കല്പ്പറ്റ : സംസ്ഥാനത്തെ എല്ലാ സര്ക്കാര് സ്കൂളുകളും ഹൈടെക് ആക്കുമെന്ന് മുഖ്യമന്ത്രി പിണറായി വിജയന്. വയനാട്ടില് കല്പ്പറ്റ ഗവ.വൊക്കേഷണല് ഹയര് സെക്കണ്ടറി സ്കൂളിനെ അന്താരാഷ്ട്ര നിലവാരത്തിലേക്കുയര്ത്തുന്ന പദ്ധതിയുടെ ഔദ്യോഗിക പ്രഖ്യാപനം നിര്വ്വഹിച്ച് സംസാരിക്കുകയായിരുന്നു അദ്ദേഹം.
സര്ക്കാര്ഫണ്ടിനെ മാത്രം ആശ്രയിക്കാതെ സമൂഹത്തിന്റെ വിവിധ മേഖലകളില്നിന്ന് വിഭവങ്ങള് കണ്ടെത്തണം. തദ്ദേശ സ്വയംഭരണ സ്ഥാപനങ്ങള്, പി.ടി.എ, എം.പി.മാര്, എം.എല്.എമാര്, വിദ്യാര്ത്ഥികള്, പൂര്വ്വ വിദ്യാര്ത്ഥികള്, മറ്റു സന്നദ്ധരായ വ്യക്തികള് തുടങ്ങിയവരില്നിന്ന് വിഭവ സമാഹരണം നടത്തണം. വിദ്യാലയങ്ങളില് പശ്ചാത്തല സൗകര്യം മാത്രം പോര. ഗുണനിലവാരവും ഉറപ്പുവരുത്തണം. കാലപ്പഴക്കമുള്ള കെട്ടിടങ്ങള്ക്കു പകരം പുതിയ കെട്ടിടങ്ങള് നിര്മ്മിക്കും.
ശുചിമുറികള്, ലാബുകള്, മറ്റ് അടിസ്ഥാന സൗകര്യങ്ങള് എന്നിവ ഒരുക്കും. വിദ്യാലയങ്ങളെ മികവിന്റെ കേന്ദ്രങ്ങളാക്കി മാറ്റുന്നതില് നാട്ടുകാരുടെ പങ്ക് വലുതാണെന്നും മുഖ്യമന്ത്രി പറഞ്ഞു. നിര്ദ്ദിഷ്ട സ്കൂള് രൂപരേഖ ആര്ക്കിടെക്ട് ജി.ശങ്കര് മുഖ്യമന്ത്രിക്കു കൈമാറി. സി.കെ.ശശീന്ദ്രന് എം.എല്.എ. അധ്യക്ഷനായി.
പ്രതികരിക്കാൻ ഇവിടെ എഴുതുക: