘം ജീവനക്കാര്ക്കുള്ള മത്സരപരിപാടികള് നടത്തും. 15ന് മന്ത്രി രാമചന്ദ്രന് കടന്നപ്പള്ളിയുടെ അധ്യക്ഷതയില് മുഖ്യമന്ത്രി പിണറായി വിജയന് ക്ഷീരസംഗമവും ക്ഷീരവികസന സെമിനാറും പൊതുസമ്മേളനവും ഉദ്ഘാടനം ചെയ്യും. പരിപാടിയില് മികച്ച ക്ഷീരകര്ഷകരെ ആദരിക്കും. വിവിധ മത്സരങ്ങളിലെ വിജയികള്ക്കുള്ള സമ്മാനവിതരണം, മികച്ച ക്ഷീരസംഘങ്ങള്ക്കുള്ള അവാര്ഡ്, മികച്ച ക്ഷീര കര്ഷകനുള്ള ക്യാഷ് അവാര്ഡ്, കന്നുകാലി പ്രദര്ശന മത്സരത്തിലെ വിജയികള്ക്കുള്ള സമ്മാനങ്ങള് എന്നിവ നല്കും.
പ്രതികരിക്കാൻ ഇവിടെ എഴുതുക: