കാട്ടാക്കട: കാട്ടാക്കടയില് നിന്നും തേക്കടിയിലേക്കുള്ള തിരുവനന്തപുരം ഡിപ്പോയിലെ കെഎസ്ആര്റ്റിസി ബസ് സര്വ്വീസ് നിര്ത്തലാക്കി. യാത്രക്കാര്ക്ക് ഏറെ പ്രയോജനം ചെയ്യുന്ന സൂപ്പര് ഫാസ്റ്റ് ബസ്സാണ് അധികൃതര് പരിഷ്ക്കാരണത്തിന്റെ മറവില് റദ്ദ് ചെയ്തത്. രാവിലെ 4.45 ന് തിരുവനന്തപുരത്തു നിന്നും തിരിച്ചു കാട്ടാക്കട വഴി നെയ്യാര്ഡാമില് എത്തി, ഇവിടെ നിന്ന് 6.10 ന് തിരിച്ചു കാട്ടാക്കട, തിരുവനന്തപുരം, കൊട്ടാരക്കര, കോട്ടയം, കുമിളി വഴി തേക്കടി വരെ പോകുന്ന ബസ്സാണ് മുന്നറിയിപ്പില്ലാതെ നിറുത്തലാക്കിയത്. പുതിയ സമയ ക്രമീകരണം അനുസരിച്ചു കാട്ടാക്കട ഭാഗത്തേക്കുള്ള ട്രിപ്പ് ഒഴിവാക്കി രാവിലെ അഞ്ചു മണിക്ക് തേക്കടിയിലേക്ക് തിരുവനന്തപുരം ഡിപ്പോയില് നിന്നു തന്നെ ഈ ബസ് സര്വീസ് നടത്തും. കാട്ടാക്കടയില്നിന്ന് നിലവില് കാലങ്ങളായുള്ള തൃശൂര്, ഗുരുവായൂര്, ഈരാറ്റുപേട്ട, കോട്ടയം റൂട്ടുകള് മാത്രമാണ് ഇപ്പോഴുള്ളത്.
തിരുവനന്തപുരം ഡിപ്പോയില് നിന്നാണ് സര്വിസ് നടത്തിയിരുന്നതെങ്കിലും കാട്ടാക്കടയില് നിന്നും ഇടുക്കിയിലേക്കുള്ള ഏക ബസ് ആയിരുന്നു ഇത്. പുതിയ റൂട്ടുകള് അനുവദിക്കുന്ന കാര്യത്തില് കാട്ടാക്കട ഡിപ്പോയെ അവഗണിക്കുന്നുവെന്ന ആക്ഷേപം നിലനില്ക്കുമ്പോഴാണ് ഉണ്ടായിരുന്ന സര്വീസ് പിന്വലിച്ചിരിക്കുന്നത്. ബസ് റദ്ദ് ചെയ്ത നടപടി പുനഃപരിശോധിക്കണമെന്ന് ആവശ്യം ശക്തമായിട്ടുണ്ട്.
പ്രതികരിക്കാൻ ഇവിടെ എഴുതുക: